adhunik yug bhag-daud aur vyastata ka yug hai. badhte shahrikaran ne duniya ko chota aur logon ko ek-dusre se anjan kar diya hai. varshon tak sath rahne par bhi ek parivar ke log ek-dusre ki pasand napsand ko achchi tarah se nahin samajh pate hain aur ek-dusre ko nahin samajh pane ki yah sthiti kai bar parivar ke bikhrav ka karan ban jati hai. is jatil samasya ka samadhan jyotish jagat ke madhyam se sarlta se kiya ja sakta hai. jyotish se n keval ap kisi ko purn rup se samajh sakte hain balki isse yah bhi jana ja sakta hai ki sanbandhit vyakti ke shauk kya hain? matra lagn ghar men sthit rashi se vyakti ke vishay men kafi had tak baten jani ja sakti hain jaise vyakti ke khane ke shauk, batchit, rahn-sahan, mitron se sanbandh sabhi ke bare men lagn spasht sanket karta hai. lagn bhav ki rashi kisi bhi vyakti ko samjhne janne ka madhyam ho sakti hai. is alekh ke madhyam se apko vibhinn 12 rashiyon ke vyaktiyon ke vyaktitva ko pahchanne men sahyog prapt hoga - mesh lagn men mesh rashi hone par vyakti ke svabhav men ugrata hone ki sanbhavna rahti hai. iska karan lagn men mangal ki rashi ka hona hai.
isse vyakti men sahas v parakram prachur matra men hota hai. aisa vyakti utsah v josh se bhara hota hai. uske svabhav men urja v shakti ka samavesh hota hai. aise men vyakti mehanat ke kamon se piche nahin hatta hai par vyakti ko apne krodh ko kam karne ka prayas karna chahie kyonki adhik krodh svasthya ke lie achcha nahin hota hai. aise vyakti ko patra lekhan men ruchi ho sakti hai. vah telifon par lanbi-lanbi baten karna pasand karta hai. vah milnsar hota hai jiske falasvarup uske anek mitra hote hain. use hansi-majak karna achcha lagta hai. ghumne ka vah shaukin hota hai. aisa vyakti shighra vishvas kar leta hai jo kabhi-kabhi uske lie hani ka karan banta hai. upay varsh bhar hanuman ji ki upasna karen aur 3 mukhi rudraksh dharan karen. vrishabh lagn men vrishabh rashi ho to vyakti achcha vakta hota hai arthat vah apni baton se logon ko prabhavit karne ki yogyata rakhta hai. vyakti ke svabhav men chaturai hoti hai. vah dhairyavan hota hai. vyakti men chanchlta pai jati hai. vinamra v milnsar hona uske achche gunon me se ek hota hai. uski vani men madhurta hoti hai jo sabka man moh leti hai.
aisa vyakti apne guruon ka samman karne vala hota hai tatha vah apne adhikaron ke prati satark hota hai. vrishabh lagn ke vyakti ko hast kala ka kam achcha lagta hai. use tairaki ka shauk ho sakta hai. vyakti ko bagvani karna achcha lagta hai. is lagn ke vyakti achcha khana banana jante hain v is lagn ke vyakti ko sangit sunna ruchikar lagta hai. upay 6 mukhi ya gauri shankar rudraksh dharan karen. lakshmi ji ke bij mantra ka path karen. mithun mithun rashi lagn men hone par vyakti svabhav se namra hota hai. vani men madhurta hoti hai. use apne priyajnon ka sneh milta hai. vah apne shatruon par vijay prapt karta hai. is lagn ka vyakti buddhiman hota hai islie vah naye vishay ko shighra sikh leta hai. vyakti apni mehanat v lagan ke pakke hote hanai. vyakti ko nirantar kam men lage rahna pasand hota hai. aise vyakti ko gana gane men ruchi hoti hai. vah khel kud men ruchi leta hai. vah grih sajja men ruchi leta hai. use abhinay ka shauk hota hai. islie vah manoranjan ke vishyon ko pasand karta hai. shilp kala use achchi lagti hai, vyakti achchi pentig karna janta hai. upay panna dharan karen. 4 mukhi rudraksh dharan karen.
shri yantra ki sthapna karen. kark jis vyakti ke lagn men kark rashi hoti hai uske adhik mitra hote hain. vah shighra kshamavan hota hai. aise men vyakti logon se adhik samay tak naraj nahin rah sakta hai. vyakti dharmik hota hai. usmen seva bhav hota hai. apne is gun se vah sabka man jit leta hai. vah buddhiman hota hai. vyakti atyadhik bhavuk hota hai. vah dayalu hota hai. vyakti saf dil ka hota hai. use pathan pathan men ruchi hoti hai. use lekhan karna achcha lagta hai. samaj seva ka kam bhi use achcha lagta hai. upay pukhraj dharan karen. sath hi 2 mukhi rudraksh dharan karen. sinh lagn men sinh rashi ho to vyakti utsahi hota hai. vah parakrami bhi hota hai. uske svabhav men kathorta hone ki sanbhavna rahti hai. vah ghumne firne men adhik ruchi leta hai. aisa vyakti iradon se dridh hota hai. apne is gun se use saflta ke naye ayam milte han. vyakti svatantra vicharon ka hota hai. vyakti dikhne men akarshak hota hai. vyakti badon ka adar karta hai. vyakti ko kriket ke khel men ruchi ho sakti hai. vah kala ke sangrah ka shaukin hota hai. logon men vah jald ghul mil jata hai. use sangit sunne men ruchi hoti hai. upay 1 v 14 mukhi rudraksh dharan karen.
mahamrityunjay mantra ka path karen. kanya lagn men kanya rashi hone par vyakti chatur v buddhiman hota hai. vyakti ko sachchai pasand hoti hai. uski ichcha shakti majbut hoti hai. vah vyavharik hota hai. apne vinodi svabhav se vah sabhi ko hansata rahta hai. vah khushmijaj hota hai. aise vyakti ki smaran shakti achchi hoti hai. use bhagya ki apeksha karm par adhik vishvas hota hai. vyakti apne akarshak vyaktitva ke karan viprit ling men lokapriya hota hai. upay panna dharan karen aur 4 mukhi rudraksh dharan karen. tula tula rashi lagn men ho to vyakti ko shubh kam karne men ruchi hoti hai. vah satya bolna pasand karta hai. vah sanvednshil hota hai. vyakti ko shanti pasand hoti hai. vah buddhiman hota hai. vyakti soch vichar karke nirnay leta hai. vyakti ko viprit ling men lokapriyata milti hai. aisa vyakti aj men jita hai, vah kal ki chinta nahi karta hai. vyakti men nyay karne ki yogyata hoti hai islie vah sahi-galat ko jald pahchan leta hai. use khelkud pasand hota hai. vyakti ko apne krodh par niyantran rakhna chahie. use jokhim se bhare khelon men ruchi hoti hai islie use gadiyon ki res ityadi achchi lag sakti hai.
vyakti ko ghumne firne ka shauk hota hai. upay 13 mukhi rudraksh dharan karen. vrishchik vrishchik rashi lagn men hone par vyakti ko apne krodh ko kam karne ka prayas karna chahie. use kathin samay men josh se nahin balki hosh se kam lena chahie. vyakti himmat vala hota hai. uske svabhav men ugrata hoti hai. soch man gahrai pai jati hai. vyakti ko apne bal ka pradarshan karna achcha lagta hai. vyakti honhar hota hai. use apne prayason se saflta milti hai. vyakti ko vastuon ke sangrah ka shauk hota hai. use bunai v bagvani karna bhi achcha lagta hai. vyakti ko sangit men ruchi hoti hai. joging karna use achcha lagta hai. use vyayam karne me ruchi rahti hai. vyakti ko pahadon par ghumna achcha lagta hai. upay munga dharan karen. hanuman ji ki upasna karen. hanuman chalisa ka path niyamit karen. 3 aur 14 mukhi rudraksh dharan karen. dhanu jin vyaktiyon ke janm lagn men dhanu rashi hoti hai ve vinamra svabhav ke hote hain. aisa vyakti buddhiman bhi hota hai. vah gyani hota hai. vyakti hriday se saral hota hai, use sachchai v imandari pasand hoti hai. vyakti ko niti niyamon men rahna achcha lagta hai. aisa vyakti dharmik svabhav ka hota hai.
use adhyayan karna achcha lagta hai. uske dhan men badhotri hoti hai. vyakti apne guruon ka samman karta hai. use sidhi bat karna achcha lagta hai. use vad vivad men ruchi hoti hai. use kitabe padhna bhi achcha lagta hai. apne khoji svabhav ke karan vyakti nai vastuon ki khoj men laga rahta hai. vyakti ko upkrnon ko kholna aur band karna achcha lagta hai. vyakti ko kampyutar khel achche lagte hain. upay 5 mukhi rudraksh dharan karen. shri yantra ki sthapna karen. makar vyakti ke lagn men makar rashi ho to vyakti sahsi hota hai. usmen santosh bhi bharpur hota hai. vah svabhav se ganbhir hota hai. aisa vyakti apne bhagya par nahin apitu karm par vishvas karta hai. vyakti ko nirashavadi banne se bachna chahie. vyakti ko samajik niyamon men rahakar kam karna achcha lagta hai. vah samaj seva men bhi ruchi leta hai. vyakti ko takniki vishyon men ruchi rahti hai. aise vyakti ko kusangti ke logon se dur rahne ka prayas karna chahie. vyakti nyay pasand hota hai. vyakti ko chitra banane ka shauk hone ki sanbhavna hai. use tairaki ka shauk hota hai. use jyotish vidya ko janne men ruchi rahti hai. upay shiv ji ki upasna v 07 mukhi rudraksh dharan karen.
kunbh vyakti ke lagn men kumbh rashi ho to vyakti sthir buddhi ka hota hai. vah dhairya se kam leta hai. vyakti adarshavadi hota hai. vyakti ke atmavishvas men kuch kami rahne ki sanbhavna hoti hai. vyakti mehnti hota hai. vah lagan se kam karta hai. vah vishal hriday ka svami hota hai. vyakti sajjan v khoji svabhav ka hota hai. is lagn ke vyakti jis par vishvas karte han us par apna vishvas banaye rakhte hain. vyakti ko upkrnon ko kholne band karne ka kam achcha lagta hai. vyakti ko gadiyon ka shauk rahta hai. use kar resing pasand hota hai. judo karate ke khel men uski ruchi hoti hai. vyakti ko abhinay karna achcha lagne ki sambhavna rahti hai. use dans karne me ruchi rahti hai. vyakti ko haki ka khel achcha lagta hai. mashinon ke upakaran uske lie khilaunon ki tarah hote han. upay 14 mukhi rudraksh dharan karen. hanuman ji ki upasna karen.
min lagn men min rashi hone par vyakti apne sab kam soch samajh kar karta hai. use adhyayan men ruchi rahti hai. uske vyay bhi adhik hone ki sanbhavna rahti hai. aise men vyakti ko apne vyayon par niyantran rakhne ka prayas karna chahie. is lagn ka vyakti apne nirnayon par sthir rahta hai. apne vishay men puri yogyata rakhta hai tatha anubhav ke sath uski yogyata badhti jati hai. vyakti achcha salahkar hota hai. use apne mitron ki sahayta milti hai. us vyakti ko bagvani ka shauk rahta hai, kushti dekhne ka shauk hota hai, vah shilp kala men ruchi leta hai, sangit sunna use achcha lagta hai tatha vah khana banane men yogyata rakhta hai. upay vishnu bhagvan ki upasna karen. 5 mukhi rudraksh dharan karen aur sfatik shri yantra par chandan ke itra se abhishek karen.