rahu-ketu chaya grah hain, parantu unke manav jivan par padne vale prabhav ke adhar par hamare tatvavetta rishi-muniyon ne unhen naisargik papi grah ki sangya di hai. ketu ko ‘kujavt’ tatha rahu ko ‘shanivat’ kaha gaya hai. parantu jahan shani ka prabhav dhire-dhire hota hai, rahu ka prabhav achanak aur tivra gati se hota hai. rahu-ketu kundli men amne-samne 1800 ki duri par rahte hain aur sada vakra gati se gochar karte hain. rahu ‘ihlok’ (sukh-samriddhi) tatha ketu ‘parlok’ (adhyatma), se sanbandh rakhta hai. yah kundli ke tisre, chathe aur gyarhven bhav men achcha fal dete hain. surya aur chandrama se rahu ki param shatruta hai. shubh grahon se yuti v drishti sanbandh hone par rahu sabhi prakar ke sansarik -sharirik, mansik aur bhautik -sukh deta hai, parantu ashubh v papi grah se sanbandh kashtakari hota hai. fal ki prapti sanbandhit grah ke balanupat men hoti hai.
rahu se sanbandhit ashubh grah ki dasha jitne kasht deti hai, usse adhik kashtakari rahu ki dasha-bhukti hoti hai. rahu dvara grasit hone par surya apne karakatva - pita, dhan, adar, samman, naukri, dahini ankh, hriday adi- sanbandhi kasht deta hai. bahut mehanat karne par bhi labh nahin milta. sath hi surya jis bhav ka svami hota hai uske fal ki hani hoti hai. vyakti ke vyavhar men dikhava, ghamand v badbolapan anttah hanikarak siddh hota hai. rahu dvara grast hone par chandrama jatak ki mata ko kasht deta hai. parivarik shanti bhang hoti hai. jatak svayan chati, pet, bain ankh ke rog, ya mansik santap se grasit hota hai. use dar, asmanjas aur chinta ke karan nind nahin ati aur vah buri adton men lipt ho jata hai. chandrama ke nirbal aur pidit hone par jatak hatasha men atmahatya tak kar leta hai. rahu dvara grasit hone par mangal jatak ko ugra v krodhi banata hai.
vah chidchida aur akramak ban jata hai tatha samaj aur kanun virodhi karya karta hai, ladai-jhagda, sanpatti hani, chot, foda-funsi, pitt v rakta-vikar, bukhar adi ki sanbhavna badh jati hai. mangal ke svamitva vale bhavon sanbandhi karyon men avrodh v hani hoti hai. rahu dvara shukra ke grasit hone par vyakti apni sukh-suvidhaon ko anaitik rup se prapt karta hai. use chehra, gala, ankh, kidni, prajanan pranali or yaun rog ki sanbhavna rahti hai. vyakti fijul-kharchi karta hai. uske anya striyon se sanbandh hote hain, jo kashtakari siddh hota hai. rahu dvara budh ke grast hone par vyakti ke achar-vichar men vikriti ati hai. padhai men vighn tatha vidya se labh nahin hota. vah jhuth aur beimani ka sahara leta hai. use chati, snayu, charm aur pachan sanbandhi rog hote hain.
rahu dvara brihaspati ke grast hone par vyakti ko putra, vidya, dhan, guru, dharm, adar, man tatha sukh-samriddhi men avrodh ate hain. use livar, madhumeh, rakt, hriday, tyumar, nasika aur charbi ke rog hote hain. brihaspati ke svamitva vale bhavon sanbandhi karyon men pareshaniyan ati hain. vyakti ki soch men vikriti ati hai. uske sankuchit aur adharmik marg apnane se man-samman men kami ati hai, vah dukhi rahta hai. brihaspati se sanbandh hone par rahu ke dushprabhav men kami ati hai. is yuti ko ‘guru’ chandal yog’ kahte hain. rahu dvara shani ka grast hona sarvadhik anishtakari hota hai. vyakti ko jivan men dukh, kasht, avrodh, bimari, dhan hani, aur tiraskar milta hai. vyakti ko sardi, jukam, pachan kriya, tilli, dant v haddiyon ke rog tatha asthama, lakva aur gathiya jaise dirghakalin rog hote hain.
is prakar rahu tatha shani ka sanbandh kundli ke falon men anek prakar ke avrodh lata hai. rahu ke shani se agle bhav men sthit hone par jatak bahut niche star par karya aranbh karta hai. uski pragti men anek badhaen ati hain. vah asantusht rahta hai. shiksha prapti ki ayu men naisargik ashubh grahon se sanbandhit rahu ki dasha-bhukti dhyan kendrit nahin hone deti aur saflta kathinai se milti hai. rahu par shubh prabhav hone se teknikal, injiniyaring, kanpyutar aur daektari shiksha men saflta milti hai. rahu ke kendra ya trikon bhav men, trikon v kendra ke svami ke sath sthit hone par uski apni dasha-antardasha rajyogkari fal pradan kar vyakti ke jivan ko sukhi v samriddhashali banati hai. is prakar shubh prabhav men rahu apni dasha-bhukti men shubh fal tatha ashubh prabhav men kasht deta hai. atah kundli men rahu ke prabhav aur bhav sthiti ka purn akalan kar lene se bhavishya kathan men paripakvata ati hai. rahu pradatt kasht nivaran ke lie prati din ek mala rahu mantra (un ran rahuve namah) ka jap, tatha visheshakar amavasya tithi ko ek, tin ya panch kodhiyon ko sarson ke tel se bani sabji, roti v ek gud-til ka laddu svayan dan kar, sath men kuch dakshina bhi dena chahie.