chikitsa jyotish ka mahatva do. bi. el. sharma devtaon evan rakshason ne samudra manthan kiya. usmen se amrit, vish anya vastuen evan shri dhanvantri ji prakat hue. iska varnan matsya puran ke adhyay 251 men hai. shri dhanvantri ji sansar ke sabse pahle doktar the. unhonne ayurved ko pratishthit kiya. usi shrrinkhla men rishi charak hue. is prakar manushya matra ke svasthya ki dekhrekh ke lie bad men anya ayurvedacharya hue. isi karan prachin kal men adhisankhay vyakti svasth rahte the. yahan yah ullekhniya hai ki yah sabhi prachin doktar, ayurved ke sath-sath, jyotish ka bhi gyan rakhte the.
isi karan bimari ka parikshan grahon ki sthiti ke anusar sarlta se karte the. yadi adhunik bharat ke doktar jyotish ka gyan rakhen, to ve sarlta se nidan kar ke, uchit ilaj karne men saksham honge. isi prakar jyotishiyon ko bhi manav sharir ka gyan hona avashyak hai, jaise janmapatri men jo rashi, ya grah chathven, athven, ya barhven sthan men pirit ho, ya in sthanon ke svami ho kar pirit ho, to unse sanbandhit bimari ki sanbhavna rahti hai. is sandarbh men yahan, janmapatri ke anusar pratyek sthan aur rashi se sharir ke kaun-kaun se ang prabhavit hote hain, unki sankshep men sabhi ko jankari di ja rahi hai. mesh rashi/lagn : yah agni tatva rashi hai. yah mastishk sir, jivan shakti aur pitt ko prabhavit karti hai. is lagn vala vyakti shreshth jivan shakti vala hota hai.
aisa vyakti manik dharan kare, to svasthya uttam rahne ki sanbhavna hai. jyotish shastra ke dvara bimariyon ka purvanuman lagaya jata hai. doktar, vyakti ke rogi hone par uska ilaj karte hain, parantu jyotish ek aisi vidya hai jiske dvara bimariyon ka purvanuman laga kar unse bachne ke upay kiye jate hain, bimari se bacha ja sakta hai, ya uski tivrata kam ki ja sakti hai.vrish rashi/lagn : yah prithvi tatva rashi hai. yah mukh, netra, kanth nali, ant tatha vat ko prabhavit karti hai.
is lagn vala samanyatah svasth rahta hai. gale men sankraman ki shikayat in vyaktiyon ko adhik rahti hai. iske lie savdhani barten, to uttam hoga. mithun rashi/ lagnah yah vayu tatva rashi hai. yah kanth, bhuja, shvas nali, rakt nali, shvas kriya tatha kaf ko prabhavit karti hai. is lagn vale ki jivan shakti samanya rahti hai. kark rashi/ lagnah yah jal tatva rashi hai. yah vaksh sthal, rakt sanchar aur pitt ko prabhavit karti hai. is rashi-lagn valon ko munga labhkari hai jo jivndayini aushdhi ka kam karta hai.
sinh rashi/lagn : yah agni tatva rashi hai. yah jivan shakti, hriday, pith, merudand, amashay, ant aur vat ko prabhavit karti hai. is lagn, rashi vale men jivan shakti adhik rahti hai. inke lie munga jivan shaktidayak aur labhdayak hai. kanya rashi/lagn : janmapatrika men chatha sthan bimari ka sthan mana jata hai. is karan janmapatri ka parikshan karte samay chathven sthan, ya kanya rashi ka sukshm aur savdhani se parikshan karna chahie. yah prithvi tatva rashi hai. yah udar ke bahri bhag, haddi, anten, mans aur kaf ko prabhavit karti hai. rashi tula/ lagn : yah vayu tatva rashi hai. yah kam, shvas kriya tatha pitt ko prabhavit karti hai.
is lagn valon ke svasthya ke lie nilam labhkari hai. vrishchik rashi/ lagn : ya yah jal tatva rashi hai. yah jannendriya, guda, guptang, rakt sanchar aur vat ko prabhavit karti hai. dhanu rashi/lagn : yah agni tatva rashi hai. yah jangh, nitanb tatha kaf aur pachan kriya ko prabhavit karti hai. iske lie pila pukhraj labhkari hai. makar rashi/lagn : yah prithvi tattva rashi hai. yah jangh, ghutnon ke jor, haddi, mans tatha pitt ko prabhavit karti hai. inke lie nilam aur hira labhkari hain. kunbh rashi/lagn : yah vayu tattva rashi hai. yah ghutne, jangh ke jor, haddiyon-nason, shvas kriya tatha vat ko prabhavit karti hai. min rashi/lagnah yah jal tattva rashi hai. yah panv, panv ki ungliyon, nason, joron, rakt sanchar tatha kaf ko prabhavit karti hai.
inke svasthya ke lie moti labhkari hai. ab pratyek grah ke pirit rahne par ya koi grah chathe sthan ka svami ho kar pirit rahne par kaunsi bimari kar sakta hai, uska sankshep men varnan karte hain. surya : hriday, pet, pitt, danyin ankh, ghav, jalne ka ghav, girna, rakt pravah men badha adi. chandra : sharir ke taral padarth, rakt bayin ankh, chati, dimagi pareshani, mahilaon men masik chakra. mangal : sir, janvron dvara katna, durghatana, jalna, ghav, shalya kriya aupreshan, uchch raktachap, garbhapat ityadi. budh : gala, nak, kan, fefre, avaj, bure sapne. guru : yakrit, sharir men charbi, madhumeh, shukra chirkalin bimariyan, kan ityadi. shukra : mutra men jalan, gupt rog, ankh, anten, apendiks, madhumeh, mutrashay men pathri. shani : panv, panje ki nasen, lasika tantra, lakva, udasi, thakan. rahu : hadidyan, jahar failna, sarp dansh, kronik bimariyan, dar adi. ketu : haklana, pahchanne men dikkat, antra, parjivi ityadi.
jyotishi ko 3, 6, 8 sthan ke grahon ki shakti dekhni chahie. yadi yah pata lag jae ki bhavishya men kaunsi bimari ki sanbhavna hai, to usse bachne ke upay karte rahenge, jaise hriday rog hone ki sanbhavna hogi to vasa vale padarth nahin khaenge aur mansik tanav se bachne ka prayas karenge. isi prakar sardi ki tasir ki sanbhavna hai, to usse bachte rahenge. chikitsa jyotish (medikal estroloji) ke sanbandh men kuch niyam ved-puranon men bhi diye gaye hain. vishnu puran tritiya khand adhyay-11 ke shlok 78 men adesh hai ki bhojan karte samay apna mukh purva disha, uttar disha men rakhen . usse pachan kriya uttam rahti hai aur sharir svasth rahta hai. isi prakar vishnu puran tritiya ansh adhyay-11 ke shlok 111 men ullekh hai ki shayan karte samay apna sir purva disha men, ya dakshin disha men rakh kar soven. isse svasthya uttam rahta hai.
uttar disha men sir rakh kar kabhi nahin soven, kyonki uttar disha men prithvi ka chunbak narth uttari dhruv hai aur manav sharir ka chunbak sir hai. atah 2 chunbak ek disha men hone se asantulan hoga aur nind thik se nahin aegi tatha svasthya par viprit asar parega. uchch raktachap ho jaega. shayad isi karan bharatavarsh men mrit sharir ka sir uttar men rakhte hain.
kuch log prashn karte hain ki kya jyotishi doktar ki bhumika nibha sakte hain? iska uttar yah hai ki jyotishi doktar ki bhumika nahin nibhate, parantu janmapatrika, ya hastarekha ke adhar par jyotishi yah batane ka prayatn karte hain ki ukt vyakti ko bhavishya men kaun si bimari hone ki sanbhavna hai, jaise janmapatrika men tula lagn, ya rashi pirit ho, to vyakti ko kamar ke nichle vale bhag men samasya hone ki sanbhavna rahti hai.
janmapatrika men bimari ka ghar chathvan sthan mana jata hai aur ashtam sthan ayu sthan hai. tritiya sthan ashtam se ashtam hone se yah sthan bhi bimari ke prakar ki or ingit karta hai, jaise tritiya sthan men chandra pirit ho, to ti.bi. ki bimari ki sanbhavna rahti hai aur tritiya sthan men shukra pirit ho, to sharkara ki bimari 'madhumeh' ki sanbhavna rahti hai. shani, ya rahu tritiya sthan men pirit hone par jahar khana, pani men dubna, unchai se girna aur jalne se ghav hona adi ki sanbhavna banti hai.