jyotish shastra men falit karne ki prayah tin vidhiyan prachalan men rahti hain - janm kundli, chandra kundli tatha navansh kundli. lagn se sharir ka vichar hota hai, chandrama se man ka. janm patrika men chandrama se man ki sthiti dekhakar yah nishchay kiya jata hai ki jatak apni sansarik yatra men kitna safal ya asafal hoga. yahan tak ki parlaukik jivan ki sthiti bhi chandrama se spasht ki jati hai. inhin karnon se hi maharshiyon ne chandra lagn se falit ko mahattva diya, kintu pratyek jatak ka chandrama vyaktigat rup se alag fal batata hai, islie ham barah rashiyon ka falit chandrama ke gochranusar nahin kar sakte - arthat chandrama ke sthan se jin-jin rashiyon men grah bhraman karte hue jate hain,
vaisa-vaisa fal uske jivan men hota hai, jise gochr-fal kahte hain. gochar ke anusar fal ek gaun fal vidhi hai, kyonki yah purnatah vyavharik nahin hai. isko gaun fal islie kaha gaya hai kyonki barah rashiyon ka fal sansar ke sabhi logon ka saman nahin ho sakta, is karan vidvan is bat se sahamat hain ki janm kalin grah sthiti se janm samay men jis-jis rashi men sat grah sthit hon v lagn jis rashi men sthit ho, in ath sthanon men gochar ka fal yadi kiya jaye to yah vichar vishvasniya hoga. isi vichar vidhi ko ashtaka-varg vidhi kahte hain. uttarakhand men ashtak varg par adhyay men guru parashar aur unke param priya shishya maitrey ke bich sanvad diya gaya hai - kalau pap ratanan ch, manda buddhiryayonnam. atoalp buddhigamyan yat, shastra met iv dasth men.. tatratkala grahasthitya, manvana pari sfutam. sukh duahkh parigyan mayusho nirnay tatha.. arthat maitrey apne guru parashar se nivedan karte hain
ki kaliyug men pap karm men vyast manav ki buddhi mand ho jati hai. atah mujhe bataen jisse manushyon ko us grah sthiti se us samay ke sukh-dukh, labh-hani, ayu ka nirnay ho sake. pratyuttar men maharshi parashar ne ashtak varg vidhi ki vyakhya ki. vastav men ashtak varg ek aisi taknik hai jo kisi bhi parangat jyotishi ke lie achuk vidhi hai, jo vrihatparashar hora-shastra ke kisi bhi purva adhyay men nahin di gayi hai. lagn v chandrama donon se grahon ke prabhav ka anuman lagana kathin karya hai. hamare vidvan maharshiyon ne pidhi dar pidhi gyan ko sthanantarit kiya v is karya ko badi sugmta v sarlta se kiya aur is vidya ko ashtak varg nam diya. yah vidhi itni maulik hai ki iske jaisi vidhi vishva bhar men kahin nahin, kyonki iske dvara pal bhar men tvarit satik bhavishyavani ki ja sakti hai.
ashtak varg vidhi ke anusar char prakar se falit vidhi batlai gayi hai -
1. manushya ke ayu sadhan ki vidhi,
2. bhinna-bhinn vargon men rekhaon dvara anek prakar ke fal batane ki vidhi.
3. trikon evan ekadhipatya shodhnadi ke pashchat falafal janne ki vidhi, tatha
4. ashtak varg ki rekhaon dvara gochar fal kahne ki vidhi.
anya vidvanon ke anusar -
1. sthir vishleshan - jatak ke jivan men bar-bar hone vali ghatnaon ke svarup ko batata hai, iske antargat vibhinn bhavon men pade binduon ki sankhya ka tulnatmak adhyayan kiya jata hai.
2. dasha vishleshan - ashtak varg ek vishesh vidhi se dasha par prakash dalta hai. sthir vishleshan se ghatnaon ka hona v dasha vishleshan se samay vishesh ko nikala jata hai.
3. gochar vishleshan - paramparik rup se ashtak varg ka upyog gochar vishleshan se kiya jata hai. sarvapratham svayan bhagvan shiv ne yamal men ashtak varg ke vishay men batlaya tha, uske bad parashar, manitth, vadrayan, yavneshvar adi ne anukaran kiya. kundli men pratyek grah evan lagn ka, surya kundli men (surya ashtak varg kahte hain) apne-apne sthan men bal hota hai.
isi kramanusar chandra ashtak varg, mangal ashtak varg, sabhi sat grahon v ek lagn ki kundli taiyar hoti hai. lagn kundli ko lagn ashtak varg se sambodh iat kiya jata hai. pratyek grah apne-apne sthan se jin sthanon men bal pradan karta hai, isko bindu ya rekha dvara sanket kiya jata hai. bindu ya rekha men koi antar nahin hai. is prakar pratyek ashtak varg men us grah vishesh ka bal spasht ho jata hai. sarvashtak varg - kul 337 sarvashtak binduon ko 12(barh) se bhag dene par ausat lagabhag 28 (atthais) ata hai. atah 28 vah ausat ank hai, jisse tulna karne par kisi bhav men binduon ka kam ya adhik hona paya jata hai.
samanya siddhant -
1. koi bhi rashi ya bhav jahan 28 se adhik bindu hon - shubh fal deta hai. jitne adhik bindu honge, utna achcha fal dega. vyavhar men 25 se 30 ke bich binduon ko samanya kaha gaya hai aur 30 se upar bindu hone se vishesh shubh fal honge.
2. grah chahe kundli men uchch kshetri hi kyon n hon, par ashtak varg men sarvashtak men bindu kam hone par fal nyun hi hoga.
3. 6-8-12 bhav men bhi grah shubh fal de sakte hain, yadi vahan bindu adhik hon kintu kuch vidvanon ka mat alag bhi hai.
4. sutra - yadi naven, dasven, gyarhven aur lagn men in sabhi sthanon par 30 se jyada bindu hon to jatak ka jivan samriddhi karak rahega. iske viprit yadi in bhavon men 25 se kam bindu hon to rog aur majbur jivan jina hoga.
5. yadi gyarhven bhav men dasven se jyada bindu hon aur gyarhven men barhven se jyada, sath hi lagn men barhven se jyada bindu hon to jatak sukh samriddhi ka jivan bhogega.
6. yadi lagn, navam, dasham aur ekadash sthanon men matra 21 ya 22 ya isse kam bindu hon aur trikon sthanon par ashubh grah baithe hon to jatak bhikhari ka jivan jita hai.
7. yadi chandrama surya ke nikat ho, pakshabal rahit ho, chandra rashi ke svami ke pas kam bindu hon, jaise 22 aur shani dekhta ho to jatak par dushtatmaon ka prabhav rahega. yadi rahu bhi chandrama par prabhav dal raha ho to ismen koi do ray nahin hai.
8. jab-jab koi ashubh grah aise bhav par gochar karega, jismen 21 se kam bindu hon to us bhav se sambandhit falon ki hani hogi.
9. iske viprit jab koi grah aise ghar se vicharan karta hai jahan 30 se adhik bindu hon to us bhav se sambandhit shubh fal milenge, jo us grah ke karakatva aur sambandhit kundali men use prapt bhav vishesh ke svamitva ke rup men milenge.
10. grah jin rashiyon ke svami hote hain aur jin rashiyon bhavon men ve sthit hote hain, un sthanon se sambandhit achche fal ve apni dasha-antardasha men denge. sukshmatar vishleshan ke lie dasha-svami ke bhinnashtak varg ka adhyayan karna chahie. matra sarvashtak bindu dekhakar hi kundali ka fal nahin kahna chahie. kundali men rajyog, dhanyog ya dusre yog hone bhi jaruri hain. ashtak varg unhin ko sudridh karega jo yog kundali men upasthit hain. ashtak varg dvara aise yogon ki vastavik shakti ka mulyankan bhi kiya jata hai.