surya/chandrama ke rahu/ ketu ke sath hone se grahan yog banta hai - is yog men agar surya grahan yog ho to vyakti men atm vishvas ki kami rahti hai aur vah kisi ke samne ate hi apni purn yogyata ka parichay nahin de pata hai ulta uske prabhav men a jata hai.
kahne ka matalab ki samne vala vyakti hamesha hi havi rahta hai. chandra grahan hone se kitna bhi ghar men suvidha ho magar man men hamesha ashanti hi bani rahti hai koi n koi choti-choti baton ka dar bhi satata hai. koi agyat bhay man men bana rahta hai.
santushti ka hamesha abhav rahta hai. mangal ke rahu ke sath hone se angarak yog banta hai - is yog ke karan jis kam ko dusra koi asani se kar leta hai usi kam ko karne men anek prakar ki badhaen, arachan adi bani rahti hai yani koi kam sukh shanti purvak sampann nahin hota hai. guru ki rahu/ketu ke sath yuti ho to chandal yog banta hai
- is yog ke karan vyakti ka dhan se sanbandhit koi kam safal nahin hota hai. kitna bhi dhan achche samay men kama le lekin jaise hi in grahon ki mahadsha- antardasha- pratyantar dasha aegi to vo sab kamaya hua dhan ekadam se khatm ho jata hai aur is yog ke karan vyakti ko karj lene ke bad chukane men dikkat hoti hai aur ek din usko aisi sthiti ka samna karna parta hai ki kahin se kuch rupye udhar lekar khana khana parta hai. shukra aur rahu ki yuti se lampat yog ka nirman hota hai
- is yog ke karan jatak ka dhyan parai striyon men laga rahta hai aur kai-kai prem sambandh bante hain lekin jyadatar ka ant bahut bura, larai- jhagde ke sath aur apman ke sath hota hai. karkasha stri jivan men bani rahti hai. shani rahu ki yuti ho to nandi yog banta hai
- is yog ke karan vyakti sachchai ke marg par chalna chahte hue bhi hamesha jhuth aur fareb ka shikar hota hai aur kai bar jel jane tak ki naubat ati hai. apradh ki duniya se sambandh banta hai aur jivan anek sankton men fans jata hai. iske alava bhi kuch aur ashubh sthitiyan agar apki kundli men hai to vo ap milan karen aur dekhane ki kya aisa hai
apki kundli men. saptam, jivnsathi ke sthan ka svami grah agar chathe, athvane ya barhven bhav mai baitha ho ya fir surya ke sath baithakar ast hai to vivah sukh ka nash karne vala yog ban jata hai aur agar purush ki kundli men shukra ast ho ya papi grah se yukt ho to bhi aisa yog banta hai, agar mahila ki kundli men guru ast ho ya guru ke sath koi ashubh ya papi grah baitha ho to mahila ka vaivahik jivan anek samasya se bhara ya nirash ya sapne jo dekhe hon pati ko lekar vah sabhi tute hue lagte hain.
kundli men agar lagnesh kamjor avastha ka ya ashubh sthati men hai to apka svasthya kabhi bhi sampurn achcha nahin rahega. dhanesh aur labhesh agar ashubh sthati men ho to dhan ke karan sampurn jivan sangharsh karna parta hai. karmesh yadi chathe, athven ya barhven bhav men ho ya fir ashubh yuti men ho to anek kam badlne ke bad bhi sthayitva nahin rahta hai aur dhan prapti men badha hoti hai.
surya, mangal, shani, rahu aur ketu ye panch papi grah mane gae hain aur chandra, budh, guru aur shukra ye char grah bahut hi shant aur shubh mane jate hain. agar in char grahon ke sath koi bhi papi grah baitha ho ya shubh grahon men se koi ast ho ya fir nich ka ho ya fir kamjor avastha ka ho to jivan men shubhta ki kami rahti hai, yogyata ke anusar jivan yapan nahin hota hai.