ek svasth hath vah hai, jo purnataya sudrirh ho tatha uska koi bhi bhag, kahin se bhi, asamanya rup se viksit n ho. hath lachilapan lie hue tatha spasht ho. usmen nami ki apeksha shushkata ho. hatheli par sthit vibhinn ungliyon ke mul men sthit parvaton ka samanya rup se viksit hona bhi svasth sharir ke lie avashyak hai. samast hatheli ka rang samta lie hue hona chahie. hatheli men avanchit rekhaon ka jal, adhik gahri athva kati-fati tatha chihnon se yukt rekhaen asvasthata ke lakshan hain. hatheli, athva rekhaon par durbhagyapurn chihn, jaise kraes, jali, dvip, kale til adi vibhinn bimariyon ke dyotak hain. hatheli ki tvacha ka asman rang, usapar lal, nile athva safedi lie hue dhabbe bhi asvasthata ke pratik hain. hatheli ko chu kar uska tapman anubhav kiya ja sakta hai. hatheli n to adhik garm honi achchi hai, n hi adhik thandi. jiski hatheli pasiji si lagti hai, usapar nason ka nila, athva lal ubhar spasht dikhai deta hai, vah vyakti asvasth hota hai. rekhaon ka ek sima tak gahrapan shakti darshata hai. parantu rekhaen itni gahri n ho jaen ki gahre rang ki dikhlai dene lagen. iska arth yah hota hai ki us rekha vishesh par atyadhik tanav par raha hai. dhumil athva kshin par gayi rekhaen asvasthata darshati hain. sirhidar athva chote-bare tukron se bani jivan rekha jivan mane nirantar koi n koi rog deti hai. jivan rekha ka doshpurn tarike se hona ant vriddhavastha men sharirik kasht deta hai. terhi-merhi rekhaen tatha aprakritik rup se viksit bedaul hatheli athva ungliyan kisi n kisi bimari ki pratik hain.
atyadhik mansal hatheli tatha bahut narm athva nami lie hue hath ki tvacha bhi bimari darshati hai. vibhinn rogon ko darshane men jivan rekha, uske niche sath-sath chal rahi sahyogi jivan rekha tatha hatheli ke mul se chal kar kanishthika ungli ke niche sthit budh parvat tak ja rahi svasthya rekha ka yogdan vishesh rup se mahatvapurn hota hai. hath men svasthya rekha hi ek akeli aisi rekha hai, jiska upasthit rahna bhi sharirik kashton ka pratik hai. is rekha ki anupasthiti achche svasthya ki dyotak hai. rekha par sthit dvip tatha atyadhik ubhra budh parvat mandagni rog deta hai. pet ke rogon ke karan aisa vyakti khane tak se vanchit hota hai. yadi rekha ka yah dvip mastishk aur jivan rekha ke madhya men sthit ho, to vyakti vayu, jvar, fode-funsi adi se pirit hota hai. donon hathon ki ungliyan sudaul tatha nakhun chamkile, gulabi athva tivra varn ke hone chahie. nakhunon ke mul men sundrta se viksit ardh chandra ek svasth sharir ka pratik hai. iske viprit uski anupasthiti vibhinn bimariyon ka sanket hai. ve nakhun, jo apni prakritik chamak kho kar kathor athva bhangur ho gaye hon, bimari ke pratik hain.
nakhun par safed, nile, pile, matmaile adi rang ke dhabbe bhi bimariyon ki pahchan hain. avastha bhed se nakhun char prakar ke hote hain- lanbe, chote, chaide tatha tang. prayah jin vyaktiyon ke nakhun lanbe hote hain, unka sina arthat fefde kamjor hote hain. unki sharirik shakti bhi samanya se kam hoti hai. yah shakti aur bhi adhik kam ho jati hai, yadi nakhun sire ke niche ungli ki or, ek kor se dusri kor tak, adhik mura ho. atyadhik chote nakhun dama, shit tatha gale ke rog se pirit hona darshate hain. atyadhik bare akar ke nakhunon par upasthit chandra rakt pravah ki shighrata darshate hain. atyadhik karya karne se aise vyaktiyon ko murcha, mirgi, pakshaghat athva vayu rog ho jate hain. aise nakhun vale vyakti yadi sharab, bhang, charas adi nashile padarthon ka sevan karte hain, to dhamniyon par rakt ke adhik prabhav se utpann dabav ke karan, unki dhamni bhi fat sakti hai. nakhunon par parne vale safed dhabbon ka arth hota hai ki mastishk athva snayvik jal par avashyakta se adhik dabav par raha hai. hatheli se juri ungliyan, hath ke sath-sath, mastishk se bhi sidha sanbandh rakhti hain.
sukhi si, terhi-merhi, moti, milane par bich men chidra banati ungliyan bimari darshati hain. ungliyon ke parva komal tatha mansrhit hona svasth sharir ka lakshan darshata hai. chikni, sidhi tatha apas men milti ungliyan nirogi kaya deti hain. yah dirghayu ka lakshan hai. kar prishth ki or jhuki hui ungliyan akasmik mrityu deti hain. atyadhik lachili ungliyan tatha angutha ichcha shakti ki kami darshata hai. hath ki pratyek ungli ek naisargik anupat men lanbai lie hoti hai. hath men ve ungliyan sarvashreshth hain, jo lagabhag ek hi unchai se praranbh ho rahi hon. ungliyon ka tulnatmak rup se, unche athva niche sthit hona un ungliyon men shakti ka hras karta hai. parinamasvarup unke mul men sthit parvat kshetra prabhavit hote hain aur unse sanbandhit rog vyakti ko kasht dete hain. prayah anubhav men ata hai ki jin vyaktiyon ki ungliyon ke tritiya parva (ungli ke mul vale) atyadhik fule hote hain, unhen khan-pan ka bahut shauk hota hai.
falasvarup ve vyakti khan-pan ki aniyamitta ke karan rogi hote hain. asvasth hath ka bahya akar, asvasthata kal men prayah aniyamit ho jata hai tatha ungliyan shithil athva nirjiv ho jati hain. mrityu se kuch din purva vyakti ki ungliyon men, vishesh rup se madhyama ke nakhun men pari dhariyan spasht rup se drishtigochar hone lagti hain tatha unka rang dhumil parne lagta hai aur angutha shaktihin ho kar hatheli ki taraf girta sa dikhlai deta hai.