alabart ainstain sitaron ki kahani sitaron ki jubani stanbh men ham janmapatriyon ke vishleshan ke adhar par yah batane ka prayas karte hain ki kaun se grah yog kisi vyakti ko saflta ke shikhar tak le jane men sahayak hote hain. yah stanbh jahan ek or jyotirvidon ko grah yogon ka vyavharik anubhav karaega, vahin dusri or adhyetaon ko shreshth path pradan karega tatha pathkon ko jyotish ki prasangikta, uski arthavatta tatha satyata ka bodh karane men mil ka patthar sabit hoga. mahan vaigyanik alabart ainstain ki mastishkiya prakhrta ka samast sansar kayal hai. unhonne taim, spes aur kanjekshan par anek adbhut thyuriyan di hain. sharir shastriyon ne inse sanpark kiya aur janna chaha aur sahyog bhi manga ki inki vilakshan bauddhik kshamata ka kya rahasya hai. ainstain ne keval itna kaha, ''apne karya ko mahatvapurn manna aur usmen saman rasasvadan karte hue tanmay ho jana hi vah upay hai jise apnakar koi bhi vyakti sadharan se asadharan ban sakta hai.''
alabart ainstain ka janm 14 march 1879 ko subah 11:30 baje ulm, jarmani men hua. yah ek mahan vaigyanik, darshanik aur lekhak the, jinhen aj tak ka sarvadhik prabhavshali vaigyanik aur buddhijivi vyakti mana jata hai. inhen adhunik bhautik vigyan ka pita mana jata hai. inhen 1921 men bhautik vigyan men inki upalabdhiyon ke lie nobal puruskar prapt hua tha. inhonne vigyan par 300 se adhik aur anya vishyon par 150 se bhi adhik pustaken likhin. ainstain ka vivah janvri 1903 men hua. inke do putra hue 1919 men inka apni patni se talak hua. san 1912 men inka ek dusri mahila se prem sanbandh hua aur 1919 men inka usse vivah bhi ho gaya. san 1933 men apni dusri patni ke sath yunaited stetas men sthai rup se rahne hetu chale gae. ainstain ko 1905 men jyurich yunivarsiti se doktar ki upadhi prapt hui.
unke thisij ko ''an e nyu ditarmineshan auf maulikyular daymainshanja'' ka nam diya gaya. is varsh ko inke jivan ka chamatkari varsh kaha jata hai. kyonki inki fotoilaiktrik ifaikt, brauniyan moshan, spaishal riletiviti aur ikvivailens auf maitar end enarji adi mahatvapurn thyuriyon ne inhen vishesh prasiddhi dilai. san 1908 men unhen ubhrta hua vaigyanik mana jane laga aur barlin yunivarsiti men lekcharar ke pad par manonit kiya gaya. varsh 1911 men yah profesar ban gae. 1914 men yah barlin yunivarsiti ke profesar aur ''kesar vilhem instichyut for fijiksa'' ke dayraiktar bane. 1919 men vigyan men apne yogdan ke karan ainstain vishva vikhyat ho gae aur 1920 men inhen nobal puraskar se sammanit kiya gaya. san 1925 men inhen kople medal se bhi sammanit kiya gaya. san 1940 men inhen amerika ki nagrikta prapt hui.
san 1952 men pradhanmantri devid ben guriyan ne inke samne ijrail ka rashtrapti banne ki peshakash kar di lekin inhonne ise thukra diya. san 1955 men 76 varsh ki ayu men inki mrityu ho gai. inki mrityu hone par prinsatan hospital ke thomas stolj harve ne inka mastishk surakshit rakhne ke lie nikal liya taki bhavishya men nyurosains ke anveshan se yah jana ja sake ki ainstain itne buddhiman kaise the? alabart ainstain ki janmakundli ka vishleshn- alabart ainstain ka janm lagn mithun hai jiska svami grah budh buddhi ka karak grah hota hai. yah budh lagnesh hokar, uchcharashi ke panchmesh (buddhi bhav ka svami), buddhi ke adhishthata dev surya tatha pancham se pancham bhav ke svami se sanyukt hokar dasham bhav men sthit hai. is prakar se agar dekha jae to dasham bhav men baithe sabhi grah buddhi ke karak hain. yah sabhi grah pancham bhav ke karak grah guru ki rashi men sthit hain.
bhagyesh v dashmesh ke sthan parivartan se yah kundli aur adhik balvan ho gai hai kyonki rishi parashar ne dasham v navam bhav ke sanbandh ko sarvashreshth rajyog mana hai. uchcharashi ka panchmesh shukra malavya yog bana raha hai aur dasham tatha navam bhav ki uttam sthiti v buddhi ke karak grahon ka pancham bhav ke karak grah ki rashi men baithna tatha is karak grah ka lagn, pancham bhav tatha buddhi ki rashi sinh par drishti dalna inki vilakshan bauddhik kshamataon ka karan hai. dasham bhav men surya se sanyukt chaturgrahi yog tatha bhagyesh v dashmesh ke sthan parivartan ke karan inhen apar yash ki prapti hui. ashtam bhav gurh vidya, risarcha/anveshan adi ka mana gaya hai. is ashtam bhav ka svami balvan hokar dashamasth hai jo svayan bhagyesh bhi hai aur dashmesh ke sath sthan parivartan yog banakar tatha shubh grahon se sanyukt hokar v navansh men uchcharashisth hokar aur adhik bali ho gaya hai tatha ashtam bhav men uchcharashisth mangal hai jo inhen gupt tarkashakti tatha vigyan ke kshetra men risarch karne men nipunta dene men samarth hua.
jyotish men niyam hai ki rahu ya ketu yadi kisi svagrahi ya uchcharashisth grah ke sath baith jae to uska bal char guna barh jata hai. islie inka ashtam bhav men uchch ka char guna bali mangal gyan v risarch ke kshetra men advitiya saflta ka karak bana. inki navansh kundli men panchmesh v bhagyesh ka sthan parivartan yog hai. panchmesh shukra atmakarak hokar dasham bhav men lagnesh, surya v bhagyesh ke sath sthit hokar kundli ko balvan karne men sahayak hua. pancham bhav ka karak guru putra karak hokar karkansh lagn men sthit hokar inhen buddhijivi banane men sahayak hua. jaimini jyotish ke anusar pancham bhav, panchmesh, pancham bhav ka karak v putra karak grah ka mahatva sarvopri hai. ainstain ki kundli men yah sabhi paksh param uttam hain parinamasvarup yah mahabuddhiman buddhijivi hue. ainstain ka vivah uchcharashisth shukra ki mahadsha men saptamesh ke upar se guru ka gochar hone par hua. vivah ka karak shukra do sanbandh vichched karak grahon se yukt hai islie san 1919 men surya ki mahadsha aranbh hone par inka pahli patni se talak ho gaya.
uchcharashisth panchmesh ki mahadsha san 1899 men aranbh hone par inhen shiksha ke kshetra men uchchakoti ki saflta prapt hui aur inka apar man samman barha tatha san 1905 men inhen doktar ki upadhi prapt hui aur san 1908 men inhen ubhrta hua vaigyanik mana jane laga. san 1911 men shukra men guru ki antardasha men ainstain profesar bane. san 1914 men barlin yunivarsiti ke profesar ka v ''kesar vilhem instichyut for fijiksa'' ke dayrektar ka pad bhi isi shukra ki mahadsha men prapt hua. is prakar se dasham bhav men uchcharashisth shukra ki mahadsha ka samay inke jivan ka svarnim yug siddh hua jismen inhen apar yash ki prapti bhi hui. san 1921 men surya ki mahadsha men chandrama se dasham bhav par guru aur shani ka gochar hone par inhen nobal puruskar ki prapti hui. san 1933 men chandrama men ketu ki dasha men yah amerika chale gae. san 1952 men rahu men budh ki antardasha men pradhanmantri devid ben ne inke samaksh, ijrail ka rashtrapti banne ka prastav rakha. san 1952 men lagn se dasham bhav par gochar ke guru v shani ka sanyukt prabhav chal raha tha.