har vyakti ki janmakundli uske janm tithi, samay v sthan anusar grahon ki rashi chakra men sthiti darshati hai. grah sada chalayman rahte hain. surya se duri anusar vah kuch samay vakri rahakar punah margi ho jate hain. rahu v ketu sada vakri gati se bhraman karte hain. gochar karte hue chandrama ek rashi men 2 se sava 2 din, surya ek mah, budh, shukra aur mangal lagabhag ek mah, brihaspati ek varsh, rahu v ketu (vakri chalte hue) derh varsh ka samay lete hain. shani sarvadhik dhai varsh men ek rashi ka gochar pura karta hai. atah uska manav jivan par dirghakalin prabhav rahta hai.
sarhesati jab shani janmakundli men chandra rashi se pichli rashi, chandra rashi men tatha chandra rashi se agli rashi men gochar karta hai, tab yah (2) g 3) arthat ‘sarhesati’ kahlata hai. yah kram har jatak ke jivan men 30 varsh ke antral se ata rahta hai. 2016-17 men tula rashi valon ke liye sarhesati ka antim bhag, vrishchik rashi ke lie madhya bhag tatha dhanu rashi ke liye pratham bhag chalega. sarhesati ka samay jatkon ko sansarik drishti se kai prakar ke kashton, jaise asflta, sukh men kami, manhani, dhan ka nash, sharirik pira, mansik chinta, parivar men kisi mahatvapurn vyakti ka nidhan, adi ka samna karna parta hai.
atah janmanas ka sarhesati se bhaybhit rahna svabhavik hai. shani ka chandra rashi se chaithe, satven aur athven bhav se gochar bhi jatak ke lie kashtakari hota hai. vrishabh aur tula lagn vale jatkon ke lie shani yogkarak (kendra aur trikon bhav ka svami) hone se tatha makar aur kunbh lagn valon ke liye lagnesh hone ke karan shani ki sarhe-sati sadharan kashtakari hoti hai. dhanu, min, mithun aur kanya lagnon ke liye madhyam kashtakari tatha shesh lagnon (mesh, kark, sinh aur vrishchik) ke lie sarhesati adhik kashtakari hoti hai. janm kundli men shani ke nich, ast, pirit athva vakri hone aur chandrama bhi nirbal athva pirit hone par sarhesati ka samay sarvadhik kashtakari hota hai. kundli men chandrama rahu, mangal ya shani dvara grasit ho, athva chandrama trik bhavon men sthit ho tab bhi sarhesati adhik dukhdayi hoti hai.
dasha-bhukti ke anukul hone aur brihaspati ka gochar bhi shubh hone par sarhesati ka prabhav kam hota hai. sarhesati ke samay jatak ko apni tarah se shiksha dekar shani jab chandra rashi se tisre bhav men gochar karta hai to sare avrodh hata deta hai. in dhai varshon men jatak ka purusharth safal hota hai. uske man-samman, dhan-dhanya aur sukh men vriddhi hoti hai. shani ka chaturth bhav se gochar ‘kantak shani’ kahlata hai. in dhai varshon men jatak ko sthan hani, parivarik kalah, sharirik pira aur sukh men kami ke karan mansik santap hota hai. pancham bhav se gochar ke samay buddhi-bhram, man-samman men kami, dhan hani aur santan kasht hota hai.
chathe bhav ka gochar anukul paristhitiyan lata hai. jatak svasth aur sukhi rahta hai. saptam bhav se shani ka gochar jatak ko svayan tatha patni ke lie kashtakari, sahyogiyon se manomalinya aur videsh vas deta hai. chandrama se ashtam bhav men shani ka gochar jatak ko sharirik pira, bhay, stri sukh men kami, shatru vriddhi, adi kathinaiyan deta hai. navam bhav se shani ka gochar jatak ko dhan nash, bhay, vaimanasya, parivar ke kisi bare sadasya ka nidhan adi kasht deta hai. dasham bhav se gochar ke samay jatak ko apne anuchit karmon ke falasvarup manhani aur uske karya men kai prakar ke avrodh ate hain.
gyarhven bhav men shani ka gochar pichle das varshon ke kashton se nivritti deta hai tatha jatak ki sabhi manokamnaen purn hoti hain. jatak dhan-dhanya, man-samman aur sukh-samriddhi pata hai. agar jatak is samay adharm v nindit karyon men lipt hota hai tab fir sarhesati ke samay byaj sahit anek prakar ke kasht bhogta hai. is prakar shani apne 30 sal men rashi chakra ki barah rashiyon se gochar karte hue sarhe 22 sal vibhinn prakar ke kasht aur bich-bich men dhai varsh ke tin antral men sukh dekar ek kathor anushasak parantu hitaishi shikshak ki bhanti is sansar ka sahi rup darshakar jatak ke man men virakti bhavna ka sanchar karta hai.
shastron men shani janit kashton ki shanti ke lie shanivar, amavasya aur visheshakar ‘shanaishchari amavasya’ ko vidhivat puja, archana aur dan ka vidhan bataya hai. nitya prati shani mantra jap v shani-stotra’ path bhi labhkari hota hai. in upayon ko suvidha aur samathrya ke anusar sharnagat bhav manobal avashya prapt hota hai.
shivji ne shani grah ko manushyon ke karmon ka nirnayak banaya hai, atah uske dushprabhav ko purnataya samapt karna sanbhav nahin hai. shani ka kripa patra banne ka sarvottam upay hai ki apni buddhi aur vivek ka sahi upyog kar sadacharan satkarmon ke sath ishvar ke prati samarpit rahen, jo adhyatm path ki pahli sirhi hai.