rog evan upay manav sharir panch tatvon se milakar bana hai- agni, prithvi, vayu, akash evan jal. in tatvon ka jab manav sharir men santulan bana rahta hai, manushya prasannachitt evan uttam vyaktitva vala nirog v svasth rahta hai.
manav sharir men inhin tatvon ke asantulit hone par manushya rogagrast, chirchira, dukhon se pirit evan kantihin ho jata hai. manav sharir men tatvon ka asantulan sadharan bhasha men rog kahlata hai. isi rog ka upay karne ke lie vyakti alg-alag tarike apnata hai.
jaise ayurved chikitsa, elopaithi chikitsa, homyopaithi chikitsa, sparsh chikitsa, reki, ekyupankchar evan ekyupreshar adi ya jyotishiya upay jaise ratn, yantra, dan, visarjan adi tatha in sabhi paddhatiyon dvara jab asflta hi hath lagti hai to adhyatmik shakti ki khoj men vyakti sadhuon v rishi- muniyon ke pas unka ashirvad lene hetu jata hai.
ayurved chikitsa ki khoj bharat ke rishi-muniyon ke dvara ki gayi. unhonne apne anubhav aur gyan ke adhar par kuch aisi jari-butiyon ki khoj ki jisse sharir men jis tatva ki kami ho use pura kiya ja sake. jaise hi tatva ki apurti ho jati hai, sharir ke ang punah kriyashil ho jate hain aur rog dur ho jata hai. ailopethi men bhi rasaynik kriya dvara tatvon ki kami ko pura karne ki koshish ki jati hai ya rasayn-kriya dvara vishanuon ko kamjor kar diya jata hai jisse sharir punah kriyashil ho jata hai.
homyopethi men mana jata hai ki jis padarth ke karan rog hai yadi us padarth ko usse adhik shakti ke rup men sharir men preshit karen to pahle vala padarth nishkriya ho jata hai aur manushya svasth ho jata hai. isi sutra ke adhar par homyopethi ki davaen taiyar ki jati hai. manushya rogi kyon hota hai. mukhyatya rog ka mastishk se sidha sanbandh paya gaya hai.
achanak kisi bare santap ke karan hridyaghat ki ashanka 30 guna tak barh jati hai. aksar dekha jata hai ki bujurg danpti men yadi ek ki maut ho jay to dusre ki bhi maut kuch hi antral men ho jati hai. karan hai ki mastishk vyakti ki soch ke anurup sharir men vibhinn rason ka srav karta hai v kuch ka utpadan band kar deta hai jo ki rog ka mukhya karan bante hain.
is kriya ko santulit aur suvyavasthit karne ke lie ham chikitsa-paddhati ka sahara lete hain. ekyupreshar ya ekyupankchar men ham kisi narva ke upar preshar dalakar jagrat karne ki koshish karte hain jisse vah mastishk ko sahi sandesh bheje aur mastishk sahi rasayan kriya karne ka adesh de.
sparsh paddhati men ya reki men ham manushya ke mastishk ko brahmandiya urja se paripurn karne ki koshish karte hain jisse vah svayan sahi karya karna shuru kar de aur sharir ki rasayan kriyaen sahi ho jaen. jyotish men bhi anek upchar prachlit hai jaise koi rog ho jata hai to ham use kisi grah ka laeket adi dharan karne ke lie batlate hain anyatha use kisi mantra jap ya anushthan ke lie kahte hain.
rogon se chutkare ke lie mahamrityunjay mantra jap ke bare men to sabhi jante hain. kabhi kisi vastu-vishesh ka dan ya visarjan bhi bataya jata hai. ratna-dharan to mukhya upay hai hi. ye upay kaise kam karte hain? ratn dharan karne se vyakti ke sharir men vanchit sakaratmak urja ka pravesh surya ki kirnon ke madhyam se hota hai.
surya se sabhi prakar ke rangon se urja prapt hoti hai. usmen se jis urja ka abhav hota hai, vah ratn ke madhyam se sharir men pravesh kar jati hai, jisse hamare sharir aur mastishk ka niyantran v santulan bana rahta hai aur ham svasth mahsus karte hain. in ratnon ko anguthi, laeket, mala, breslet adi kisi bhi rup men dharan kiya ja sakta hai.
mantron ke dvara ham ek vishisht prakar ki dhvani paida karte hain tatha mantra hamare vatavaran men sakaratmak tarangon ko utpann karte hain jisse vanchit urja ki prapti se ham rogmukt ho jate hain. iske atirikt ham us grah ko bhi apne anukul bana pate hain jo hamare liye pratikul hote hain. kaun sa grah kis vyakti ke lie anukul athva pratikul hai yah ham us jatak ki janmakundli ya hastarekha dvara jan sakte hain.
dan snan, vrat adi se jatak ko mansik shanti ka anubhav hota hai, jisse uske sharir men sakaratmak urja ka sanchar hota hai tatha nakaratmak urja ka nirakaran ho jata hai jisse sharir men anukul rasaynik kriyaain hone se jatak apne ko rogamukt aur svasth mahsus karta hai. reki se sparsh dvara ya bina sparsh kiye rogon ka upchar kiya jata hai.
vyakti ke andar sakaratmak evan nakaratmak donon prakar ki urjaain hoti hai. is paddhati dvara jatak ke sharir men sakaratmak urjaon ka sanchar reki mastar apne gyan aur anubhav ke adhar par karta hai jisse ki jatak apne apko svasth mahsus karta hai. manushya ke sharir men jo chakra hote hain, unmen se kuch ya to kriyahin ho jate hain ya adhik sakriya ho jate hain.
pranik hiling ke dvara un urja chakron ko vyavasthit v santulit karke jatak ko svasth karne ka prayas kiya jata hai. kai bar jatak ko sangit, bhajan, kirtan adi ke prabhav se bhi thik kiya jata hai.
udaharan ke liye yadi kisi vyakti ko blad preshar ki bimari ho to usko yadi kisi bhajn-kirtan ka anand mil jaye to vah apne apko tanav mukt mahsus karega tatha uske sharir v mastishk men aisi rasaynik kriyaain svatah hone lagengi jisse jatak ka bladapreshar svatah samanya ho jayega.
mastishk jaisa sochta hai vaisa hi sharir karta hai aur kiye gaye karyon ke fal se manushya svasth ya rogi hota hai. udaharan ke lie yadi koi vyakti dan, punya, dharmik karya ya sakaratmak karya karta hai to manushya ko mansik shanti evan prasannata ka anubhav hota hai jiske karan sharir men sakaratmak rasaynik kriyaain hoti hain.
jiske karan manushya svasth mahsus karta hai tatha uski abha evan kanti uske mukhmandal par dekhi ja sakti hai. yahi karan hai ki hamare rishi-muni itne adhik varshon tak svasth rahte the aur dirghayu hote the kyonki ve hamesha prakriti ke najdik rahakar kam, krodh, lobh, moh se vimukt jivnyapan karte the tatha hamesha apne apko adhyatmik karyon men sanlagn rakhte the jisse unko nakaratmak urja sparsh bhi nahin kar pati thi.
iske viprit aj ke adhunik yug men manushya, kam, krodh, lobh, moh ke sath sath pratiyogita aur pratispardha vali is duniya ki bhagdaur men uljha rahta hai, jis karan vah n to apne jivan ko niyamit rup se pata hai aur n hi jivan ki achar-sanhita ka palan kar pata hai, jiske karan manushya men sadaiv nakaratmak urja ka sanchar hota rahta hai tatha vyakti jaldi-jaldi rogagrast ho jata hai ya alpa-ayu men hi uski jivn-lila samapt ho jati hai.
sabhi prakar ki nakaratmak urja se bachne evan sakaratmak urja ke sanchar ke lie samanya manushya ko svasth jivan jine ke lie hamesha galat karyon se bachte hue, ayurved ke siddhanton ka yathasanbhav palan karna chahie. pathya-apathya bhojan ke prati sachet rahte hue apne jivan men karya-vyastata aur vishram ka santulan banate hue, vyayam adi ka to dhyan rakhna hi chahie, sath hi kuch aise karm bhi karte rahna chahie jisse ki mansik shanti bani rahe.
nishkarshatah sakaratmak urja svasth jivan ka adhar hai. ise kai madhyamon se paya ja sakta hai. bhagvt-sadhna iska sabse bara srot hai. iski kami ke karan hi hamen urja ka avahan vaikalpik sroton jaise reki, jyotishiya upay ya chikitsa dvara karna parta hai.
anek rogon jaise madhumeh, blad-preshar, mansik rog, joron men dard, hriday rog adi se to keval sakaratmak urja ke pravah se hi mukti prapt ki ja sakti hai. yadi ap kisi mantra ka jap ya bhagvt-dhyan satat rup se karte hain to ye rog apke pas aenge hi nahin aur honge bhi to shighra hi avashya dur ho jaenge.