vivah tay karte samay janmapatri milan ke atirikt hast rekhaon ka adhyayan bhi savdhanipurvak karna chahie, kyonki janmapatri janm samay ka thik thik pata nahin hone se galat ho sakti hai parantu hast rekha sahi hoti hai. vivah rekha ke alava bhagya, ayu, hriday aur mastishk rekhaon ka gahan adhyayan avashyak hai. hast rekha se vivah ka sanbhavit samay janne ke niyam yahan die ja rahe hain. vivah rekha chothi ungli aur hriday rekha ke madhya hoti hai. choti ungli aur hriday rekha ki duri ko char saman bhagon men vibhakt karen. yadi hriday rekha se pratham bhag men vivah rekha hai to 18 se 25 varsh ki ayu men vivah ki sanbhavna hogi, dusre bhag men ho to 25 se 35 varsh tatha tisre bhag men ho to 35 se 50 varsh ki ayu men vivah ki sanbhavna hogi. in char bhagon men bhi iski duri hriday rekha se jitni jyada ho utni ayu men vivah ki sanbhavna hogi yadi vivah rekha choti ungli ki or muri hogi to aise jatak ka vivah hona kathin hota hai. yadi ukt rekha se ek shakha choti (budh) ungli ke mul tak pahunche to aise vyakti ka vyabhichari hona sanbhav hai.
yadi vivah rekha hriday rekha ki or jhuke to jivan sathi ke svasthya par viprit asar dalegi tatha yadi hriday rekha ko sparsh kare to jivan sathi ki ukt ayu men mrityu ki sanbhavna banti hai. vivah purva un rekhaon ka adhyayan avashyak hai. jiski vivah rekha hriday rekha ki or thori si jhuki ho vah shankalu hota hai. vah hriday se kapti aur svarthi hota hai. vivah rekha ki jitni shakhaen hriday rekha ko sparsh karen utne hi jivan sathi ki mrityu ki suchak hai aur hriday rekha ki or jhuk kar hriday rekha ko sparsh nahin bhi karen to aise men bhi kuch samay pashchat jivan sathi ki mrityu hone ki sanbhavna banti hai. yadi vivah rekha ke praranbh men yav chihn ho to pati-patni ka viyog hota hai yah yav ya dvip chihn vivah rekha par jis ayu men ho us ayu men unka viyog hoga jaise yadi vivah rekha ke ant men yah chihn ho to vriddhavastha men viyog ya larai-jhagra hota hai.
yadi vivah rekha dvipyukt hriday rekha ki or jhuke to aisa jatak jannanedriya sanbandhi rog ka shikar hota hai. vivah rekha tuti ho to jis ayu men tuti ho us ayu men jivnsathi ki mrityu ki sanbhavna banti hai. vivah rekha par nakshatra chihn purush ke hath men jivan sangini ki prasav ke samay mrityu ka sandesh deta hai aur yadi nakshatra chihn ki yahi sthiti stri ke hath men ho to pati ki mrityu ka suchak hai. yah vaidhavya yog kahlata hai. is yog men yah yad rahe ki yadi nakshatra yukt vivah rekha choti ungli aur anamika (surya ungli) ke bich se hriday rekha ki or jae to mrityu yog tal jata hai parantu ukt ayu men mansik santap bahut hota hai. aisi rekha parakram aur yash v man ki bhi suchak hai.
spasht vivah rekha surya rekha ko sparsh kare to shubh faldayi hoti hai. vivah pashchat dhan v man-samman milta hai. larki ke hath men aisi rekha achcha aur bhagyavan jivan sathi dilati hai. larke ke hath men aisi rekha achchi patni dilati hai, vah gunvan aur dhanvan hoti hai. vivah rekha se choti-choti rekhaen niche ki or jati hon to aise vyakti ke jivan sathi ka svasthya thik nahin rahta hai. ye rekhaen barik hon to vyakti kisi ke prem jal men fansta hai.