muhurt ka ashay kya hai? janmapatrika se yah kis tarah shreshth hai? janmapatrika janm ke samay nakshatron ki sthiti ka adhyayan karti hai. uska kshetra vyakti ke purva janm ke sanchit karmon tak hi simit hota hai. lekin muhurt islie adhik mahatvapurn hai, kyonki vah vyakti ko bahumulya margadarshan dene men saksham hai, jisse vah janmapatrika men ayi vighna-badhaon aur dushprabhavon ko dur karne, unka pratirodh karne, ya unhen prabhavhin karne ka upakram kar sake. muhurt batate hain ki ghadiyon ka labh kis tarah uthaya ja sakta hai aur ashubh ghadiyon se kis tarah bacha ja sakta hai. janmapatrika yadi shiksha men badha ka spasht sanket deti hai, to shubh muhurt men shiksharanbh un badhaon ka prabhav nyunatam kar sakta hai.
purva karmon ka nakaratmak prabhav bhi muhurton ki sahayta se ghataya ja sakta hai. janmapatrika to keval purva karmon ke sanchit natijon ko darshati hai. ye karm janm se hi vyakti ke sath rahte hain, jise bhagya ya kismat ka nam diya ja sakta hai. jyotishi isi janmapatrika ke adhyayan ke dvara bhavishyavaniyan karte hain. vidhata ke alava bhavishya ke lie nishchit nirdesh dena kisi anya ke vash ki bat nahin hai. kal ki apni gatiyan hoti hanai islie kal hi jyotish ka mul adhar hona chahie. koi ek chuni hui ghadi ya muhurt aise shubh kanpan ya gatiyan paida kar sakti hai, jinki urja se sabhi vighna-badhaon ka nivaran sanbhav ho sakta hai.
srijnatmak, rakshatmak aur dhvansatmak shaktiyan kal ke garbh men samai rahti hain. surya aur nakshatra kal ke hastakshar hain. urja ki sabhi shaktiyon ka srot surya hai, islie grah aur nakshatron ke chakra sanchalan se shubh aur ashubh ghadiyon ke sanket milte rahte hain. ye aur kuch nahin urja vikiran ke sanket hain. jyotish men muhurt ke prachin granthon men muhurt chintamni evan shri kalidas pranit jyotirvida bharanam-mukhya hain. aise ved shastron men bhi muhurt ki upyogita ka ullekh milta hai. muhurton ka uddeshya karya ki nirvighnata purvak saflta ke lie shuddhatam kal ka nirdharan karna hai. jyotish men
1) sindvant
2) sanhita evan hora men muhurt jyotish ka sthan sanhita skandh men ata hai.
muhurt granthon men muhurt dipak, martand, muhurt sangrah, ratnamala adi granth bhi bahut achche hain. dainik jivan men muhurt bahut upyogi hai. hamari janmapatri to hamare purva janm ke punya adi karm ka lekha jokha hai, jise ham bhagya kahte hain. bhagya badlna saral nahin hai, parantu yadi ham apne avashyak karya muhurt ki sahayta se karen, to uttam fal ki sanbhavna prabal rahti hai. manav jivan ke aranbh se mrityu tak ki vibhinn ghatnaon ki anukulta tatha pratikulta se manav ko bachaya ja sakta hai. rajya sanchalan ke shubh samay ki talika tatha udyog-dhandhon ke praranbh ke shubh muhurt ke gyan se bahut labh hua hai. shukla ya krishn paksh ke manglvar ko padne vali tritiya, ashtami, teras ko yadi kanuni dava kiya jae, to saflta nishchit hai.
shukla paksh ki pandrah tithiyan apne ap men shakti sanpann hain. amavasya ko surya aur chandra donon ka prabhav barabar matra men hota hai. islie amavasya kisi shubh karya ke aranbh ke lie shubh nahin mani jati hai. par shalya chikitsa ke lie amavasya sarvottam mani gayi hai, kyaneki us din sharir men dravon ka pravah bahut kam hota hai. iske thik viprit purnima ko shalya chikitsa ke lie katai upyogi nahin mana gaya hai, kyonki us din sharir ke dravon ki gati bahut tej ho jati hai. shalya chikitsak yadi in sanketon ka palan karen, to unki saflta nishchit hai. surya aur chandra ki sthitiyan manushya ki bhavnaon, uske vyavhar aur acharan ko bhi prabhavit karti hain. kisi ghatak rog men krishn paksh ki chaturdashi sanghtik mani gayi hai, kyonki us din surya aur chandra ki yuti aranbh hokar amavasya ko purn hoti hai.
yadi marnasann rogi ki rashi ke us din athven ghar men chandrama sthit ho to amavasya ke purva ane vali chaturdashi ko uske parjinon ko vishesh rup se savdhan ho jana chahie. amavasya bhi svasthya ke lie aise prakrnon men thik nahin hai. somvar aur shanivar ko purva disha ki or prasthan, manglvar aur budhvar ko uttar disha ki or yatra, guru ko dakshin ki, shukra tatha ravi ko pashchim ki yatra varjit hai. krishn paksh ki ashtami, navmi,chaturdashi aur amavasya ko yatra aranbh nahin karni chahie. amavasya ke purva ki chaidas tithi yatra ke lie shubh nahin mani gayi hai. kisi naye karya ke aranbh ke lie aise dinon ko talna chahie, jinmen surya nayi rashi men pravesh karta hai. 14 janvri aur 14 farvri aisi hi tarikhen hain.
samanyatah har mah ki sankranti bhi naye karya aranbh karne ke lie upyukt nahin hoti hai. ye tarikhen mantra siddhi, tantrik siddhi aur sadhna ke lie upyogi mani gayi hai. somvar, budhvar, guruvar aur shukravar karya shubharanbh hetu shubh mane gaye hain. shalya chikitsa ke lie manglvar ka din sarvottam hai. janm nakshatra vala divas muhurt chayan ke lie upyukt nahin hota hai. par krishi bhumi kray aur naye pad grahan tatha annaprashan ke lie din shubh mane gaye hain. sanbhog, chikitsa, yatra aur vivah ke lie ye din ashubh hote hain. iske viprit mahilaon ke lie janm nakshatra vale divas vivah ke lie kalyankari siddh hote hain. maharshiyon ke kathan hain ki vivah ke samay shubh muhurt ka chayan janmapatrika ke doshon ka nivaran kar deta hai. muhurton ke chayan men tithiyan bhi vishesh mahatvapurn hoti hain. surya aur chandrama se akshanshon ki duri se tithiyon ka nirdharan hota hai. jab surya aur chandra saman anshon par hon, to amavasya hoti hai aur jab 180 digri par hote hain, to purnima hoti hai.
chandra aur surya ke barah ansh ki duri se ek tithi banti hai. muhurt jyotish men nakshatron ka bhi utna hi mahatva hai. sattais nakshatron men se pushya nakshatra kisi bhi kam ke aranbh ke lie ati uttam hai. par vivah, kisi bhi sthiti men, pushya nakshatra men nahin kiya jana chahie. pratyek tithi ko muhurt ke anusar kiye jane vale karyon ka ullekh sarva sadharan ki jankari ke lie avashyak hai. prathma: vivah, yatra, pratibandh, pratishtha, chuda, vastu karm, grih pravesh adi mangal karya nahin karne chahie. dvitiya: raj sanbandhi, vrat bandh, pratishtha, vivah yatra, bhushnadi karm shubh hote hain. tritiya: yatra sanbandhi karya, shilp, chuda, annaprashan, grih pravesh shubh hai. chaturthi, navmi, chaturdashi: ye rikta tithiyan hain. inmen agni karm, maran karya, bandhan kritya, shastra vish, agnidah adi karya kar sakte hain, parantu manglik karya nahin karne chahie. panchmi: samast shubh karya, parantu rin nahin dena chahie. shashthi: yatra, pitri karm, mangal karya, sangram, shilp, vastu, bhushan shubh hai. saptami: 2, 3, 5 ke sabhi karya saptami ko bhi shubh hai. ashtami: sangram, vastu, shilp lekhan, ratn, abhushan kharidna, pahnna ye sab ashtami ko shubh hain. dashmi: dvitiya, tritiya, panchmi evan saptami men kiye gaye karya dashmi men bhi shubh hote hain. ekadshi: vrat, upvas, dharm, kritya, devotsav, udyapan, katha, ekadshi men shubh hain. dvadshi: yatradi ko chodakar sabhi pushtikarak dharmik shubh karya kar sakte hain.
trayodshi: dvitiya, tritiya, panchmi, saptami, dashmi ke karya kar sakte hain. purnamasi: vivah, shilp, paushtik karya, mangal, sangram, vastu karm, yaksh kriya, pratishtha adi karya kar sakte hain. amavasya: pitri karya aur shalya kriya kar sakte hain. vibhinn nakshatron men karne yogya karyon ki sankshipt vyakhya: dhruv ya sthir nakshatra: uttarafalguni, uttarashadha, uttarabhadrapad aur rohini, ye char nakshatra aur ravivar, in nakshatron men sthir karya, bij bona, ghar banana, shanti karm, bagicha lagana adi karya siddh hote hain. char nakshatra: svati, punarvasu, shravan, dhanishtha, shatbhisha. in panch nakshatron men tatha somvar ko vahan lana, yatra karna siddh hote hain. ugra nakshatra: purvafalguni, purvashadha, purvabhadrapad, bharni, magha aur manglvar ko maran, agni ka karya, shathta ka karya, vish karya, hathiyar ka karya thik rahte hain. laghu nakshatra: hast, ashvini pushya, abhijit men tatha guruvar ko bajar ka karya, shastra adi ka gyan, abhushan banvana, dukan ka kam, chitrakari, gana-bajana adi kala ke karya siddh hote hain.
sadharan nakshatra: vishakha, krittika men aur budhvar ko agni hotra, shubhashubh karya thik hain. mridu nakshatra: mul, jyeshtha, adrra, ashlesha men aur shanivar ko jadu-tona, hathiyar se var karna, pashu daman (hathi, ghode adi ko sikhana) thik hai. ek bat aur dhyan dene yogya yah hai ki jis din-bhadra ho us din shubh karya nahin karen. ek bat aur dhyan dene yogya hai, ki shukla paksh men ek se panchmi tak tithiyan ashubh kahi gayi hain, kyonki in tithiyon men chandrama kshin bal hota hai aur chandra bal un dinon nahin rahne se karya safal nahin hote hain. isi prakar krishn paksh ki ekadshi se amavasya tak tithiyon men chandra bal kshin hone se shubh karya nahin karne chahie. yadi kisi karya siddhi ke lie yatra karni hai, to sanmukh chandra lekar yatra karen. chandrabal ka vivaran nimnanusar hai: mesh, sinh, dhanu ka purva disha men chandravas hota hai.
vrish, kanya makar ka dakshin disha men chandravas hota hai. mithun, tula, kunbh ka pashchim disha men chandravas hota hai. kark, vrishchik, min ka uttar disha men chandravas hota hai. udahrntah yadi indaur se dilli, yani uttar men yatra karni hai, to ap kark, vrishchik ya min rashi men chandra ho, to us din yatra praranbh karne se saflta milegi. parantu ukt din rashi se chandra ashtam nahin ho, is par dhyan dena chahie. isi prakar se dainik jivan ke lie upyogi sutra muhurt shastra men hain, jinka upyog dainik jivan men kar ke labhanvit ho sakte hain. muhurt shastra ke niyamon ke palan se asankhya log labhanvit hue hain.