vartaman samay men bhautikvadi vichardhara se puri duniya prabhavit hai. aj har vyakti ati mahattvakanksha ka shikar hai tatha sabki yahi abhilasha hoti hai ki jivan men har sukh ka upbhog karen chahe yogyata ka star jo kuch bhi ho. isi soch ne pati/patni donon ke atmanirbhar hokar arthik uparjan ke lie karya karne ki paripati ko janm diya hai taki ghar grihasthi sukhamay chale tatha kabhi arthabhav mahsus n ho. iske achche-bure donon pahlu hain. ek or to pati-patni donon ki sammilit ay se jivan men har bhautik sukh prapt hota hai tatha paise ki kabhi kathinai upasthit nahin hoti to dusri or iska dushprabhav yah hai ki patni ko ghar evan bahar karya sanpadit karne ki dohri jimmevari se do-char hona parta hai.
aisi sthiti men kai bar ye dohra dabav evan tanav nahin jhel patin tatha iska hashra larai-jhagre, tanav, parivarik vikhandan ke rup men ati bhayavah hota hai. atah isse bachne dae. manoj kumar ke lie avashyak hai ki jivnsathi ke chunav men satarkata barti jay. fengshui men anek tarike batae gae hain jo ati upyogi hain tatha inke anupalan se manonukul jivan sathi prapt ho sakte hain jiske sath jindgi sauhardapurn evan samanjasyapurn chal sakti hai. inhin tarikon men se ek hai tatvik anukulta ke anusar jivnsathi ka chayan jiska vivechan is alekh men kiya ja raha hai. agni-agni agni tatva vale log ati utsahi evan rachnatmak ravaiye ke sath hi ashavadi hote hain. agni tatva ke do logon ka apsi sanbandh kafi gahra hota hai.
agni tatva ka ek sathi agni tatva ke dusre sathi ki achchi visheshtaon evan gunon ko ujagar karne men kafi sahayta karta hai. donon ki jori ati uttam hoti hai evan donon men gahra pyar, sauhard, sahishnuta hoti hai tatha ye kabhi ek-dusre se nahin thakte. agni-prithvi agni evan prithvi ki jori bhi kafi achchi evan sangat jori hoti hai. donon sathi sadaiv ek dusre ka utsahavarddhan karte rahte hain tatha sakaratmak prashansa se manobal barhate rahte hain. agni ki uchch kalpanashakti prithvi ki sanvedna ke sath milakar ati safal jori ka nirman karti hai jo har star par safal hoti hai tatha milakar sukh, samriddhi evan saflta ka marg prashast karti hai. agni-dhatu agni men dhatu ko gala dene ki kshamata hoti hai, atah yah sanbandh anukul nahin hai. dhatu tatva vale apne vichar agni tatva valon par thopne ki koshish karte hain jiski parinti hanikarak hoti hai.
is karan se agni tatva valon ka ahan dhire-dhire dhatu tatva valon par havi hokar use samapt kar deta hai. yadi kisi karanavash aisi jori ban hi gai hai to sanbandhon ki nakaratmakata khatm karne ke lie danpatti ko dakshin-purva disha men ek mitti ki murti, bina jal vale parvat ki tasvir tatha dhatu ka hara piramid rakhna chahie. agni-jal agni evan jal parasparik shatru hain tatha donon ek-dusre ki gati ko mand karte hain atah yah sanbandh kafi duruh hai evan tyajya hai. yadyapi ki jal tatva vala vyakti agni tatva vale ki srijnshilta, rachnatmakata evan urja ki vriddhi men saksham hai tatha dusri or agni tatva vale men jal tatva valon ko prerna pradan karne ki yogyata hai.
in sabke bavjud donon ek-dusre ke samaksh apni antrik evan antrang bhavnaon ko prakat karne men saksham nahin hain. aise to aisi jori banni hi nahin chahie kintu yadi ye danpatti ban hi gae hain to sanbandhon ki katuta ko dur karne evan prempurn sanbandh sthapit karne ke lie inhen ghar men kashth tatva ki vastuen rakhni chahie. ghar ke dakshin-purva men abhimantrit ashtakoniya piramid evan hare paudhe rakhna bhi labhkari sabit hoga. agni-kashth agni evan kashth tatva ke logon ke sanbadh upyukt evan sangat hain. kashth tatva vale agni tatva valon ki adhirta ko niyantrit kar unhen sthayitva pradan karte hain. agni tatva vale apni urja evan utsah se kashth tatva valon ke lie utprerak banakar unka tab tak utsahavarddhan karte hain jab tak ki vah saflta ki sirhi n par kar le. donon hi ati ashavadi hote hain tatha sadaiv nae vicharon evan avdharnaon ki talash men rahte hain. prithvi-prithvi yah sanbandh ati sakaratmak hai
kyonki donon sathi samaj men uchch haisiyat banane ke lie hamesha ek-dusre ki apekshaon, akankshaon evan avashyaktaon ka dhyan rakhte hain. dusre logon ko inka sanbandh fika evan udasin najar a sakta hai kintu yatharth men inka sanbandh kafi gahra, majbut evan bhavuk hota hai. chunki donon hi jiddi hote hain islie samasyaen inke bich bhi hoti hain kintu ek-dusre ke prati asim pyar evan achchai ki bhavna ke karan ye in asthayi samasyaon par asani se nijat pa lete hain. prithvi-dhatu yah mel ati uttam hai kyonki donon sathi ek-dusre ko sahyog evan samman dete hain tatha unke karyon ki prashansa karte hain. dhatu tatva vale log prakritik rup se ati dhairyavan hote hain isilie yah sanbandh chirasthayi hota hai kyonki prithvi tatva vale nirnay lene men kafi der karte hain tatha intjar karvate hain.
dhatu tatva vale prithvi tatva valon ko ashcharyachkit karne vale avasar pradan karte hain, dusri or prithvi tatva vale dhatu tatva ke apne sathi ke arthik mamlon ki behatar prabandhan karte hain taki yah sanbandh arthik rup se bhi sudrirh ho. prithvi-jal yah sanbandh ati dushkar hai atah purnataya tyajya hai. donon sathi sadaiv ek-dusre ki bhavnaon ko ahat karte rahte hain. yadyapi ki prithvi tatva vala sathi jal tatva vale ko sthayitva pradan karta hai jiska ki usmen abhav rahta hai. kintu prithvi tatva vale ka jiddi svabhav bhavuk jal tatva vale sathi ka dil torta rahta hai. parinam svarup apas men prem evan samanjasya nahin rahta. yadi ye danpatti ban hi gae hain to tanav ko kam karne hetu inhen ghar men dhatu ki vastuen rakhni chahie. pashchim evan uttara-pashchim men vind chaim lagana tatha dhatu ki murti lagana bhi ati labhdayak hota hai. prithvi-kashth prithvi evan kashth ka apsi sanbandh upyukt nahin hai.
kashth prithvi ke sanpark men ane par shaktihin ho jata hai, atah yah sanbandh nibhana kathin hai. halanki ek or jahan prithvi sthir, santulit evan chaikanna rahti hai vahin dusri or kashth unnatishil, milnsar evan mulyavan hai. atah is sanbandh men yadi donon sathi ek-dusre ki burai evan kami nikalne ki bhavna ka parityag kar sahyogi ravaiya apnaen to is sanbandh ko safal bana sakte hain. is sanbandh ko madhur evan pragarh banane ke lie danpatti agni tatva ki vastuen ghar men lagaen. draing rum ki dakshini divar par finiks ke chitra tatha abhimantrit lal piramid lagana bhi ati labhdayak hai. dhatu-dhatu yah sanbandh ati upyukt evan shaktishali hai kyonki donon sathi ek dusre se agadh prem karte hain. yada-kada inhen bhi apne sanbandhon men utar-charhav ka samna karna par sakta hai
kintu shighra hi mil-baithakar apsi batchit ke dvara ye apsi samasyaen suljha lete hain. dhatu-jal yah sanbandh ati uttam evan shaktishali hai jismen donon sathi sadaiv ek dusre ki sahayta karte hain. donon sathi atmabodh, antaprragya evan bhavnaon se nirdeshit hokar achetan star par bhi vicharon evan bhavnaon ka adan-pradan karne men saksham hote hain. dhatu tatva vala sathi jal tatva vale sathi ko yah samjhata hai ki use jaldi kisi ke bahkave men nahin ana chahie tatha donon ko milakar tatha soch-samajhakar har nirnay lena chahie. dusri or jal tatva vala sathi dhatu tatva vale sathi ko yah samjhata hai ki uchit samay par uchit nirnay lena avashyak hai tatha samay ki gati ke sath hi age barhne men samjhdari hai. dhatu-kashth yah sanbandh ati mushkil evan kashtakari hai kyonki donon sathi ek-dusre par havi hone ki koshish karte hain
tatha ek-dusre ki bhavnaon ki kadra nahin karte. kashth tatva vala sathi yadyapi ki apne sathi ka sath pane ke lie samjhauta bhi karne ko taiyar rahta hai kintu dhatu tatva vala sathi vichar men samanjasya n hone ke karan akela rahna pasand karne lagta hai jo ki samajik evan milnsar kashth tatva vale sathi ke lie anttah nirasha ka karan banta hai. jal-jal inko dekhakar aisa pratit hota hai mano inki jori svarg men bani ho. donon sathiyon ke bich asim evan agadh prem hota hai tatha donon ek dusre ki avashyaktaon evan akankshaon ko bhali-bhanti samjhte hain. donon ek-dusre par kafi vishvas karte hain tatha ek-dusre ka samman karte hain.
jal-kashth yah sanbandh kafi sakaratmak tatha uchch koti ka hota hai. donon sadaiv jivan men unnati ke drishtikon se ek-dusre ki sahayta karte hain tatha mushkil ghari men sath khare hote hain. jivan men apne lakshya ki prapti ke lie donon sathi ek-dusre ka utsahavarddhan karte rahte hain. donon hi sanbandh ke prati imandar, adarshavadi evan siddhantvadi hote hain. donon ke bich gahra bhavnatmak lagav hota hai jo nirantar vikas evan unnati ka marg prashast karta hai. kashtha-kashth yah sanbandh atyadhik sakriya evan tarkasangat hota hai.
kashth tatva vale log prayah ati vyast evan sakriya rahte hain tatha har karya karne ki unki ichcha hoti hai. donon sathi yadi kashth tatva ke hi hote hain to ek-dusre ke lie prernasrot ban jate hain tatha bare se bara kam milakar asani se kar lete hain. donon sathi vyaktigat abhiruchi ke kshetron men ek-dusre ki sadaiv sahayta ke lie tatpar rahte hain. yah jori ati safal hoti hai.