‘prem-vivah’ ek aisa shabd hai jo apne andar kai bhavnaon ko samete hue hai. jahan abhibhavkon ke lie yah chinta, ashanka, krodh, sanshay adi ka karan banta hai, vahin navyuvak tatha navyuvtiyon ke lie yah santosh, asha evan sukhad bhavishya ki kalpana ko unchi udan deta hai. bhartiya sanskriti ke praranbhik kal se hi yah vivah astitva men tha aur yah ‘gandharva vivah’ ke nam se jana jata tha. is prakar ke vivah men rag, sneh tatha premadhikya ke karan yuvak tatha yuvtiyan samajik manyataon tatha abhibhavkon ki ichcha-anichcha ki parvah n karte hue vivah bandhan men bandh jate hain. maharshi vedavyas ne aise vivah ko shreshth kaha hai- ‘‘sakamayaah sakamen nirmantrah shreshth uchyate’’ jatak dvara kiye jane vale is prakar ke vivah hetu janmakundli men vidyaman vibhinn grahyog hi uttaradayi hote hain. yah prem-vivah svajati, antarjatiya ya antardharmik ho sakta hai. janmang men aise kai karak hote hain, jo aisi paristhitiyon ke utpann hone men nirnayak bhumika ada karte hain.
kundli ke vibhinn bhav tatha bhavesh prem vivah ke drishtikon se janmang ke pancham, saptam, navam tatha lagn bhav ke sath-sath tritiya bhav bhi atyadhik mahatvapurn hota hai. jahan pancham bhav vyakti ke prem sanbandhon, komal bhavnaon, maitri, sankalp, sahas, yojna adi ke samathrya ke sath-sath vicharon ko sakar rup dene ko prabhavit karta hai. vahin saptam bhav jivn-sathi, vivah, sanyog, yaun-lipsa, danpatya sukh adi par niyantran rakhta hai. is prakar ke vivah hetu vyakti men atyadhik utsah, parakram tatha sahas ki avashyakta hoti hai atah tritiya bhav ka bhi sukshm vishleshan avashyak hai. prem vivah ki prakriti arthat svajati, antarjatiya, athva antdharmik vivah ke nirdharan hetu navam bhav par vichar karna chahie. yah bhav jatak ka apne paitrik vansh ke sath sanbandh ka nirdharan karta hai.
faladesh ke sandarbh men lagn bhav sadaiv hi nirnayak bhumika men rahta hai, atah uprokt bhavon ke sath-sath lagn bhav aise vivah ki sanbhavna ko kshin athva prabal karne ka samathrya rakhta hai. grah - is sandarbh men shukra, mangal, brihaspati tatha chandrama sarvadhik mahatvapurn hote hain jabki shani tatha rahu prem-vivah ke bhavishya tatha vilanb adi ka nirdharan karte hain. shukra jahan vyakti ko romantik svabhav vala banata hai, vahin saundarya, komal bhavnaon, ratisukh, vilasita adi ka bhi karak hai.
mangal ki sthiti jatak ke sahas tatha dhairya ke balabal ko pratyaksh rup se prabhavit karta hai. brihaspati is vivah ki svikaryata tatha prakriti ka nirdharan karta hai. chandrama man ka karak hai atah in grahon ke sath chandra ka sanbandh prem-vivah ki sanbhavna ko pusht karta hai. prem vivah ke vibhinn grahyog - navmesh, panchmesh tatha saptamesh janmang men ek sath sthit hon. - saptamesh tatha pancham bhav ke adhipti ka lagnesh ke sath yuti sanbandh ho. - janmang men mangal aur shukra sath hon aur us par panchmesh tatha chandrama ki drishti ho. - shukra ka sanbandh yadi lagn, pancham athva saptam bhav se ho to bhi prem-vivah hota hai. - shukra tatha chandrama lagn bhav men hon tatha unse rahu athva ketu kisi bhi prakar sanbandh bana rahe hon. - saptamesh tatha panchmesh ke madhya drishti sanbandh ho athva donon ke madhya rashi parivartan ho. - ashtamesh yadi saptam bhav men nirbal chandra ke sath ho to abhibhavkon ki anichcha se ya gupt rup se vivah hota hai. - shukra char rashiyon (mesh, kark, tula, makr) men ho tatha pap grahon se ghira ho, sath hi is par shani drishtipat kar raha ho to antarjatiya vivah ke yog bante hain. - chaturthesh tatha lagnabhav ke adhipti ek sath hon tatha use rahu prabhavit kar raha ho to antardharmik vivah hota hai.
- brihaspati tatha shukra saptam bhav men sthit hon to saman jati men prem vivah hota hai. - nichasth surya (tula ka), pap prabhav se yukt chandrama, kark ka shukra tatha in par rahu ka prabhav antarjatiya vivah darshata hai. - panchmesh tatha pancham bhav pap prabhav men ho tatha krur grahon se akrant ho to bhi antarjatiya vivah. - navam bhav athva navmesh ka shani, mangal athva rahu-ketu ke sath sanbandh ho to antardharmik vivah hoga. - shukra tatha chandra ki yuti pancham bhav men ho. - brihaspati ketu ke sath pancham ya navam bhav men ho. - pancham bhav ka svami mangal tatha shani ke sath ho tatha saptamesh dvitiya athva ekadash bhav men ho. - rahu tatha shani shukra ke sath hon athva drisht hon to vasnadhikya ke karan vivah hota hai. - saptam bhav men shukra aur mangal ki yuti ho aur is par panchmesh ki drishti ho to amaryadit sanbandhon ke dabav men vivah hota hai.
- janmang men prem vivah ke yog upasthit hon aur navam bhav athva navmesh pap-pidit hon to alag jati men vivah hota hai. - krur grahon se yukt navam bhav aur navmesh tatha brihaspati ka papakartari men hona anya dharm men vivah karata hai. - saptam bhav, saptamesh tatha shukra yadi shani v rahu se pidit hon to anek prem sanbandhon ke bad prem vivah hota hai. - prem-vivah sanbandhi grahyogon ki janmang men upasthiti ho aur navam bhav brihaspati dvara drisht ya yut ho to mata-pita ki sahmti se prem-vivah hota hai. - navmesh tatha navam bhav shani se akrant ho ya navam bhav papakatrtari yog se grast ho to antarjatiya vivah.
- navam bhav papakrant ho, parantu navmesh ya navam bhav par guru ya shukra ki drishti ho aur ye shubh grah svayan pap prabhav men n hon to vivah svayan se uchch jati men hota hai. - janmang men prem vivah ke yog upasthit hon tatha navam bhav rahu athva shani se yut ya drisht hon to antardharmik vivah hoga. - purush ke janmang ka shukra tatha stri ki janmakundli men mangal ek hi rashi men sthit hon to prem-vivah ke bad bhi paraspar akshunn prem rahta hai. - prem vivah ke yogon par chandrama tatha lagnesh ki drishti prem vivah ki sanbhavna ko atyadhik prabal bana deti hai. - navam bhav par nirdosh guru ki drishti ho to prem-vivah mata-pita ki anumti se dhum-dham se hota hai, basharten janmang men prem-vivah yog upasthit hon.
- yadi navam bhav, navmesh aur brihaspati krur grahon shani, rahu, ketu athva surya ke pap prabhav men ho to apne se nimn jati men vivah hota hai. - prem vivah ke yogon par dvitiya bhav tatha dvitiyesh ka sanbandh nikat sanbandhiyon ya purva-parichit se vivah ka yog banata hai. - pancham athva saptam bhav men sthit ketu yadi prem-vivah ke grahyogon se kisi bhi prakar ka sanbandh rakhe to prem-vivah gupt tarike se (mandir, kort adi men) hota hai. - saptamesh shani se yukt athva drisht ho to prem-vivah men badha tatha vilanb ka yog banta hai. - panchmesh dvadash bhav men ho to prem vivah ke yog bante hain.
samadhan: lagn, pancham, saptam v navam bhav ke adhiptiyon ke sath-sath guru, shukra tatha chandravishayak yathochit upay in paristhitiyon ko niyantrit kar sakte hain. vahin brihaspati ko pusht karna in sanbandhon ke sukhad bhavishya ke lie sarvadhik avashyak hai. is sandarbh men yogya daivagya se paramarsh anivarya hota hai.