hamara hath hamare sharir ka pratibinb hai. is gyan ka upyog ekyupreshar paddhati men vishesh rup se kiya jata hai. ekyupreshar ke visheshagya hatheli ke paeint (bindu) dabakar hamare sharir ke vibhinn angon men hone vale rogon ka nivaran karte hain. iska karan hai ki sharir ke vibhinn ang hamare mastishk se jure hue hanai aur mastishk ki shiraen hamari hatheli tak ati hain. is prakar hatheli se mare sharir ke sabhi ang jude hue hain.
sharir ke har ang ka chitran hamari hatheli par kisi n kisi rup men hota hai. hatheli ke vibhinn kshetron (binduon) par ane vale dhabbon v anya nishaniyon ke dvara ham sharir men hone vale vibhinn rogon ka ankalan kar sakte hain. mukhyatah kisi bindu par kraes ka ubhrna ya koi dhabbe ka paida hona ya vishesh koi chihn banna, sharir ke us vishesh kshetra men rog hone ki utpatti ka sanket deta hai. isi prakar hamari hatheliyon par kuch dhabbe ya nishan (chihna) hote hain. akritiyon men dhabba, (latkn) janjir, dvip, bindu, jali mukhya hain. hatheli men jis sthan par ye chihn hote hain usi ke anurup in chihnon ka fal hamen prapt hota hai jo hamare rogon aur svasthya kashton ko ingit karte hain. jaise -
hriday rekha: hriday v usse jure sabhi mukhya ang fefre, v livar adi ko darshati hai. isi prakar svasthya rekha ya ayu rekha hamare pet, ante, gurde v blaidar adi ka suchak hai. mastishk rekha hamare dimagi glaindas ka pratinidhitva karti hai jaise vibhinn penakriyaj ki vajah se madhumeh thayraid jaise rog hote hain. hath ki ungliyan v angutha bhi hamare sharir men hone vale vibhinn rogon ko janne men mahatvapurn bhumika nibhata hai. shukra parvat se janan angon par vichar kiya jata hai.
dhabba: hast rekha shastra jyotish men dhabbe ke nishan ko shubh nahin mana jata hai. yah rog aur bimari ko darshata hai. dhabbe alag alag rang ke hote hain. lal rang ka dhabba mastishk rekha par maujud ho to apko chot lag sakti hai. svasthya rekha par dhabba apko bukhar evan kuch sharirik rog se pirit kar sakta hai. nila aur kala dhabba hatheli par hona gupt pareshani de sakta hai. jivan rekha par jahan jahan yah dhabba hota hai us umra men ap rog grast rahte hain.
latakan (janjir): yah am taur par jivan rekha ke antim sire par hoti hai jo vriddhavastha men hone vale kasht aur mrityu ke vishay men batati hai. yah nishan agar jivan rekha aur mastishk rekha ke sath lagakar bana hua hai to burhape men apki yaddasht kamjor hogi. agar yah nishan hriday rekha par dikhai de raha hai to yah is bat ka suchak hai ki dil ki halat achchi nahin rahegi.
dvip: hath men dvip adhik ban jane se mastishk men durbalata, mansik rog tatha chirchidapan a jata hai. dvip chinh agar hriday rekha par saf aur ubhra najar a raha hai to ap hriday rog se pirit ho sakte hain, is sthiti men apko dil ka daura bhi par sakta hai. yah chinh ka mastishk rekha par hone se apko mansik pareshaniyon ka samna karna hota hai v apke sir men dard rahta hai.
bindu: bindu prayah asthayi rog ka suchak hota hai. svasthya rekha par chamkila lal bindu prayah bukhar hone ki suchna deta hai. jivan rekha par bindu hone se bimari ka sanket milta hai. yah jvar ka karan ho sakta hai. jivan rekha par bindu hone se lanbi bimari utpann hoti hai. vivah rekha par hone se sir men bhari chot aur hrday durbal hota hai. shukra kshetra men kala bindu hone se vyakti ko guptangon men rog hone ki ashanka rahti hai.
jal: hath men ari rekhaon par tirchi rekhaon ke ane se jal jaisa chihn ban jata hai. hast rekha se rog hone men is chihn ki bhi bhumika aham hoti hai. yah jal yadi mangal kshetra par ho to vyakti ko mansik ashanti evan udvignata rahti hai. ketu kshetra par jal hone se chechak ya charm rog jaise rogon ka samna karna par sakta hai. svasthya men kami ke bare men vibhinn sanket hatheli se nimn prakar se prapt hote hain.
- yadi khun ki kami (enimiya) hai to hath pila parne lagta hai.
- yadi hriday rekha kati ya kam gahri hai to hriday rog hone ki sanbhavnaen rahti hain.
hriday rog: jiski hriday rekha men dvip vritt chihn ho shani kshetra ke niche mastishk rekha ka rang pila ho ya ayu rekha ke pas vale mangal kshetra par kala bindu ho ya hriday rekha par kale til ka chihn ho evan dvip ho to vyakti ko akasmik murcha tatha hriday rog ho sakta hai.
ant rog: yadi rekhaen pile rang ki ho, nakhun rakt varn evan dhabbedar ho tatha budh rekha khandit ho to vyakti ko anton ki bimari ho sakti hai.
rirh ka rog- yadi hriday rekha par shani ke niche dvip chihn ho to vyakti ko rirh ki bimari ho sakti hai.
danton ka rog: jis vyakti ki hatheli men shani kshetra uchch ho aur us par adhik rekhaen ho budh shani rekha lahrdar evan lambi ho ungliyon ke dvitiya bhag lanbe ho to dant ke rog ho sakte hain.
gurde ka rog: yadi mastishk rekha par, mangal ke samip safed rang ke dag ho evan donon hathon ki hriday rekha tuti hui ho to vyakti ko gurde ka rog hota hai.
ankh ke rog: budh ke niche yadi mangal grah par til ho to ankh se sanbandhit rog ka bhay rahta hai.
raktachap: mangal grah uttam ho aur mastishak rekha men dosh ho to vyakti atyant chinrchira v gussail svabhav vala hota hai. aise vyaktiyon ko uchch raktachap ki bhi sanbhavna rahti hain.
stri garbh rog: yadi kisi stri ke mangal grah par moti-moti ari rekhaen hon v shani grah daba ho to use garbh se jure rog kasht de sakte hain.
fefron ke rog: jivan anya sabhi rekhaon se rekha patli ho aur hath sakht ya bhari ho to pet ke rog ho sakte hain. kintu agar hath naram ho to fefre kamjor hote hain.
dama: yadi mastishk rekha chandra parvat par jati ho, anya rekhaen dushit ho, chandrama unnat ho tatha hraday aur mastishk rekha men antar ho to dama rog pareshani deta hai.