sansar men kisi ka kuch nahin, bhautik vishyon ko vyarth men apna samjhna murkhata hai, kyonki apna hote hue bhi, kuch bhi apna nahin hota. kuch rupye dan karne vala yadi yah kahe ki usne aisa vishesh karya kiya hai, to usse bara murkh aur koi nahin aur aise bhi hain, jo har mahine lakhon ka dan karte hain, lekin uska jikra tak nahin karte, n karne dete hain. vastav men jarurtmand aur pirit ki sahayta hi dan hai, punya hai. manushya matra par iska vash nahin chalta, devtaon tak ko abhiman ho jata hai aur unke abhiman ko dur karne ke lie parmatma ko hi koi upay karna parta hai. shri krishn ne apni patni satyabhama ko svarg se parijat lakar diya tha. isilie vah apne apko shrikrishn ki atyant priya aur svayan ko ati sundri manne lagi thi. sudarshan chakra ko bhi yah abhiman ho gaya tha ki usne indra ke vajra ko nishkriya kiya tha. atah vah lokalok ke andhkar ko dur kar sakta hai.
bhagvan shrikrishn anttah uski hi sahayta lete hain, aise hi garur bhagvan krishn ka vahan tha, vah samjhta tha, bhagvan mere bina kahin ja hi nahin sakte, isilie ki meri gati ka kai mukabla nahin kar sakta. in tin divya shaktiyon ke ahankar ka nash param dev shri krishn ne ram bhakt hanuman ke sahyog se kiya. ahankar antahkaran ki vah svarthapurn vritti jisse manushya samjhta hai ki main kuch hun ya kuch karta hun. man men rahne vala ‘‘main’’ aur ‘mera’ ka man hi ahankar hai. ahankar ka shabdarth is prakar hai- ahan$kar = ahankar = ‘‘main’’ ka hona ahankar kisi ko bhi ho sakta hai. ek bar satyabhama, garur, tatha sudarshan chakra ko bhi abhiman ho gaya tha aur bhagvan shri krishn ne unke abhiman ko dur karne ke lie shri hanuman ji ki sahayta li. katha ko age barhane se purva aiye janen ki satyabhama kaun thi? satyabhama purva janm men ek brahman ki putri thi. yuvavastha men hi ek din inke pati aur pita ko ek rakshas ne mar diya.
kuch dinon tak brahman ki putri roti rahi. iske bad usne svayan ko vishnu bhagvan ki bhakti men samarpit kar diya. vah sabhi ekadshi ka vrat rakhti aur kartik mas men niyam purvak suryoday se purva snan karke bhagvan vishnu aur tulsi ki puja karti thi. burhapa ane par ek din jab brahman ki putri ne kartik snan ke lie ganga men dubki lagayi tab vah bukhar se kanpne lagi aur ganga tat par hi uski mrityu ho gayi. usi samay vishnu lok se ek viman aya aur brahman ki putri ka divya sharir viman men baithakar vishnu lok pahunch gaya. jab bhagvan vishnu ne krishn avtar liya tab brahman ki isi putri ne satyabhama ke rup men janm liya aur rukmini aur satyabhama bhagvan vishnu ki patrani hui. devi-devtaon ko kis prakar ahankar hua is sandarbh men bhagavat men ek rochak prasang hai. is vishay men krishn ki patni satyabhama ke man men ek din vichar aya ki ve krishn par apne prem ka ijhar karen.
lekin kaise karen? to unhonne socha ki ve apne sare abhushan krishn par charha dengi, nyauchavar kar dengi. unhen apne gahnon se hi tol dengi. krishn jab satyabhama ke kaksh men ae to satyabhama ne bare hi ullas se unhen apni yah ichcha batai. krishn prastav sunakar dhire se muskurae, par koi javab nahin diya. iske bad satyabhama ne krishn ko taraju ke ek palre par bitha diya tatha dusre palre par apne gahne nikal-nikal kar rakhne lagin. unke pas sone ke abhushnon ka vipul bhandar tha. isilie socha ki krishn ke vajan ke barabar gahne to ho hi jaenge. lekin ashcharya, krishn ka palra lagatar gahne rakhne ke bavjud bhari hi raha. aur khajane ke sare gahne rakhne ke bad bhi dusri or ka palra jhukaya nahin ja saka. ant men vah thak kar baith gain. isi dauran vahan rukmini a gai. unhonne ayojan dekha to pucha, kya tol rahi ho satyabhama? satyabhama unhen pura kissa suna kar bolin ki ve hairan hain ki krishn ka palra itne sare vajni gahne rakhne ke bad bhi upar kyon nahin uth raha hai.
sunakar rukmini bhi muskarain. ve jakar apne kaksh se puja-archana ka saman lain. fir bare prem se krishn ki puja ki, charan pakhare aur fir apne patra-pushp adi gahnon vale palre par rakh die. usi kshan krishn ka palra halka ho kar upar uth gaya. dher sare gahnon se jo bat nahin bani, vah prem aur puja ke kuch pushpon se ban gai. ishvar apki sanpannata se prabhavit nahin hota, vah prem se prabhavit ho sakta hai. bhagvan apne bhakton ka sadaiv kalyan karte hain aur apne bhakton ko sadmarg par lane ke lie kai yuktiyan bhi karte hain, isi shreni men apne bhakton ka margadarshan karne hetu shrikrishn ji ne hanuman ji ka smaran kiya, aur hanuman dvarika a gae. hanuman ji shri krishn ke smaran matra se hi samajh gae the ki bhagvan kya chahte hain. hanuman ji yah bhi jante the ki shrikrishn aur shriram donon ek hi hain, donon men koi antar nahin hai. shrikrishn ke karya ko purn karne hetu, hanuman ji dvarika ke raj udyan men chale gae.
vahan jakar utpat machana aranbh kiya. vrikshon par lage fal torne lage, vrikshon ko ukharne lage, bag viran kar diya. bag ki is sthiti ki suchna rakshakon ne shri krishn ko di. shrikrishn ne garur ko bulaya aur vanar ko pakad kar apne sammukh lane ka adesh diya. apne sath sena le jane ka vishesh adesh bhi diya. is par garur ne kaha, ek mamuli vanar ko pakrne ke lie sena le jane ki kya jarurat hai? yah karya to main akela hi kar sakta hun, shri krishn ji muskuraye aur kaha ki thik hai jaisa tum chaho karo, par use jakar roko. adesh pakar garur bag men pahunche aur hanuman ko lalkara, bag kyon ujar rahe ho? chalo? tumhen shrikrishn bula rahe hain.’’ hanuman ji ne kaha, main kisi krishn ko nahin janta. main to shriram ka sevak hun. jao, kah do, main nahin aunga.’’ garur krodhit hokar bola, tum nahin chaloge to main tumhen pakarakar le jaunga.’’ hanuman ji ne koi uttar nahin diya. garur ki andekhi kar vah fal torte rahe.
garur ko samjhaya bhi, ‘‘vanar ka kam fal torna aur fenkna hai, main apne svabhav ke anusar hi kar raha hun. mere kam men dakhal n do. kyon jhagra mol lete ho, jao mujhe aram se fal khane do.’’ garur nahin mana, tab hanuman ji ne apni punch barhai aur garur ko daboch liya. uska ghamand dur karne ke lie kabhi punch ko dhila kar dete, garur kuch sans leta, aur jab kaste to garur ke mano pran hi nikal rahe hon. hanuman ji ne socha bhagvan ka vahan hai, prahar bhi nahin kar sakta. lekin ise sabak to sikhana hi hoga. punch ko ek jhatka diya aur garur ko dur samudra men fenk diya. bari mushkil se vah garur darbar men pahuncha. bhagvan ko bataya, vah koi sadharan vanar nahin hai. main use pakarakar nahin la sakta. bhagvan muskara die- socha garur ka ghamand to dur ho gaya. lekin abhi iske veg ke ghamand ko chur karna hai. shrikrishn ne kaha, ‘‘garur, hanuman shriram ji ka bhakt hai, isilie nahin aya.
yadi tum kahte ki shriram ne bulaya hai, to fauran bhage chale ate. hanuman ab malay parvat par chale gae hain. tum teji se jao aur usse kahna, shriram ne unhen bulaya hai. tum tej ur sakte ho, tumhari gati bahut hai, use sath hi le ana.’’ garur veg se ure, malay parvat par pahunche. hanuman ji se kshama mangi. kaha bhi, shriram ne apko yad kiya hai, abhi ao mere sath, main tumhen apni pith par bithakar minton men dvarika le jaunga tum khud chaloge to der ho jaegi. meri gati bahut tej hai. tum mukabla nahin kar sakte. hanuman ji muskarae. bhagvan ki lila samajh gae. kaha, tum jao, main tumhare piche hi a raha hun. dvarika men shrikrishn ram rup dharan kar satyabhama ko sita bana sinhasan par baith gae. sudarshan chakra ko adesh diya. dvar par rahna, koi bina agya andar n ane pae, shrikrishn samjhte the ki shriram ka sandesh sunakar to hanuman ji ek pal bhi ruk nahin sakte. abhi ate hi honge. garur ko to hanuman ji ne vida kar diya aur svayan usse bhi tivra gati se urakar garur se pahle hi dvarika pahunch gae.
darbar ke dvar par sudarshan ne unhen rok kar kaha, bina agya andar jane ki manahi hai. jab shriram bula rahe hon to hanuman ji vilanb sahan nahin kar sakte. sudarshan ko pakra aur munh men daba liya. andar gae, sinhasan par shriram aur sita ji baithe the. hanuman ji samajh gae. shriram ko pranam kiya aur kaha, prabhu, ane men der to nahin hui?’’ sath hi kaha, prabhu man kahan hai? apke pas aj yah kaun dasi baithi hai? satyabhama ne suna to lajjit hui, kyonki vah samjhti thi ki krishn dvara parijat lakar die jane se vah sabse sundar stri ban gai hai. satyabhama ka ghamand chur ho gaya. usi samay garur tej gati se urne ke karan hanfte hue darbar men pahuncha. sans ful rahi thi, thake hue se lag rahe the aur hanuman ji ko darbar men dekhakar to vah chakit ho gae. meri gati se bhi tej gati se hanuman ji darbar men pahunch gae? lajja se pani-pani ho gae. garur ke bal ka aur tej gati se urne ka ghamand chur ho gaya.
shriram ne pucha, ‘‘hanuman ! tum andar kaise a gae? kisi ne roka nahin?’’ ‘‘roka tha bhagavan, sudarshan ne. mainne socha apke darshanon men vilanb hoga. islie unse uljha nahin, use mainne apne munh men daba liya tha.’’ aur yah kahakar hanuman ji ne munh se sudarshan chakra ko nikalakar prabhu ke charnon men dal diya. tinon ke ghamand chur ho gae. shrikrishn yahi chahte the. shrikrishn ne hanuman ji ko gale lagaya, hriday se hriday ki bat hui aur unhen vida kar diya. parmatma apne bhakton men apne nikatasthon men abhiman rahne nahin dete. shrikrishn satyabhama, garur aur sudarshan chakra ka ghamand dur n karte to parmatma ke nikat rah nahin sakte the aur parmatma ke nikat vah ho sakta hai jo ‘main’ aur ‘meri’ se rahit hai. jab main tha tab hari nahin, ab hari hain main nahin. sab andhiyara mit gaya, jab dipak dekhya mahi..