sanpurn vibhagon ka vikas evan panch anguliyon se yukt hast ki sthiti manibandh par hi hai. yahan se jo tin rekhaen nikal kar manibandh ki or se dusri or tak faili rahti hain, unhen ‘valay rekha’ bhi kahte hain. inmen manibandhasth pratham valay rekha se svasthya aur dhan ka gyan hota hai. dusri valay rekha se shastra aur vidya ka gyan hota hai tatha tisri valay rekha se bhakti aur sukh bhav ka vichar kiya jata hai. jis vyakti ke manibandh men ye tinon rekhaen hon, vah uttam purush, jiski 2 rekhaen hon, vah madhyam tatha 1 rekha vala neshth, kanishth athva daridra hota hai. kisi-kisi ke manibandh men char rekhaen bhi payi jati hain. in rekhaon dvara ayu ka bhi gyan hota hai. pratyek rekha 30 varsh ki ayu ki suchna deti hai. yadi tinon valay rekhaen purn aur svachch hon, to us manushya ka ayushman 90 varsh ke lagabhag mana gaya hai. yogi-mahatmaon evan bal brahmachariyon ke manibandhon men purn char rekhaen hone par unki ayu lagabhag 120 varsh ki hoti hai. kintu vartaman samay men aise mahan purush kam drishtigochar hote hain. ayu varshon ka man rekhaon ki purnata-apurnata par nirbhar hai.
valay rekha shuddh hone par manav shastranusar nishchit ayu sanand, purn rupen bhogta hai. is sanbandh men san 1930 ki ek ghatna yahan uddhrit karna upyogi hoga. san 1930 men ek yogi, jo pahle shastron ka nirman karta tha aur kisi karan shasan ki agya se jiske hath kat diye jane ke falasvarup keval uski valay rekha hi shesh thi, ek din ek pahunche hue jyotishi ke pas pahuncha aur kahne laga: mujhe daektaron ne bataya hai ki mujhe ti. bi. ho gayi hai. unke kathnanusar chikitsa bhi karva raha hun. fir bhi svasthya din pratidin girta hi ja raha hai. mujhe abhi apne in nanhen - nanhen bachchon ka paln-poshan karna hai. shasan ne mere hath katva diye. fir bhi sangit se hi kisi tarah grihasthi chala raha hun. idhar daektaron ne bhi meri asha khandit kar di. isi khandit asha ko liye apke pas aya hun. kripa kar nirnay kar den ki meri ayu aur kitne varsh ki hai. is shastra nirmata ki ayu us samay lagabhag 52 varsh ki thi aur uske khandit hast par do valay rekhaen svachch aur tisri adhi thi. jyotishi ne, akriti vigyan, valay rekha or jyotish shastriya niyamanusar purn vichar kar, uski ayu 70 varsh ki batlayi. vah ashvast ho gaya. uski khandit asha punah akhand hui. usne apne bal-bachchon ko parha-likha kar suyogya bana diya aur fir san 1948 men apni deh tyagi.
pashchimi vidvan inhin tin valay rekhaon ko arogya rekha, dhan rekha aur samriddhi rekha kahte hain. inse ukt vishyon ka nirnay karte hain. purush ke hath men in tinon valay rekhaon ka svachch, saral aur purn hona uske shanti, sukh, saubhagya, arogya aur bhagyavan hone ke lakshan hain. purushon ke hath mane tin rekhaen shubh mani gayi hain. iske viprit striyon ke hath men do valay rekhaon ka hona shubh mana gaya hai. inke svachch aur purn hone se striyon ko santansukh, saubhagya vriddhi, shanti aur uttam svasthya prapt hote hain. yadi striyon ko tin valay rekha hon ya ek valay rekha kati athva chinna-bhinn ho, to fal madhyam hota hai. yadi kisi purush ki tinon valay rekhaen shanrikhlakar hon, to vah adhik parishram se dhan uparjan karta hai. rekhaen bhagn hone par purush bahut kam kharchila ya kanjus hota hai. stri ke manibandh men shanrikhlakar valay uski nirdhanata aur ast vyast jivan vyatit karna suchit karta hai. adhikatar kulta ya veshyavritti men lipt striyon men yah valay rekha payi jati hai aur jo stri sadgrihasthi ki hote hue bhi parpurushgamini ho, uske hath men bhi uparyukt prakar ki rekhaen payi jati hain.
yadi char valay rekhaen hon, to ve kramshah dharm, arth, kam aur moksh ki suchak hain. koi-koi moksh ki valay rekha ko daridrata ki suchak bhi mante hain. kintu adhisankhya yogiyon ya mahatmaon ke hathon men hi aisi char shuddh valay rekhaen payi jati hain. manibandh ka shubhashubh vichar: yadi manibandh sudrirh, chikna tatha sandhimukt, arthat hath ka jor n dikhayi parne vala ho, to vah shubh faldayak hai. jiska manibandh dhila ho aur uske hilane se shabd hota ho, vah nirdhan hota hai. jiska manibandh ganbhir, pusht tatha sath hi manibandh aur hath ki pushtata bhi ek si ho, vah prithvipti hota hai. jinke manibandh chote tatha sandhiyon men atyant dhile hon, unka hath kata jata hai. jinke manibandh shabdayukt hon, ve nirdhan hote hain. manibandh, ya valay rekhaon ke bhitar trikon chihn ho, to manav ko vriddhavastha men samman aur dhan ki prapti hoti hai. dusre sthan par bhi yah chihn pratishtha aur samman barhane vala hota hai. yadi tinon valay ya manibandh rekhaon par kon ka chihn ho, to manav ko vriddhavastha men paraye dhan se sukh aur samman prapt hota hai. yadi manibandh rekha men gunak (×) chihn ho, to manushya ko atyant kathinaiyon ka samna karna parta hai. kintu yadi vahi (×) pratham valay ke bhitar ho, to jivan sukh-shanti se vyatit hoga. yadi manibandh rekha men gunak chihn (×) ho, to us purush ka svasthya achcha rahega. vah paraye dhan ka upyog karega aur parishrami bhi hoga.
yadi yahi chihn niche ki valay rekha par ho, to jivan ke antim bhag men dravya prapti hogi tatha kisi vyapar men labh hoga. manibandh ki tinon valay rekhaon men jiski pratham rekha kati ho, vah yashasvi, prashansa ka patra, vishvasi aur parmayu hota hai. yadi kisi ke manibandh ya valay rekha ke madhya do ari rekhaon par do sidhi rekhaen hon, to vah nich svabhav ka, kukarmi, kam pirit ho kar sanghatik mrityu pata hai. yadi kisi ke manibandh par gaj (ankush) rekha ho, to vah shreshth aur mahan aishvarya vala hota hai. vah manushyon par shasan karta hai.