bhartiya sanskriti men kalikal men manushya ke solah sanskaron ka varnan kiya hai usmen pratham sanskar hai. hamare ghar men uttam santan ka janm ho yahi sabhi chahte hain. har manushya ki ichcha hoti hai uski santan uttam gunyukt, sanskari, balvan, arogyavan evan dirghayu ho. iske lie santan ke janm ke bad achchi dekhbhal karte hain lekin santan ko uttam banane ke lie uske janm ke bad dhyan dene se jyada jaruri hai janm se pahle se hi ayojan karna. lekin iske lie koi prayatn nahin karta hai. ham yah vigyan to jante hain ki uttam prakar ke pashu kaise hote hain lekin uttam santan kaise utpann hote hain, yah vigyan ham nahin jante hain. yah vigyan ayurved men bataya gaya hai.
uttam santan kaise ho, yah vigyan pratyek grihasth stri-purush ko janna chahie. garbhadhan sanskar maharshi charak ne kaha hai ki man ka prasann hona garbhadharan ke lie avashyak hai islie stri evan purush ko hamesha prasann rahna chahie aur man ko prasann karne vale vatavaran men rahna chahie. garbh ki utpatti ke samay stri aur purush ka man jis prani ki or akrisht hota hai, vaisi hi santan utpann hoti hai islie jaisi santan ham chahte hain vaisi hi tasvir sone ke kamre ki divar par lagani chahie. jaise ki ram, krishn, arjun, abhimanyu, chatrapti shivaji evan maharana pratap adi. garbhadhan ke lie stri ko ayu solah varsh se jyada tatha purush ki ayu pachchis varsh se jyada leni chahie.
jo stri evan purush kisi prakar ke rog se pirit hon, shokyukt, kruddh, apriya, akami, garbh dharan men asamarth, bhay se pirit ya durbal ho , use garbhadharan ka prayas nahin karna chahie. stri evan purush sneh v svedan kar tatpashchat vaman v virechan ke dvara sharir ki shuddhi karani chahie aur ek mas tak tak brahmacharya rakhna chahie. purush bij yani ki virya ko saumya bataya gaya hai islie purush ko madhur aushidhiyon se siddh ghrit, khir evan vajikaran aushdhiyon ka sevan karna chahie. isi prakar stri bij ko agney bataya hai. islie tel evan urad adi dravyon ka sevan karna chahie. stri evan purush ko jyada khatta , namak vala, basi ann, adhunik fastafud, bahar ki bani chijen adi nahin khani chahie. ghar men bana hua satvik bhojan hi karna chahie.
shreshth santan ke lie acharyon ne putreshti yagya karane ka vidhan bataya hai. stri jis rang ko adhik dekhti hai, santan ka rang bhi vaisa hi hota hai. islie baithne ke sthan, khan pan ka sthan, vastra, shayanakaksh ki divalen adi adhikadhik safed ya halke rang ki honi chahie. subah aur sham dev, gau, brahman adi ka pujan karke shreshth santan ki kamna karte hue puja archana karni chahie. garbhadhan men upyogi vastuen santan ki ichcha se garbhadhan ke lie pravritt danpatti ko garbhadhan sanskar karne ke lie shastron men kaha gaya hai. maharshi dayanand ne apni pustak sanskar vidhi men iska varnan karte hue havan ke lie vibhinn aushdhiyon se yukt khir banakar uska havan karne aur fir us yagyashesh khir ka sevan karke garbhadharan ke lie pravritt hone ka nirdesh diya hai.
pure ritukal men garbhasthapan hone tak ghi ka sevan karen aur ghi ko khir athva bhat men milakar khaen. do ri tukal men bhi garbhadharan nahin hone par pushya nakshatra men jis gay ko pahla bachcha hua ho aisi gay ke dudh ka dahi jamakar usmen jau ke danon ko sanek v pis kar mila den.