sachin tendulakar yashakaran sharma sitaron ki kahani sitaron ki jubani stanbh men ham janmapatriyon ke vishleshan ke adhar par yah batane ka prayas karenge ki kaun se grah yog kisi vyakti ko saflta ke shikhar tak le jane men sahayak hote hain. yah stanbh jahan ek or jyotirvidon ko grah yogon ka vyavharik anubhav karaega, vahin dusri or adhyetaon ko shreshth path pradan karega tatha pathkon ko jyotish ki prasangikta, uski arthavatta tatha satyata ka bodh karane men mil ka patthar sabit hoga. apne bis sal ke lanbe kairiyar men sachin ne yah bat sabit kar di hai ki kriket ke maujuda daur men vah benjir hain. is dauran unhonne anek rikord tore, anek khare kie. abhi unke balle ki dhar paini hai - unhen kahan tak le jaegi yah samay ke garbh men hai. lekin fir yah sachin ke sath hi kyon? maidan men to aur bhi ek se ek khilari hain, unke sath kyon nahin? jigyasa svabhavik hai - kaise? aie, janen prastut alekh men... pakistan ke karachi stediyam men jab ek 15 varshiya balak bharat v pakistan ke madhya khele ja rahe test maich men khelne ke lie utra, to kisi ne socha bhi nahin tha ki vah is yug ka mahanatam kriket khilari banega.
sachin tendulakar ne kriket men itne adhik kirtiman sthapit kar die hain ki unhen sachin ramesh tendulakar ki bajay sachin rikord tendulakar kahen to ismen koi atishyokti nahin hogi. inhen kriket ka shahanshah, kriket ka bhagvan adi namon se bhi jana jata hai. kriket jagat men inki lokapriyata svabhavik hai. test maichon men sarvadhik shatak thokne ka rikord tendulakar ke nam hai. tendulakar n keval test kriket men, apitu ek divsiya kriket men bhi sarvashreshth hain. maujuda daur ke khilariyon men samast vishva se keval ek nam jo braidmain ekadash men shamil hai vah sachin ramesh tendulakar ka hai. abhi hal hi men astreliya ke viruddh khelte hue tendulakar ne kriket men 20 varshon ke lanbe kairiyar ko pura karte hue ek aur shatak banakar ek divsiya kriket men 17000 ranon ka vishal pahar khara karke yah sabit kar diya ki abhi bhi unke andar kafi lanbe samay tak kriket khelne ki kshamata hai. sabse adhik shatkon v ranon ke atirikt 90 se 99 ranon ke bich sabse adhik ran banane ka rikord bhi inhin ke nam hai. ek divsiya maichon men inhen 56 bar main auf d maich ka puraskar mila jo ek rikord hai. inhen sarvadhik 14 bar main auf d sirij chuna gaya. main auf d maich men sarvadhik ausat ka rikord inhin ke nam hai. sachin ek divsiya kriket men 10,000 v 15000 ranon ka ankra par karne vale vishva ke pahle khilari hain. 2007 ke vishva kap men inhonne sarvashreshth ausat 59.87 se sarvadhik 1796 ran banae. unhen vishva kap men sab se adhik main auf d maich ka puraskar mila.
1996 ke vishva kap men inhonne 87.16 ki ausat se sarvadhik 523 ran aur fir 2003 ke vishva kap men sarvadhik 673 ran banae. 2003 ke vishva kap men to inhen sarvashreshth khilari ka puraskar bhi mila. ek divsiya maichon men sab se adhik arddh shatkon ka rikord bhi inhin ke nam hai. is tarah, test kriket ke sarvochch samman, upalabdhiyan v rikord sachin ne apne nam kar lie. sachin tendulakar ki lanbi rikard buk par najar dalen to bahut ashcharya hota hai. gat 20 navanbar 2009 ko sachin ne 43 van test shatak banakar van de aur test maichon men ranon ke yog ko 30,000 tak pahunchakar ek naya asman chu liya. itni pratibha, itna samman, itni lokapriyata kaise? aie janen jyotish ke aine se... sachin ramesh tendulakar ka janm 21 aprail 1973 ko munbai men hua. lagn kanya hai, jo pratiyogita, pariksha v khel jagat men saflta ke lie uttam mana gaya hai. parakramesh mangal ka uchch rashi men hona vishesh mahatvapurn hai, kyonki mangal svayan parakram ka naisargik karak grah hota hai. mangal ki is sthiti ke falasvarup tendulakar ko khel men apna utkrisht parakram dikhane men saflta mili. sachin tendulakar ki advitiya pratibha ka karan unki kundli men ashtam bhav ke rajyog ka hona hai. kundli men ashtam bhav men shubh grah shukra v uchch rashisth surya ke sthit hone ke atirikt ashtamesh ashtam bhav par drishti dal raha hai.
ashtamesh svayan bhi uchch rashisth hai. ashtam bhav se sanbandhit sabhi pakshon ke purnataya bali v sakaratmak hone ke karan inke andar gupt v ishvariya shakti vidyaman hai, jiske falasvarup inmen advitiya pratibha v adbhut urja ka samavesh ho gaya, kyonki jyotish men ashtam bhav ko gupt shakti ka srot mana jata hai. ashtam bhav ke atirikt ashtam se ashtam arthat tritiya bhav ka svami bhi uchch rashisth ashtamesh mangal hi hai. ashtam (gupt shakti) v tritiya bhav (parakram) ka bali hona hi inki saflta ka sabse bara karak hai. jyotish men siddhant hai ki mangal aur guru ki yuti jatak ko lauhpurush bana deti hai. inki kundli ke pancham bhav men mangal aur guru ki yuti hone ke falasvarup inhen sharirik kshamata ke sath-sath mansik v atmik bal pradan kar rahi hai. tendulakar ne antarrashtriya kriket men san 1989 men kadam rakha, jab un par dasham bhav men sthit ketu ki dasha prabhavi thi. varsh ke uttararddh men dasham bhav v ismen sthit ketu par shani v guru ka gochriya prabhav a jane se inhen vishesh samman v khayati mili. varsh 1990 men bhi isi prakar ka grah yog bana raha, jiske parinam svarup inhonne test kriket men apna pahla shatak banaya. atma ke sthir karak surya tatha char karak mangal ke uchch rashisth hone ke falasvarup tendulakar mansik rup se vishesh urjavan v parakrami hain.
janvri 1991 se in par dvitiyesh v bhagyesh shukra ki mahadsha praranbh hui, jo ashtam bhav men uchch rashisth ashtamesh se drisht hai tatha dhan bhav ko dekh raha hai. surya aur mangal ki sahayta se yah shukra ashtam bhav ke rajyog ka nirman kar raha hai. jyotish men siddhant hai ki jo bhav apne svami grah ya shubh grah se yukt va drisht ho, athva uchch rashisth grah se yukt ho, us bhav ki vriddhi hoti hai. is prakar shubh grah shukra ne inki takniki v shaili ko aur adhik parishkrit kar diya. ashtam bhav ka rajyog jatak ko aishvaryashali bhi banata hai. dashanath shukra ki dhanesh hokar dhan bhav par drishti ke falasvarup tendulakar ko shukra ki dasha men prachur matra men dhan labh hota raha. shukra ki yah dasha un par abhi janvri 2011 tak chalti rahegi. navanbar 2011 ke bad inke dhan bhav, dhanesh, bhagyesh v surya par gochriya guru aur shani ka sanyukt prabhav hoga. is prakar us samay inhen aur bhi adhik dhan labh hoga. sath hi in par viprit rajyog karak uchch rashisth surya ki mahadsha bhi praranbh hogi, jo inhen akshay kirti pradan karegi. 09 sitanbar 1994 men inke dhan bhav men gochar men guru, chandra, shukra v rahu sthit the.
gochar men lagnesh budh uchch rashisth tha. gochar ka mangal dasham men tatha shani lagn se chathe bhav men sthit tha. is din tendulakar ne ek divsiya antarrashtriya kriket maich men apna pahla shatak banaya. varsh 1998 men shukra ki mahadsha tatha mangal ki antardasha ke samay tendulakar ne lagatar tin shatak banae. varsh 1999 men nich ke shani ke ashtam bhav par gochar ke samay tendulakar ko pith ka dard rahne laga tatha vishva kap ke dauran inke pita profesar ramesh tendulakar ka dehant ho gaya. 23 agast, 1999 tak varsharanbh se hi gochar ke mangal v shani ke bich paraspar drishti yog bana hua tha, jiska prabhav ashtam bhav par pratikul tha tatha pita ke karak surya v pita ke bhav svami (navmesh) shukra bhi is pratikul gochriya prabhav se pirit the. aprail 1998 se varsh 2000 tak shani nich rashisth hokar ashtam bhav ko prabhavit karta raha. is samay tendulakar ko pith dard hua, pita ki mrityu hui, inhen bhartiya kriket tim ki kaptani saunpi gai lekin kaptan ke rup men asafal rahe, inki tivra alochna bhi hui aur anttah iranhonne kaptan ka pad chor diya. varsh 2001 men shani v guru ka gochriya prabhav inke bhagya bhav men hua aur inhonne fir se safal vapsi ki. inke lie 2002 ka varsh bhi shubh raha. 2003 ke vishva kap men inhonen 673 ran banae aur inhen main auf d sirij ka puraskar mila. is prakar varsh 2003 men tendulakar ke lie shani ki dasham bhav men dhaiya tatha gochar ke guru ka uchch rashisth hokar janmakundli ke labh bhav, labhesh, parakram, dasham se dashmesh lagnesh v dashmesh ko prabhavit karna atyant labhkari siddh hua.
2003 se 2008 tak tendulakar ka pradarshan lagatar shreshth hota gaya aur inhonne anek kirti stanbh arjit kie. varsh 2009 men tendulakar ke bemisal pradarshan se sabhi ashcharyachkit hain. is samay gochar m chandra se gyarhven bhav men hone ke karan shani shreshth hai tatha janm lagn, lagnesh v dashmesh budh sabhi ko prabhavit kar raha hai. yadi kundli men shreshth yog hone ke karan kundli vishesh balvan ho jae to pratikul dashaen jatak ko adhik hani nahin pahuncha saktin tatha shreshth dashaen v shreshth gochar jatak ko bulandi ke shikhar par pahuncha sakta hai. varsh 2011 ke uttararddh ki gochriya sthiti ka tatha us samay ki mahadsha ka vishleshan karne se pratit hota hai ki kriket ka yah mahanayak abhi aur karishme dikhaega. jyotish gyan ashtam bhav ke rajyog se gupt gyan, advitiya pratibha v aishvarya ki prapti hoti hai. shani ke gochar men shreshth hone ki sthiti men lagn, lagnesh aur dashmesh tinon ke prabhavit hone par vishesh khayati labh hota hai. rajyog men sahayak grah ki mahadsha vishesh labhkari siddh hoti hai - jaise prastut kundli men shukra ki. shani aur mangal ka paraspar drishti yog anishtakari siddh hota hai - jaise tendulakar ki kundli men 1999 ke varsharanbh se agast tak ke gochar men. nich ke shani ka lagn se ashtam bhav men gochar kasht, asflta, svasthya sanbandhi pareshani tatha manhani karvata hai. anek nich v uchch grah patri men nich bhang rajyog banate hain.