manushya ki pragti ke sath-sath uske khan-pan aur dinacharya men aniyamittaon ke karan hone vali vikritiyan use rogagrast banati hain. prakriti in sanbhavnaon ko pratyek manushya ki hatheli men samay se pahle chetavni svarup ankit kar deti hai. isko janne ke lie thore antral se ek kushal hastarekha visheshagya dvara apni hatheli ka akalan karvakar margadarshan prapt karna chahie. jinka svasthya nirbal ho, ve to vishesh rup se samy-samay par apni hatheli ka akalan karva kar rogon ki achchi buri pragti ko janakar, unke nivarak upay karen. ek svasth vyakti ki hatheli sundar, gulabi, chikni, mansal, narm aur sudrirh hoti hai.
nakhun bhi chaire, gulabi v sundar hote hain aur unke mul men ardhachandra hote hain jo svasth rakt sanchar ke dyotak hote hain. unki anguliyon ke nieche parvat (mansal paid) aur hatheli bhi bich men dabi nahin hoti. hatheli ki mul rekhayen (jivan, bhagya, mastishk, hriday v surya) apne sahi sthan men lanbi aur ek si gahri hoti hain. hatheli ka rang ek sa gulabi hota hai. rekhaon par ashubh chihna-kraes, bindu, dvip, janjir, jal adi nahin hote. bahut rekhaon ka makrjal bhi nahin hota. aisa vyakti sari jindgi svasth rahta hai. iske viprit ek asvasth vyakti ki hatheli bedaul, khurdri aur safedi lie hoti hai. hatheli moti, anguliyan moti aur sidhi nahin hoti. nakhun mote aur nile-safed rang ke hote hain jo dhimi gati se rakt ka sanchar darshate hain aur vyakti ki asvasthata ke suchak hote hain. hatheli adhik garm ya thandi hoti hai. hatheli aur parvaton par jal aur dvip hote hain. hatheli pilpili aur rekhayen bejan hoti hain. in par bhi kraes, dvip, bindu aur janjir ke ashubh chihn hote hain. ek bimar vyakti ki hatheli ka chitra pathkon ke avloknarth sanlagn hai.
ismen:
1. anguliyan, hatheli men nichi-unchi juri hain. hatheli safedi lie hai.
2. brihaspati aur budh anguliyan choti hain. brihaspati parvat par ari rekhayen hain. donon parvaton par jal ka chihn hai jo unki shubhta ko nasht karta hai. vyakti pet v shvans rogagrast hota hai.
3. angutha patla aur chota hai. uske hatheli ke jor par terhi rekha hai, jo atmavishvas ki kami aur rogon se larne ki kshamata ki kami darshata hai. sath hi dhan v santan sukh kam rahta hai.
4. hriday rekha ke aranbh men janjir hai aur usse niche ki or shakhayen nikal rahi hain jo hriday ki durbalata ka suchak hai. shani parvat ke niche dvip aur us par shani parvat se niche ati rekhayen drishti ki nirbalata darshati hai. ant men vah brihaspati parvat ke jal men milti hai jo hriday ka barhna darshati hai aur hridy-aghat ki sanbhavna rahti hai.
5. mastishk rekha v jivan rekha kafi dur tak juri hai aur aranbh men in par janjir v dvip hai. age chalakar usapar bindu, khari rekhayen aur kraes hain. ant men vah chandra parvat par guchche men badal gai hai aur jal men milti hai. yah aranbh men sardi-jukam, jivan ke madhya se sir men chot, kamjori aur ant men mutra v kidni rog darshati hai. jatak men manobal ki kami hoti hai aur vah udas rahta hai.
6. jivan rekha aranbh men kafi dur tak mastishk rekha se juri hai aur usmen janjir aur dvip hai. bich men dvip ko shukra parvat se ati rekha milti hai aur dusri rekha jivan rekha aur mastishk rekha ko katti hui bhagya rekha ko katti hai. bhagya rekha bhi manibandh ke kafi dur se aranbh hoti hai aur hriday rekha tak hi pahunchti hai. bachapan men bimar rahne ke karan, buddhi v vishvas ki kami se usne kafi adhik ayu men karya aranbh kiya aur adhik ayu tak karyarat nahin rah paya. surya rekha n hone se bhi jivan men dhan, man nahin mila.
7. jivan rekha ke niche mangal parvat par jal hai aur usmen se ek rekha hriday rekha ke dushit bhag men milti hai tatha anya rekhayen hriday rekha ko katakar budh parvat tak pahunchti hain. yah hriday aur snayu pranali ke rog darshati hai.
8. ek svasthya rekha chandra parvat se budh parvat tak jati hai jismen mastishk rekha ko katte samay dvip hai. yah upri bhag se chati ka aur niche vale bhag se pet ka rog darshati hai. us par (dvip ke upr) bindu bhi hai jo gala aur jvar dvara sharirik kasht darshata hai.
9. dusri svasthya rekha budh parvat par jal ko jivan rekha se jorti hai jo pet aur snayu rog darshati hai. uske jivan rekha se milne ke bad bindu hai jo bukhar darshata hai aur uske bad men jivan rekha se niche ki or shakhayen nikal rahi hain jo dhalti umra men sharirik nirbalata ki dyotak hain.
10. chandra parvat par kraes, dvip aur jal kidni aur mutra pranali ke rog darshati hai. stri ki hatheli men yah uski prajanan pranali ko rogi banati hai, jisse vah sharirik aur mansik nirbalata ke karan kasht pati hai. yah avashyak nahin ki pratyek vyakti ki hatheli men sabhi lakshan honge. ashay yah hai ki jo dosh honge vyakti un rogon se pirit rahega. ajakal vatavaran men adhik pradushan chinta ka karan ban gaya hai aur prashasan usko kam karne ke lie purn prayasarat hai. is vayu pradushan ke karan shvans aur chati ke rogon men vriddhi ki khabren aur ankre dainik samachar patron men vishesh rup se prakashit kiye ja rahe hain. yah bhi satya hai ki sabhi vyakti ek prakar ke rog se grasit nahin hote. yah unki rog pratirodhak shakti par nirbhar hota hai. is sanbandh men vibhinn gala aur shvans rogon ki sanbhavna darshati hatheli ka chihn sanlagn hai jiske gyan se yathochit pratirodhak upay kar sabhi labh utha sakte hain.
is chitra men: -
1. hriday rekha ka brihaspati parvat se lekar shani parvat ke niche janjir jaisi ho jana vyakti ke fefrane men lanbe sankraman rahne se ti. bi. ki sanbhavna darshata hai.
2. brihaspati parvat par leta ‘yav’ chihn ke sath ari -terhi rekhayen v jal gale men sujan v kanthmala aur shvans sankraman se ‘nimoniya’ ki sanbhavna darshata hai.
3. svasthya rekha par mastishk rekha ko katne ke sthan par upar v niche dvip hona shvans ki bimari ka lakshan hai.
4. upar mangal parvat par jal gale ke rog darshata hai.
5. jivan rekha ke niche mangal parvat par jal v kata-fata hona bhi gale ka rog darshata hai.
6. shani parvat ke niche mastishk aur hriday rekha ke bich kam duri ‘asthama’ ka lakshan hoti hai.
7. jivan rekha v mastishk rekha ka udgam sthan se kuch duri tak janjir ki tarah bana hona bachapan men sardi-khansi v nirbal svasthya darshata hai. kuch duri tak unka jura hona iski pushti karta hai.
8. jivan rekha ke andar ki or uski sahayak v rakshak mangal rekha bhi nahin hai.