aj ham bat kar rahe hain ek aise shakhs ki jise chitrakari, sangit, gayan, takniki gyan, bhavan nirman, murtikla adi anek vidhaon men maharat hasil the. ji han ham bat kar rahe hain mashhur italvi chitrakar liyonardo da vinsi ki jinhen log monalisa ki mashhur penting banane vale chitrakar ke nam se jante hain. florens ke ek ganv vansi men dhani jagirdar ki avaidh santan ke rup men liyonardo ka janm hua tha. liyonardo ki kala pratibha ishvar pradatt thi jise unke dada ne pahchana.
dada ki salah par hi liyonardo ke pita ne unka dakhila aise skul men karvaya jahan anya pathyakram ke sath hi sangit aur chitrakari ki shiksha bhi di jati thi. aiye dekhte hain kya kahte hain liyonardo ki kundli ke grah liyonardo ka janm vrishchik lagn men hua. lagnesh mangal chaturth bhav men dvitiyesh v panchmesh brihaspati se yut hokar sthit hain.
mangal apne hi nakshatra aur karmesh surya ke up nakshatra men hain. navansh lagn men dhanesh v labhesh hokar brihaspati baithe hain tatha navansh lagnesh shani ashtam bhav men rahu se yut hokar baithe hain. liyonardo ke lagn lagnesh par brihaspati ka spasht prabhav drishtigochar hai. brihaspati dvitiyesh v panchmesh hain. dvitiya bhav vani ka tatha pancham bhav manobhav v lalit kalaon ka bhav hai.
lagn kundli men chaturth bhav men lagnesh mangal v brihaspati ki yuti dasham bhav par purn drishti prabhav banae hue hai. mangal lagnesh hone ke sath hi shashthesh bhi hai. shashth bhav dasham bhav ka bhagya bhav hota hai. mangal v brihaspati donon ki hi drishti dasham bhav par hai. kala ke karak grah shukra saptam bhav men svarashisth hokar lagn ko purn drishti se dekh rahe hain aur lagnesh mangal ki saptam bhav par purn drishti bhi hai. yahi karan hai ki bachapan se hi liyonardo ki ruchi kala ki or rahi.
matra chah sat varsh ki umra men hi ve logon ke chehre ke skech hubhu utar diya karte the. chaturth bhav mata ka bhav hai. chaturthesh shani apne se ashtam arthat ekadash bhav men aur chaturth bhav ke karak chandrama lagn se ashtam bhav men baithakar chaturth bhav ki hani kar rahe hain. yahi karan tha ki unki mata ne unhen janm to diya kintu unka palan poshan nahin kiya.
navam bhav bhagya ka v pita ka bhav hai. navmesh chandrama apne se dvadash bhav arthat ashtam men hai jo navam bhav ke falon ka vyay darsha rahe hain jiske karan hi liyonardo ko pita ka bhi apekshit prem nahin mila. chunki pitri karak surya shashth bhav men apni uchch rashi men sthit hai aur shadbal men bhi sarvadhik bali hai isi karan najayaj santan ke rup men janm lene ke bad bhi liyonardo ke jagirdar pita ne unhen anathalay men chorne ki bajay apne pas rakh liya.
liyonardo ko apne ghar men us samay ki sari sukh suvidhaen prapt thin kintu sabhi use upekshapurn najron se dekhte the. pita ne shadi bhi kar li aur sauteli man v anya rishtedaron se bhi use rukha vyavhar hi milta tha. yahi karan tha ki liyonardo insanon ki bajay prakriti se adhik ghul-mil gaye. ve ghanton jangal men ghumte aur prakriti ke najaron men kho jate. liyonardo ke pita ne unke jivan men dhan ki koi kami nahin hone di lekin prem aur lagav kabhi nahin pradan kiya.
liyonardo ke jivan men keval unke dada ji ek matra aise shakhs the jinhonne use prem diya aur uski pratibha ko samjha. dvitiya bhav se rahu ki pancham drishti shashth bhav men sthit dashmesh surya par, saptam drishti navmesh chandrama par tatha navam drishti dasham bhav par hai. rahu yadyapi apni nichasth rashi dhanu men sthit hai kintu rahu nichbhang rajyog bhi nirmit kar rahe hain.
rahu dvara banne vale is nich bhang rajyog ka hi prabhav tha ki liyonardo men unke dada ko anek khubiyan najar ain. liyonardo ki kundli men rahu dhanu rashi men sthit hai. dhanu ke svami brihaspati lagn se kendra arthat chaturth bhav men hain aur rahu ke uchchanath arthat mithun ke svami budh chandrama se dasham bhav men sthit hain. is karan prabal nich bhang rajyog ban raha hai. liyonardo ka janm mangal ki mahadsha men hua jo janm ke bad lagabhag derh varsh chali fir praranbh hui 18 varsh ki rahu ki mahadsha. is rahu ki mahadsha men liyonardo ko rahu ke nichbhang rajyog ke sabhi shubh fal prapt hue.
navansh lagn men bhi rahu navansh lagnesh shani ke sath yut hokar baithe hain aur pancham bhav tatha panchmesh budh ko purn drishti pradan kar rahe hain. yahi karan hai ki liyonardo ko sabhi lalit kalaon men maharat hasil tha. lagn kundli men dashmesh surya hain, navansh lagn men surya dashamasth hain aur dashmansh lagn men bhi surya dasham bhav men baithe hain.
surya shadbal men bhi sarvadhik bali hai. yahi karan hai ki liyonardo ek dhani aur sammanit jagirdar ke putra hue aur sath hi apne karya kshetra men bhi atyant sammanit hue. surya ke prabhavavash hi dyuk aef milan ne unhen shahi injiniyar niyukt kiya tha. rahu ki mahadsha ke bad praranbh hui brihaspati ki mahadsha. brihaspati chaturth bhav men lagnesh mangal ke sath sthit hai.
brihaspati rahu ke hi nakshatra men aur shukra ke upanakshatra men hai. shukra saptamesh aur dvadshesh hai. brihaspati ki purn drishti ashtam bhav v bhagyesh chandra par tatha dasham bhav v dvadash bhav par hai. navansh kundli men brihaspati vargottami hokar lagn men hi virajman hai. dashmansh lagn men brihaspati pancham bhav men apni uchch rashi kark men uchchanath chandrama ke sath virajman hai aur lagnesh hokar lagn, pancham v navam par apna purn shubh prabhav darsha rahe hain. liyonardo ke karya kshetra ke bad ab bat karte hain saptam bhav ki.
saptam bhav men svarashisth vyayesh shukra baithe hue hain. purush ki kundli men saptam bhav ke karak hote hain shukra. bhav ke karak ka bhav men baithna shubh nahin kaha jata hai ‘‘karko bhav nashay’’ sath hi shukra yahan dvadash arthat vyay bhav ke svami hain aur saptam se chatha hone ke karan vyay bhav saptam bhav ke lie ashubh fal hi utpann karta hai. yahi karan hai ki liyonardo ko saptam bhav arthat patni ka sukh prapt nahin hua. liyonardo ka saptam bhav papakartari yog se bhi grast hai. shashth bhav men surya v ashtam bhav men ketu chandra ki upasthiti saptam bhav ko pirit kar rahi hai. rahu ki bhi purn drishti shashth v ashtam bhav par par rahi hai. floriya nam ki mahila unhen bahut prem karti thi kintu unhonne uske prem ko kabhi svikar nahin kiya. liyonardo ka pratham v antim prem to kala thi.
unhonne apni kala se prem kiya aur apni yogyata ka sadaiv dusron ki bhalai men prayog kiya. brihaspati ke bad shani ki mahadsha bhi atyant shubh rahi. shani tritiyesh v chaturthesh hokar labh bhav men apni mitra rashi kanya men sthit hai. shani ki rashi kunbh men lagnesh mangal baithe hain aur mangal ki purn drishti shani par hai. shani mangal ke nakshatra men sthit hain. is prakar shani v mangal ka atyant ghanishth sanbandh bana hua hai. shani tritiyesh hone ke sath hi chaturthesh bhi hain. chaturth bhav sukh bhav, tritiya bhav parakram ka bhav hone ke sath hi sukh bhav ka vyay bhav bhi hai. shani labh bhav men tritiya se to navam men hain kintu chaturth se ashtam bhav men hain. yahi karan hai ki un par yah arop laga ki ve nastik hain. itli men us samay ek charch men ve apni myural purn karne men vyast the. yah itni bari aur mushkil thi ki do sal se ve ise purn karne men lage the. liyonardo ko apna kam aur ghar chorna para.
charch ke padri ne unhen arop se to mukt kar diya kintu unhen vapas charch men n ane ki hidayat bhi di. rahu, brihaspati v shani ne liyonardo ko jahan shubh fal pradan kiye vahin ashtam bhav sanbandhi ashubh fal bhi pradan kiye. tinon ki hi purn drishti ashtam bhav par hai. ashtam bhav gahrai ka bhav hai. liyonardo ki kala men asim sanbhavnaen thin. unhonne kala ko ek alag mukam tak pahunchaya. usi ashtam bhav ke falasvarup unhen apna kam chorna para aur pran raksha ke lie ghar bhi chorna para. liyonardo jahan bhi gae unhen unki kala ne sadaiv khub kam aur samman dilvaya. unki kala ke sarvatra charche the.