yadi vivah rekha niche jhuk kar hriday rekha se mil jati hai, to ukt ayu khand men jivnsathi ki jivan rekha ka parikshan karen aur vah khandit (tuti) ho, to jivnsathi asadhya rog se pirit hoga ya uski mrityu bhi sanbhav hai. jis vyakti ki vivah rekha hriday rekha (hart lain) se mil jae, uske jivnsathi ke hath ki rekhaon ka sukshm parikshan avashyak hai, kyonki aise men jivnsathi ko khatra rahta hai. ab prashn yah uthta hai ki aise vyakti ke jivnsathi ko kis rog ke karan jivn-mrityu se sangharsh karna hoga? iska uttar jivnsathi ke hath ka parikshan kar ke savdhanipurvak den. iske kuch udaharan nimn hain:
- yadi shani ke parvat par kraes ka chihn ho, to aise men pakshaghat ya rirh ki haddi ki samasya ho sakti hai. yadi donon hathon men shani parvat par kraes ho, to yah khatrnak hai aur unhen savdhani se rahne ko kahen.
- yadi jivan rekha sirhinuma ya rassi jaisi ho, to vyakti adhikatar bimar rahta hai.
- yadi hriday rekha tuti ho, khas kar surya rekha ke niche ho, to bhayankar dil ka daura parne se mrityu ki sanbhavna prabal rahti hai.
- yadi hriday rekha tut kar mastishk rekha se mile aur ant men kraes ho, to mastishk ke daure ki suchna deta hai.
- hriday rekha par kala dag ho, to vah dil ke daure ko batlata hai. dag bara ho, to pranghatak ho sakta hai.
- yadi hriday rekha tuti ho aur kraes aur dvip ke chihn hon, to yah bhi dil ka daura darshata hai.
- yadi hriday rekha puri n ho kar, guru parvat se nikal kar, bich men ruk jae, to is ayu khand men dil ki ganbhir bimari ka sanket hai ya durghatana men mrityu ki sanbhavna hai.
- mastishk rekha par til ho to dimag sanbandhi bimari rahti hai tatha yah rekha rassi ya janjir ke akar ki ho, to sir men aghat ki sanbhavna hai.
- yadi hriday rekha par sitara shani parvat ke niche hai, to gathiya rog ya pakshaghat ka prakop darshata hai. yah sitara hriday rekha par kahin bhi ho, to bhi dil ka daura lata hai. kuch asadhya bimariyon ke nidan hetu tatha jivan ke utar-charhav sanbandhi nirnay dene men janmapatrika ke sath hast rekhaen bahut sahayak siddh hoti hain. janmapatrika men truti hona sanbhav hai, parantu hast rekhaon men truti ki koi gunjaish nahin hai. svasthya rekha manibandh, uske samip se niche se budh parvat ki or jati hai. samanyatah svasthya rekha ka hath men hona achcha nahin samjha jata. jiske hath men svasthya rekha ka abhav ho, vah vyakti svasth mana jaega aur jivan rekha tatha svasthya rekha jis sthan par milen, s umra men manushya ke jivan men kuch anarth hoga, jaise bimari, ya mrityu ka bhay adi. yadi svasthya rekha balshali, terhimerhi, aniyamit ho, to gurde sanbandhi rog ho sakte hain aur svabhav chirchira hoga. chote- chote tukron men bani svasthya rekha pachan shakti kharab aur kaleje ko kamjor karti hai. svasthya rekha men dvip ho aur nakhun lanbe hon, to vah fefre kamjor hone ya shvans sanbandhi bimari ka dyotak hai.
yadi kisi ki pratham ungli men kharabi lage, to aisa vyakti shvans kriya ya dama rog se pirit ho sakta hai. isi prakar yadi kisi ki shani ki ungli yani madhyama men truti dikhe, to vyakti nirashavadi hoga. hast rekha shastra men madhyama yakrit ki kharabi evan pet ki bimari ko darshati hai. isi prakar tisri ungli ka sanbandh gurde se rahta hai. striyon ki chaithi ungli se garbhashay ki bimariyon ka pata chalta hai. hath men yadi chandra ke sthan par guna ka chihn dikhe, to usse gurde ki samasya ka abhas hota hai. isi prakar chandra ke parvat par yah chihn pani se khatra evan madhumeh ki bimari darshata hai. yadi mastishk rekha par guna ka chihn ho, to vah durghatana darshata hai. ajakal bahut se log hriday rog se pirit hain. atah pratyek vyakti ki hriday rekha tatha mastishk rekha ka parikshan karvaen. usi ke sath surya ke sthan ka bhi parikshan karvaen. surya ka sthan tisri ungli ke thik niche hota hai. yadi jivan rekha par dvip ka chihn ho aur hriday rekha surya ke niche tuti hui ho, to yah sthiti hriday rog darshati hai. yadi aisa ho, to daektar se upchar karana jaruri hai.
hath men shani kshetra madhyama ke niche dvip ka khara chihn ho aur uski ek shakha vakra gati se svasthya rekha ki or jhuki ho, to aise vyakti ka dimag kamjor hoga. yah bahrepan ka bhi suchak hai. hath men shani kshetra par se kai rekhaen nikal kar hriday rekha ko kat rahi hon, to vah gathiya aur vayu se pirit hoga. parantu yahi rekhaen yadi jivan rekha tak pahunch gayi hon, to aisa unnati ke karan ho jata hai. hath ki madhyama ke tritiya parva par terha trishul ho, to jatak dughartanaon se ghira rahta hai. yadi yahi trishul chihn shani kshetra par ho, to shubh suchak ho jata hai. yadi vah madhyama ke mul men ho, to kisi ka apman karne ke karan uski jel yatra hoti hai. hath men chandra kshetra par guna ka chihn ho, sath hi bhagya rekha ke ant men bhi yah chihn ho, to jatak atmahatya ka prayas karta hai. hath men chandra kshetra par gol chihn ho, to jal men dubne se mrityu ki sanbhavna hoti hai. yadi yahan do gole hon, to ankhon ki roshni par asar parta hai. vivah rekha ki shakhaen yadi hriday rekha ko sparsh karti hain, to vah jivnsathi ki mrityu us umra men hone ka sanket deti hai. striyon ke hath men aisi rekha ashubh mani gayi hai. atah vivah ke purva larke-larkiyon ke hath men vivah rekha ka parikshan sukshm taur par karen, to uttam hoga.