ishvar ne pratyek manushya ka bhagya uske purva janm ke karmon ke anusar likha hai jise koi bhi nahin badal sakta. khasakar manushya ke jivan ki nimnankit tin ghatnaon ko koi nahin badal sakta. 1. janm, 2. paran (vivah) evan 3. maran (mrityu). manushya ke jivan ki yah tin ghatnaen bhagya ke anusar hoti hain aur yah bhi kaha gaya hai ki vivah ke liye jore svarg men bante hain, ismen manushya ka koi rol nahin hai. is karan vivah ke pashchat pati patni ko samanjasya banae rakhte hue sukh purvak jivan yapan karna chahie. ramayan men bhi shri tulsidas ji ne ullekh kiya hai ki ”hoihanai vahi jo ram ruchi rakha“ iska tatparya hai ki ishvar ke dvara likhe gaye bhagya ke anusar jivan chalta hai. kisi manushya ka janm mahal men hota hai aur kisi ka jhopri men, yah bhi uske purva janm ke karm ke anusar hota hai. parantu mahal men janme kuch vyakti bhi kuch samay pashchat abhavagrast jivan vyatit karte hain, yah uske janm ke samay sthit grahon ke anusar hota hai. jaise bharat ke purva rashtrapti shri abdul kalam ji sadharan parivar men janme aur bharat ke sarvochch pad par asin hue. manushya ka bhagya kaisa rahega yah janmapatri se jyotishi batata hai.
manushya ke bhavishya ke sanbandh men jyotish hi ek aisi vidya hai jisse bhavishya ki yojna banakar age barhne se saflta milti hai. manushya janm leta hai to mrityu avashya hogi vah bhi nirdharit samay par ise koi nahin badal sakta. ab prashn yah uthta hai ki yadi bhagya nahin badla ja sakta to manushya ke lie jyotish ki upyogita kya hai. yah satya hai ki jyotishi ki salah se bhagya nahin badla ja sakta, parantu anubhav ne yah siddh kar diya hai ki shubh grah evan yog karak grahon ke ratn (jem ston) dharan karne se logon ko labh mila aur anishtakari grahon ke mantra jap, dan evan sanbandhit devta ki puja karne se anisht hone se ruka ya kam hua. kai jyotish granthon evan ved-shastron men ullekh milta hai ki ashubh grahon ko prasann karne ke lie unke mantra jap, unki vastuon ka dan ya grah se sanbandhit devta ki aradhna karne se grahjnit anisht fal kam hone ki prabal sanbhavna rahti hai. in niyamon ke anusar salah se anek logon ko labh prapt hua. sarvashreshth upay ke taur par shubh grah evan yogkari grah ke ratn dharan karne se karib-karib sabhi logon ko labh hua.
kis rashi evan lagn ke vyakti ko kaun sa ratn dharan labhkari hai iska ullekh niche kiya ja raha hai - vyaktitva ke nikhar ke lie lagnesh evan trikonesh donon ke ratn dharan karna chahie. inse bhagyoday bhi tvarit gati se hoga. kuch vidvanon ka mat hai ki nich rashi sthit grah yadi lagnesh ya trikonesh bhi ho, tab bhi uska ratn nahin dharan karna chahie. parantu yah siddh paya gaya ki yadi ukt grah nich ka ho ta uska ratn avashya dharan karna chahie. anubhav men aisa paya gaya hai ki bahut sare vyakti jinhen shiksha, vyavsay athva anya kshetron men saflta nahin mil rahi thi, unhonne upyukt ratn dharan kie to unhen ashatit saflta prapt hui. ek jatak jiska vrishchik lagn hai aur guru makar men nich rashi men hai, vah bar-bar si.e. ki pariksha men anuttirn ho raha tha, use pila pukhraj aur manikya pahnaya gaya aur vah antim pariksha men pas hokar chartard akauntent ban gaya.
kra. lagn lagnesh lagnesh trikonesh ka ratn ka ratn 1 mesh mangal munga pukhraj 2 vrish shukra hira panna evan nilam 3 mithun budh panna hira 4 kark chandra moti munga 5 sinh surya manikya munga 6 kanya budh panna hira 7 tula shukra hira nilam 8 vrishchik mangal munga pukhraj 9 dhanu guru pukhraj manikya 10 makar shani nilam hira 11 kunbh shani nilam hira 12 min guru pukhraj moti isi prakar jis vrishchik rashi evan lagn vale vyakti ka bhagyesh chandra nich rashi men rahte hain, use moti bahut labhkari siddh hua hai evan tula rashi vale ko shani mesh men nich rashi ka hone se nilam bahut labhkari siddh hua hai. uparyukt donon prakrnon men chandra evan shani yogkari hone se bahut labhkari hona chahie, parantu nich rashi sthit hone se bahut ashakt hai. unka ratn pahnna bahut hi labhkari siddh hua hai. maharshi varah mihir ne panch mahapurush rajyogon ki vyakhya apne granth vrihatsanhita men is prakar ki hai: panch tara grah (mangal, budh, guru, shukra ya shani) men se ek-ek grah ke balvan rahne par panch mahapurush rajyog bante hain. ye sthan, dik, kal, cheshta adi balon se yukt hon, svochchagat ya svakshetri ukt grah kendra bhavanen men sthit hon, to guru se hans, shani se sas, mangal se ruchak, budh se bhadra tatha shukra se malavya panch mahapurush rajyog ki srishti hoti hai.
aise yog vale ko kramshah hans men pukhraj, sas men nilam, ruchak men munga, bhadra men panna aur malavya men hira bahut labhkari siddh hote hain. is karan vyakti is prakar ke ratn dharan karke labhanvit ho sakte hain. vibhinn bimariyon men bhi ratn bahut labhkari hote hain: yah varn chikitsa hi hai, jismen ratn labhkari siddh hue hain- hriday rog men manikya (rubi) labhkari hai. isse rakt ka sanchalan thik gati se hota hai tatha aeksijan bhi hriday ke sath rakt ko thik matra men milti hai. yadi sharir men kailshiyam ki kami ho, to moti labhkari hai. yah haddi ki kamjori, sharir ka dublapan, jvar tatha hriday ki dharakan ko bhi niyantrit karta hai. lal munga garbhavati mahila ko garbhapat se bachata hai aur purush ko jivanashakti pradan karta hai. yah jvar aur piliya men bhi labhkari hai. garbhavati mahila ke lie hara panna surakshit prasav men sahayak hai. yah damme ke rog ko bhi kam karta hai. hamare maharshiyon ne apni khoj se yah nishkarsh nikala hai ki jis vastu ka rang jitna gahra hoga, vah utna hi adhik apne gun ki abhivyakti karega. isi siddhant par ratnon ka mulya hai. ratnon men rang ka ghanatva adhik hone se ve adhik labhkari siddh hue hain aur hote bhi hain.
isi siddhant ke anusar hamen labhkari ratn dharan karna chahie. vibhinn ratnon ko dharan karne ke lie un grahon ke din, yani moti ke lie somvar, manikya ke lie ravivar, munge ke lie manglvar, panna ke lie budhvar, pukhraj ke lie guruvar, hire ke lie shukravar aur nilam ke lie shanivar upyukt rahte hain. yah bhi avashya dekh len ki shukla paksh ho aur ukt din 4, 8, 9, 14 tithiyan n hon. in tithiyon men ratn dharan jaise shubh karya varjit hain. ab lal kitab ke anusar kuch totkon ka varnan kiya ja raha hai, inke palan se asankhya rogon ko labh hua hai. unka sankshep men varnan is prakar hai: yadi kisi ka surya karm sthan (dashm) men pirit ho to yah totka hai ki bahte pani men tanbe ka sikka baha dena labhkari rahega. pratyek bhav men surya anishtakari hone par bhinna-bhinn totke diye gaye hain. sabhi ka varnan karna sanbhav nahin hai yah siddhant sabhi grahon ke lie hain. isi prakar yadi chandra pirit ho to man ka bimar rahna mansik chinta rahna, damme adi kasht ho sakte hain. iske lie chandi ko bahte pani men baha dena achcha rahega. dusra totka yah bhi hai ki rat ko dudh ya pani ka ek bartan sirhane men rakhakar so jayen aur agle savere yah kikar ke vriksh par dal den.
chandrama ke kasht ko dur karne ke lie shri shiv aradhna labhkari hai. pratyek bhav men pirit chandra ke lie bhinna-bhinn totke hain jaise chandra tritiya bhav men pirit ho to hare rang ka kapra kanyaon ko dan men dena adi aur chaturth men chandra pirit ho to ratri ko dudh nahin piyen, ho sake to somvar ko piriton ko dudh pilayen. yadi mangal anishtakari ho to tandur ki mithi roti dan karen, revriyan pani men baha den ya mitha bhojan dan karen. mangal ke lie bajrang bali ji ki aradhna karen aur prasad charhakar grahan karen. budh anisht rahne par kauriyon ko jalakar unki rakh nadi men usi din baha den aur tanbe ke paise men ched karke pani men baha den, ya budh se sanbandhit vastuen dan karen, jaise hari mung, hara kapra, chandi. budh ke kasht dur karne ke lie shri durgaji ki aradhna ”shri durga saptashati“ ka path karna bahut labhaprad rahega. yadi ho sake to nak chidvaen. mahilaen yah kam sarlta se kar sakti hain. yadi budh ke karan koi rog ho to kola fal (petha banane ke kam ane vala fal) kisi devi ke mandir men dan karen. pipal ka vriksh gamle men laga kar parikrama karen. guru ki vastuen jaise chana dal, haldi sabut, kesar, tanba (sone ki jagh), pile ful, kesriya kapra guruvar ke din dan karen.
shukra ke anishtakari hone se apne bhojan men se kuch bhojan nikal kar gay ko khilaen. gay ko ghas (chara) khilaen. shukra se sanbandhit vastu dan karen aur shri mahalakshmi ji ki aradhna karen. shani kashtakari hone par machliyon ko ata khilayane. kauvon ko apne khane men se kuch khilana labhaprad rahta hai. shani se sanbandhit vastuen dan karen aur shivji ki puja-aradhna karen. ketu ke anishtakari rahne par kale kutte ko khana khilana, shri ganesh ji ki puja, aradhna karna labhaprad rahta hai. yadi apke larke ka vyavhar apke sath thik nahin hai to uparyukt vidhi se kutte ko roti khilaen aur mandir men kanbal dan karen. rahu yadi kisi janmapatri men anishtakari ho to nariyal ko pani men baha den aur jau ko dudh men dho kar tatha koyle ko pani men bahane se labh hoga. rahu ki vastuen ”jamadar“ ko dan men dene se bhi labh hoga. yadi kisi par apradh prakaran chal raha ho to vah bhi uparyukt vidhi se hi upay karen. prakaran men labh hoga. uparyukt upay vidhi din men hi karen, rat men nahin karen. manyata yah bhi hai ki kisi ka shani pancham sthan men ho to makan banate samay uske putra ko kasht hoga. yah siddhant uske apne makan par lagu hoga, uske putra dvara banaye gaye makan par lagu nahin hoga. yadi kisi patri men surya, shani sath hon aur patni ka svabhav thik nahin ho, to patni ke vajan ke barabar jvar dan karen. isse labh hoga. siddhant bahut achche hain aur unke dvara bataye gaye upay adhikatar bahut labhkari siddh hue hain.