kirtibhvti danen tatha arogyam hinsya trijshushrushya rajyan dvijatvan cha'pi pushkalam. panimasya pradanen kirtirbhavati shashvati annasya tu pradanen triptayante kambhogtah.. dan se yash, ahinsa se arogya tatha brahmanon ki seva se rajya tatha atishay brahmatva ki prapti hoti hai. jaldan karne se manushya ko akshay kirti prapt hoti hai. annadan karne se manushya ko kam aur bhog se purn tripti milti hai. dani vyakti ko jivan men arth, kam evan moksh sabhi kuch prapt hota hai. kalyug men kaise bhi diya gaya dan mokshakarak hota hai. tulsi dasji ne kaha hai- pragat char pad dharm kahi kalimhi ek pradhan yen ken vidhi dinhai dan kahi kalyan. dan ki mahima ka ant nahin sansar se karn jaisa udaharan dani ke rup men koi nahin. dan ke vishay men charcha karne se purva ek bat spasht karna chahte hai. kamaen niti se, kharch karen riti se, dan karen priti se. ‘‘dan magar kalyan’’ yah vakya samanyatah hamen sunne ko mil jata hai, kintu samanya vyakti ke man men anekon prashn uth khare hote hain-
1. dan kya hai ? 2. dan kyon karen ? 3. dan ka mahatva kya hai ? 4. dan kaise karen ? 5. dan kisko karen ? 6. dan ka fal kya hota hai ? parmatma ne pratyek prani ko jivit rahne ke lie, parivar ka palan poshan karne ke lie jivika pradan ki hai lekin sansar men aise praniyon ki bhi kami nahin hai jo atyant nirdhan hain, lachar hain, ashay hain, apang hain tatha ashakt hain. un praniyon ke jivan ki raksha karna hamara param kartavya hai kyonki param pita parmeshvar ne hamen is yogya banaya hai ki ham apne parivar ke palan poshan ke sath-sath, apni avashyaktaon ki purti ke bad bhi, anya majbur tatha ashakt logon ki madad kar saken. manushya ke atirikt jiv-jantu jo svayan apne bhojan ki vyavastha nahin kar sakte hain, unki jimmedari bhi bhagvan ne manav ko di hai. islie manav matra ka param kartavya hai ki vah apne parivar ke atirikt jiv-jantuon adi ke lie bhi bhojan ka prabandh kare yug ke anusar dan dene ke tarikon men bhi parivartan aya hai jaise-
1. satyug men dan- adar ke sath shraddhapurvak kisi ke ghar jakar diya jata tha. yah uttam dan kahlata hai.
2. treta yug men dan- is yug men patra ko apne ghar bulakar samman purvak dan diya jata tha.
3. dvapar yug men- yachna karne par arthat mangne ke bad dan diya jata tha.
4. kalyug men dan- tahalakar arthat kam lene ke bad dan diya jata hai jo lagabhag nishfal hota hai . atah har yug men dan ka mahatva raha hai.
alg-alag dhang se dan kiya jata raha hai parantu jab hamko gyan ho chuka hai to kyon n uttam prakar ka dan adar sahit daridra ke ghar jakar samman purvak diya jaye, jiska purn fal prapt hota hai. parmatma bhi prasann honge tatha apko bhi khushi milegi.
dan kyon karen ?
- lagabhag sabhi dharmon ke anusar hamen apni ay ka kuch bhag avashya hi dan karna chahie. aisa sabhi dharm granthon men likha hua hai tatha ham apne purvajon tatha bujurgon se sunte ae hain ki hamen apni kamai men se kuch n kuch bhag avashya hi dan karna chahie. bhojan banane ke bad bhagvan ko bhog lagae bina grahan karna pap saman mana jata hai. atah bhagvan ko bhog lagane ke bad ashrit jiv-jantuon ka bhag nikalna chahie. is kriya ko ham sabhi ke purvaj (dadi, nani adi) karte chale ae hain. kisi bhi tyohar, tithi vishesh (amavasya, purnima, ekadshi adi) par to brahman, pandit, pujari adi ko bhojan karakar dakshina dena hamara param kartavya mana jata hai. hamare shastron ke anusar bhi is prakar se kiya gaya dan avashyak tatha uttam hota hai. is pratha ko ham apne as pas sabhi sthanon par dekhte chale ae hain. dan kisi par ahsan karke nahin karna chahie kyonki yah to hamari svechcha tatha shraddha par nirbhar hota hai tatha dan dete samay apne dukhon, kashton, daridrya adi ko kam kiya jana hi jatak ka uddeshya hota hai. anisht grahon ki shanti tatha vibhinn prakar ke kasht nivaran ke lie bhi dan kiya jata hai.
apni ay ka kuch bhag dan karne se atm shuddhi tatha dhan ki vriddhi avashya hi hoti hai. yah param satya hai ki dan apne svayan ke kalyan ke lie hi kiya jata hai. dan se daridrata dur hoti hai, yahan tak ki agla janm tak sudhar jata hai. dan dene se kabhi bhi kami nahin ati hai kyonki kisi bhi prakar se kiya gaya dan kabhi bhi khali nahin jata hai apitu agle janm tak uska fal-pratifal prapt hota hai. dan punya karmon ke ekatrikaran ka upay bhi hai tatha apne dvara kie gae ashubh karmon ka pashchatap bhi hai. ashubh karmon ke nivaran ke anekon sahaj v satik upay hain parantu un sabhi men sabse mahatvapurn upay dan hai. atah dan jab bhi kiya jaye sabko dikhakar, prachar prasar karke kabhi nahin karna chahie, is prakar se kiya gaya dan vyarth ho jata hai kyonki sabhi jante hain ki dan is prakar se kiya jana chahie ki ek hath se dan kiya jaye to dusre hath ko pata bhi n chale. isilie hamare samaj ne gupt dan ko sabse adhik mahatvapurn sthan diya hai. is sambandh men ek choti si katha prachlit hai- sitaram namak vyakti mrityoprant jab yamraj ke darbar me pahuncha to yamraj ne faisla sunate huye kaha ki ap nark men jaie to sitaram ar gaya ki main nark men nahin jaunga.
mainne to prithvi par rahakar anekon dharmik karya kie hain, asimit dan kiya hai, anekon mandir, dharmashalaen, vidyalay adi banvae hain, anekon yagya adi kie hain, nirdhanon ko kambal bante hain tatha anekon bar langar adi ki vyavastha ki hai tab fir mujhe nark men kyon bheja ja raha hai. yamraj ne hansakar kaha ki tumne thik hi kaha hai ki tumne anekon dharmik tatha kalyankari karya kie hain, parantu tumne ve sabhi karya apna nam kamane arthat apni prasiddhi ke lie kie hain. sitaram tumne dhyan nahin diya ki tumne sthan-sthan par apna nam likhvaya hai arthat tumhare dvara kiya gaya pratyek dan svarth se paripurn tha tatha svarth purvak kiya gaya dan dan nahin kahlata hai. atah tumhen nark bhogna hi parega. is katha se yah shiksha milti hai ki dan hamesha gupt rup se karna chahie, dan ke bare men kisi ko bhi pata nahin chalna chahie tabhi ham dan ke uchit fal ke bhagidar honge. gita men bhi kaha gaya hai ki karm karke fal ki ichcha bhagvan ke upar chor deni chahie. kaha bhi hai- dan din ko dijiye, jase mite daridra ki pir. aushdhi vako dijiye, jase hove nirogi sharir ..
dan kisko den ?
- yah bhi ek vishisht prashn hai. dan dene ke mukhyatah do niyam hain jinka hamen dan dete samay dhyan rakhna chahie - pratham - shraddha tatha dvitiya - patrata. shraddha se tatparya hai ki hamara kitna man hai arthat hamari kitni kshamata hai. kshamata se kam ya adhik diya gaya dan dan nahin apitu pap kahlata hai. isko ham ek udaharan se bhali bhanti samajh sakte hain, yadi kisi jatak ki kshamata pachas rupye dan karne ki hai to use pachas rupye hi dan karne chahie. pachas ke sthan par das rupye athva sau rupye dan karna dan nahin apitu pap hai. dan karya shuddh tatha prasann man se kiya jana chahie. bina shraddha ke musibat athva bojh samajh kar dan kabhi bhi nahin karna chahie, isse to achcha hai ki dan karya kiya hi n jaye. kisi ko ahsan jatakar kabhi bhi dan nahin dena chahie. shuddh hriday se dan dene se apne hriday ko bhi shanti milti hai tatha dan lene vala bhi khush hokar man se dua deta hai, yah jaruri nahin ki us dua ki shabdon ke dvara hi abhivyakti ho. dan ka dusra niyam patrata hai arthat ham dan kisko de rahe hain vah dan ki hui vastu ka upbhog kar paega ya nahin.
is tathya ko ham is prakar se samajh sakte hain ki kisi dehat men ban se buni charpai par sone vale vyakti ko shahar men danalap ke gadde par yadi sone ke lie kaha jaye to use sari rat nind nahin aegi karvten hi badlta rahega. isi prakar garib bhikshuk ko jo fate-purane vastron men rahta hai yadi naya vastra pahnne ko diya jaye to vah vastra usko katega, vah us vastra ko pahan nahin paega ya to vah use bech dega ya fenk dega, use to fate purane ghise huye hi vastra pasand aenge. bhare pet vale ko bhojan khilane se uske man se koi dua nahin niklti hai apitu yadi bhukhe pet vale daridra vyakti ko bhojan khilaya jaye to vah purnatah tript hokar man se duaen hi dega. dan bhojan ka hi nahin kisi bhi vastu ka ho sakta hai. rogi ke lie aushdhi, ashikshit ke lie shiksha, bhukhe ko bhojan, nirvastra ko vastra kahne ka tatparya yah hai ki jis ke pas jis vastu ki kami hai aur vah usko prapt karne men asamarth hai to amuk jatak ko amuk vastu ki vyavastha kara dena bhi dan hi shreni men ata hai. atah dan dete samay vishesh dhyan dena chahie ki dan uchit patra ko hi diya jaye.
vibhinn grahon ka dan kisko kab den ?
- nav grahon ki shanti ke lie jyotish shastra men anek upay sujhae gae hain jaise- mantra, jap, havan, dan, aushdhi snan, tirth, vrat, yantra-mantra, nag adi. inmen se dan sabse saralatam upay hai jo jatak ko apni kundali vishleshan ke uprant anisht grahon ki shanti ke lie samy-samay par karte rahna chahie. purva janm ke karmon ke anusar manav ko sukh dukh prapt hote hain. manav anekon prakar ki samasyaon ka samna karta rahta hai. purnatah kasht nivaran ka to koi bhi samathrya nahin rakhta hai kintu upay dan adi se kasht kam avashya ho jata hai. navagrahon se sambandhit dan ki jane vali vastuon ke vishay men yon adhikansh log jante hain fir bhi jan sadharan ki jankari ke lie yah jankari upyogi evan avashyak siddh ho sakti hai. dan ka fal kisi vastu ka dan karne se kya fal milta hai, isko ham nimn talika se jan sakte hain. jis vastu ya khadya padarth ka dan kiya jata hai, us din uska bhog-upbhog nahin karna chahie. vastu ya padarth tyag ke din ichchanusar barhae ja sakte hain, jaise- tin din, ek saptah, ek mah athva chalis din ya chaturmas.
yadi apka dhan kahin atka hua hai to-
1. purnima ke din chandra grah ke nimitt dan karen.
2. somvar ke din safed vastron ka dan karen.
3. manglvar ke din chairahe par sarson ka tel dalen.
4. budhvar ke din ganesh ji ko laddu ka bhog lagakar bal gopalon ko bante/dan karen.
5. shanivar ke din adarak athva sarson ke tel ka dan karen.
dan ke niyam-
1. dan uchit patra ko hi den.
2. dan shraddhapurvak den.
3. dan shuddh hriday se den.
4. dan kisi bhi prakar ka prachar karke n karen.
5. dan apni kundali ka vishleshan karake uchit patra ko den.
6. dan din/ var ke anusar karen.
7. dan shatru grahon ka n karen.
8. dan uchch ke grahon ka n karen.
9. dan nich ke grahon ka avashya hi karen.
10. dan kundali men sthit shashtam, ashtam tatha dvadash bhavon ke svamiyon ka hamesha karen.
11. dan savere ke samay bina munh jutha kie arthat bina khaye-piye hi karen.
12. dan ghar se bahar niklte samay hi dena chahie.
13. dan anjan/ajnbi vyakti ko hi karna chahie.
14. dan kisi daridra v jaruratamand ko hi karen.
15. dan aise vyakti ko karna chahie jo dobara n dikhe ya n mile.
16. dan ki gai vastu ko us din grahan n karen.
17. dan apni kshamata ke anusar hi karen.
18. dan karke kabhi bhi n jataen.
19. dan is prakar se karen ki ek hath se karen to dusre hath ko pata bhi n chale.
20. dan karke bhul jaen use kabhi yad n karen.
21. dan ka hisab n lagaen.