ek pauranik katha ke anusar yah kaha jata hai ki ravan ek bahut hi vidvan aur bhagvan shiv ka bhakt tha. ek bar ki bat hai ki ravan ne apni tapasya aur bhakti se sabhi grahon ko apne ekadash bhav men sthit kar liya tha jisse ki vah har samay apni ichchaon ki purti kar sake tatha sabhi grah uske vash men ho jayen aur jab chahe aur jo chahe uski manmangi murad puri ho sake. isi kram men ravan ne shani ko bhi apne vash men karke ekadash bhav men sthit kar liya. lekin shani bhagvan ko ravan ki is ichcha ka pata chal gaya, jiske karan shani bhagvan ne us sthan se bhagna chaha, parantu kyonki ravan ne bhagvan shani ko rassiyon se bandhakar bandhak bana rakha tha isliye shani bhagvan vahan se mukt nahin ho sakte the parantu vahan se bhagne aur mukt hone ki vyakulta se grast hone lage aur kamna karne lage ki koi mujhe is bandhan se mukt karva de.
tabhi hanuman ji ne bhagvan shani ki is prarthana ko suna aur hanuman ji bhagvan shani ko mukt karane ke liye aye aur athak prayason ke bad bhagvan shani ko mukt kara diya. usi samay ravan ne bhagvan shani ke pair ke upar var kar diya, jiske karan shani bhagvan langre ho gaye. tabhi jyotish men kaha jata hai ki shani pradhan vyakti ki chal madamast hoti hai aur kabhi-kabhi aisa mahsus hota hai ki vyakti langra kar chal raha hai. jis samay hanuman ji ne bhagvan shani ko ravan ke bandhan se mukt karaya usi samay bhagvan shani ne hanuman ji ko vachan diya ki aj ke bad se jo vyakti apki puja-archana ya bhakti karega, usko main kabhi bhi tang nahin karunga ya uske dushkarmon ki saja se mukt karte huye saja nahin dunga.
isilie kaha jata hai ki jab bhi koi vyakti shani ki sarhesati, dhaiyya ya dasha ke karan dukh, pira ya kasht bhog raha ho to hanuman ji ki sharan men jaye aur unki bhakti tatha puja-archana kare to shani ke dushprabhavon se bach sakta hai. hanuman ji ki puja-archana aur bhakti ke rup men hanuman chalisa ka path kiya ja sakta hai ya bajrang ban, sanktmochak, hanumanashtak ka path kiya ja sakta hai. iske atirikt niyamit rup se sundar kand ka path bhi hanuman ji ki puja-archana ke rup men hi mana jata hai. iske alava pratyek manglvar ko hanuman ji ko prasad charhayen. prasad ke rup men kya charhayen, is par matantar hai.
samanyatah log bundi ka prasad charhate hain, kuch log kahte hain, hanuman ji bandar ke pratirup hain aur bandron ki sena ke pramukh the aur kyonki bandar ko bundi se adhik kela khana pasand hota hai, to isilie hanuman ji ko bundi ke sthan par kele ka bhog lagana adhik shubh hai. iske atirikt gur, chana, besan ke laddu ya koi bhi anya mishtann ka bhog lagaya ja sakta hai. hanuman ji ki puja kab tak karna chahiye. iska nirnay is prakar karen ki jab tak shani ki dasha chale ya shani ki sarhesati ya shani ki dhaiyya chale tab tak to avashyak rup se puja-bhakti karni hi chahie. yadi isko ajivan kiya ja sake to aur bhi adhik shubh hai.
vishesh taur par ghar ke mukhiya ko to ajivan hi karna chahie kyonki parivar men kisi n kisi sadasya ke upar shani ki sarhesati, shani ki dhaiyya ya sarhesati chal hi rahi hoti hai aur parivar ke mukhiya hone ke nate parivarik sukh-samriddhi evan shanti ka uttaradayitva ghar ke mukhiya par hi parta hai. aisa bhi kaha jata hai ki jyotishiyon ko kabhi bhi shani ki sarhesati, dhaiyya ya dasha gochar prabhavit nahin karta kyonki aisa mana jata hai ki jab jyotishi kisi jatak ko shani ki dhaiyya ya sarhesati ke karan shani ki puja karne ke liye kahta hai aur jab jatak us puja ko karta hai to uska 10 pratishat labh panditon ko bhi mil jata hai. isliye panditane ko shani kabhi pareshan nahin karta hai.