janm kundli ka saptam bhav multah vivah se sanbandhit hai. anya bhav hain - dvitiya bhav (dhan aur parivar) chaturth bhav (sukh shanti), pancham bhav (santan), ashtam bhav (mangalya) tatha dvadash bhav (shaiyya sukh). in bhav tatha bhavesh par shubh grahon ka prabhav, ashubh grahon ka dushprabhav, jatak ke vaivahik jivan par prabhav dalta hai. brihaspati, shukra, nishkalank budh tatha pakshabali chandrama ko naisargik shubh grah aur surya ko krur grah mana gaya hai.
parantu shubh grah bhi janm kundli ke trik (6, 8, 12) bhav men sthit hone par ashubh fal dete hain. anya papi grahon ki apeksha apne ugra, krur, laraku aur krodhi svabhav ke karan mangal grah ki vivah aur usse sanbandhit bhavon men sthiti athva un par dushprabhav se vivahoprant parivarik klesh v duahkh se lekar pati athva patni ki mrityu tak sanbhav ho sakti hai. aisi sthiti ko ‘mangal dosh’ ki sangya di jati hai. chaturth, saptam aur ashtam bhav men mangal ki sthiti se bana ‘mangal dosh’ sarvadhik anishtakari hota hai.
atah ‘ashtakut milan’ ke samay 36 gunon men adhik se adhik gun milne ke atirikt mangal dosh samya hona param avashyak mana gaya hai.
‘mangal dosh ka prabhav lagn se 100 pratishat chandrama se 50 pratishat tatha shukra se 25 pratishat hota hai. dosh samya vichar tinon prakar se karna chahie. ‘mangal dosh’ ka mul srot prachinatam jyotish granth brihat parashar hora shastra (a.82) men is prakar milta hai. lagn vyaye sukhe va'pi saptame va ashtame kuje. shubh drigyog hin ch yatin hanti n sanshyah.. arthat, ‘‘yadi mangal bina shubh prabhav ke pratham, dvadash chaturth, saptam athva ashtam bhav men (stri ki kundli men) ho to uske pati ki avashya hi mrityu hoti hai.’’ agle shlok men ve kahte hain:
yasmin yoge samutpanna pati hanti kumarika. tasmin yoge samutpanno patni hanti naro'pi ch.. arthat ‘’jis grah yog men stri ke pati ki mrityu hoti hai, purush ki kundli men vahi yog hone par uski patni ki mrityu hoti hai.’’ maharshi parashar ke anusar ‘mangal dosh’ stri aur purush ki kundli men saman rup se prabhavi hota hai. aise mangal par shubh prabhav n hone se pati/patni ki mrityu ho jati hai. ‘mangal dosh’ parihar ke sanbandh men margadarshan karte hue maharshi parashar kahte hain:
stri hanta parnita chet pati hantri kumarika. tada vaidhavyayog bhanno bhavti nishchayat.. arthat ‘‘yadi vidhur yog vale vyakti ka vaidhavya yog vali stri se vivah kiya jay to nishchay hi yah yog bhang hota hai.’’ arthat pati/patni kisi ki bhi mrityu nahin hoti. yahan yah samjhna avashyak hai ki donon kundliyon men dosh samya hone par pati athva patni ki mrityu nahin hoti hai. parantu sukhi dampatya jivan ke lie stri ki kundli men pati karak brihaspati tatha pati ki kundli men patni karak shukra ka balvan hona tatha saptam bhav (vivah v dampatya sukh) tatha saptamesh par shubh grahon ka prabhav (yukti ka drishti) hona vanchit hota hai.
dakshin bharat men mangal ki dvitiya bhav men sthiti bhi ‘mangal dosh’ ka nirman karti hai. yadyapi maharshi parashar ne keval ek hi sthiti men ‘mangal dosh’ ka nishkriya hona bataya hai, parantu bad ke ‘muhurt granthon’ ne is dosh parihar ke anek sutra batae hain.’’
jaise -
1. mangal kark aur sinh lagn ke lie yog karak hone se mangal dosh nahin rahta.
2. mangal apni rashi (mesh v vrishchik), uchch rashi (makr) tatha dhanu, kunbh aur min rashi men sthit hone par ashubhkari nahin hota.
3. adhik ‘gun milan’ hone par ashubhkari ‘mangal dosh’ nishkriya ho jata hai.
4. mangal ke rahu ya shani ke sath hone par mangal dosh nasht hota hai tatha ‘’mangal dosh’’ 28 varsh tak tatha mangal dasha men, vishesh prabhavi hota hai. parantu yah sutra anubhav men khare nahin utrte. ‘mangal dosh’ jivan men kabhi bhi prabhav dikha sakta hai.
is sandarbh men bhagvan shriram ki kundli ka avlokan karen. unka kark lagn hai aur usmen brihaspati aur chandra sthit hain tatha saptam bhav men yog karak mangal sthit hai. us par rahu ki pancham drishti hai. ‘mangal dosh’ ne prabhav dikhaya. pahle banvas ke karan dampatya sukh badhit hua aur ayodhya vapis lautne par dhobi ki tippani sunakar patni ka parityag kar diya.
shrimti menka gandhi ki bhi kark lagn ki kundli men ashtam bhav (kunbh rashi) men sthit mangal ke prabal ‘mangal dosh’ prabhavasvarup vah 24 varsh ki ayu men hi, shukra dasha-budh bhukti (julai 1980) men vaidhavya ko prapt huin. mangal dasha unke jivan men jun 1999 se jun 2006 tak ayi. isi prakar shrimti soniya gandhi ki kundli bhi kark lagn ki hai.
mangal unki chandra rashi se saptam bhav (dhanu rashi) men hai. mangal dosh ka prabhav 44 varsh ki ayu men shani dasha rahu bhukti (mai 1991) men ghatit hua aur unke pati shri rajiv gandhi ki hatya ho gai. lekhak ke pas sadharan star ke jatk/jatikaon par mangal dosh ka vibhinn ayu men anishtakari fal darshati anek kundliyon ka sangrah hai.
sath hi is bhranti ko bhi dur karna avashyak hai ki shani v rahu ki mangal par drishti v yuti ‘mangal dosh’ ko nasht karti hai. vastav men yah sthiti ‘karela aur nim charha’ kahavat ke anusar prabal anishtakari ho jati hai. sarvavidit hai ki mangl-rahu ki yuti ‘angarak yog’ aur mangal, shani ki yuti ‘dvandva yog’ namak anishtakari yogon ka nirman karti hai. atah maharshi parashar dvara pratipadit mangal dosh nivaran vidhi ka hi anusaran karna upyukt hai.
kundli ke barah bhavon men se chah bhav (1, 2, 4, 7, 8, 12) men mangal ki sthiti hone se adhi jansankhya ‘mangal dosh’ se prabhavit rahti hai. atah thore se prayas se ‘mangal dosh’ vale var/ kanya ko ‘mangal dosh’ vala suyogya jivan sathi mil sakta hai.
donon kundliyon men ek se bhav men mangal sthit hone par bhi bhed ki sthiti ke karan mangal dosh men purn samya prayah nahin hota.
atah lagn, chandra rashi tatha shukra se lagabhag dosh samya hone tatha saptam bhav aur saptamesh par shubh prabhav hone se vivah safal rahta hai. parantu ek ‘mangal dosh’ vale yuvak ya kanya ka bina dosh vale kanya ya yuvak se vivah karke unke dampatya jivan ko kashtakari nahin banana chahie.