prashna: rudraksh kaise dharan karen?
uttara: rudraksh somvar ko pratah kal kachche dudh se aur fir gangajal se dhokar v ashtagandh lagakar ¬ namah shivay mantra ka jap kar dharan karna chahie.
prashna: kya ekmukhi rudraksh milta hai?
uttara: rudraksh narangi ki tarah hota hai, jismen alg-alag fanke hoti hain. in fankon ko mukh kahte hain. jitni fanken hoti hain, utne hi unmen bij hote hain, jis prakar ek fank ki nanrgi nahin hoti, usi prakar ek mukhi rudraksh bhi samanyatah nahin hota hai. lekin kuch prajatiyon men jaise kajudana prajapti men, ek mukhi rudraksh prapt hai.
prashna: rudraksh ke kya upyog hain?
uttara: rudraksh urja v shaktidayak hote hain. ye grahon ki ashubhta ko kam kar unki shubhta barhate hain. atah ye kisi bhi karyakshetra men upyog men lae ja sakte hain. jaise svasthya ki anukulta, shiksha men saflta, vyavsay men unnati, sthayi shanti, mukdme adi men vijay v shakti prapt karne hetu inka upyog vanchniya hai.
prashna: rudraksh aur ratn men kya antar hai?
uttara: rudraksh grahon ko sadaiv vyavasthit karte hain, unhen shubh bante hain, jabki ratn grahon ko shaktishali bante hain- chahe ve shubh hon ya ashubh. ratnon ka prabhav unki shuddhata aur varn par nirbhar karta hai. rudrakshon ka prabhav mukh par nirbhar karta hai. ratnon ka sharir se sparsh avashyak hai, jabki rudraksh ki apni abha hoti hai aur ve samip rakhne par bhi prabhav chorte hain. atah jab koi grah ashubh ho, to uski shubhta hetu rudraksh hi dharan karna uchit hai.
prashna: rudraksh mala ka vanchit fal nahin mil raha ho to kya karen?
uttara: kisi bhi rudraksh ka purn fal tin se chah mahine men prapt hota hai aur lagabhag ek varsh tak men sthiti men antar dikhai deta hai. atah rudraksh dharan karne ke bad pratiksha karen. dusre, samasya v uski ganbhirta ke anurup kitne rudraksh v kitne mukhi rudraksh dharan karen, iska kisi vidvan se paramarsh le len, labh avashya hoga.
prashna: kya rudraksh keval hindu pahan sakte hain?
uttara: koi bhi aushdhi kisi dharm ya jati vishesh ke lie nahin hoti, apitu samast manav jati ke lie hoti hai. rudraksh ka varnan keval hindu dharm granthon men avashya hai, lekin iska upyog koi bhi kar sakta hai.
prashna: kitne rudraksh pahne?
uttara: mala mane 27, 54 ya 108 danen shubh mane gae hain. kanthi 32 danon ka, bajuband men 6, 11 ya 15 danon ka v kamar men 5 danon ka vidhan hai. manibandh hetu 12, 14 ya 27 dane shubh hain. lekin sankhya ki koi sima nahin hai.
prashna: kya parivar ke sadasya ek dusre ki mala pahan sakte hain?
uttara: jab koi rudraksh dharan karta hai tab uske sath us vyakti ki abha v karm adi ki chap bhi uske dvara dharan ki hui vastu par lag jati hai. atah dusre ki dharan ki hui mala ya koi anya vastu dharan karna sarvada varjit hai.
prashna: kya striyan rudraksh dharan kar sakti hain.
uttara: shiv sadaiv shakti ke sath hi purn hain. daivi shaktiyon me ling bhed nahin hota hai. stri-purush ka bhed keval prithvi lok me hi hota hai. rudraksh, jismen daivi shaktiyan vidyaman hain, striyan avashya dharan kar sakti hain. gauri shankar rudraksh v gauri ganesh rudraksh khasakar striyon ke lie hi hain- pahla safal vaivahik jivan ke lie evan dusra santan sukh ke lie.
prashna: kya rajasvala striyan rudraksh pahan sakti hain?
uttara: shuchita ki drishti se rajodarshan ke tin dinon tak rudraksh n dharan kiya jae, to achcha hai.
prashna: kya rat ko sot samay rudraksh pahnna chahie?
uttara: rat ko sote samay rudraksh pahnne se prathmtah rudraksh ke khandit hone ka dar rahta hai. sath hi sone men bhi asuvidha hoti hai. pratah kal bhi shauchadi ki ashuddhi rahti hain atah uttam yahi hai ki rat ko rudraksh n pahnen. vaise, sote samay rudraksh pahnna varjit nahin hai.
prashna: kya rudraksh pahanakar mans kha sakte hain?
uttara: mans v madira adi kal se bhojan ke rup men grahya rahe hain. shanti v shakti par keval sakahariyon ka varchasva nahin hai. rudraksh me shuddhikaran ki shakti hoti hai, atah ap bhojan kuch bhi karen, rudraksh ki mahima v karyakshamata isse ghatti nahin hai.
prashna: rudraksh pahnte samay kya savdhaniyan bartni chahie?
uttara: rudraksh pahnne men kisi vishesh savdhani ki avashyakta nahin hai, lekin jis prakar daivi shaktiyon ko ham pavitra vatavaran men rakhne ka prayas karte hain usi prakar rudraksh pahanakar shuchita barti jae, to uttam hai. atah sadharntya rudraksh ko rat ko utar kar rakh dena chahie aur pratah snanadi ke pashchat mantra japakar dharan karna chahie. isse yah ratri v pratah ki ashuchita se bachakar jap ki urja se paripurn hokar hamen urja pradan karta hai.
prashna: kya rudraksh sabhi tvacha ke lie upyukt hai?
uttara: rudraksh ek komal v jaiv padarth hai. atah isse kisi prakar ki elarji adi ki koi shikayat nahin milti hai. kisi ki tvacha kitni bhi sanvednshil kyon n ho, vah ise dharan kar sakta hai.
prashna: kya asli rudraksh pani men dubna chahie?
uttara: pani men dub jana rudraksh ke asli hone ki pahchan nahin hai. rudraksh ek prakar ka kath hai, jiska ghanatva lagabhag pani ke barabar hota hai- kabhi kam to kabhi jyada. kuch rudraksh dubte hain, to kuch nahin. jo nahin dubte ve bhi asli ho sakte hain aur jo dubte hain ve bhi nakli ho sakte hain.
prashna: kya asli rudraksh tanbe ke do sikkon ke madhya ghumna chahie?
uttara: rudraksh men kuch bindu nikle hote hain. jiske karan do sikkon ke bich vah ghumta najar ata hai. lekin yah shuddhata ki pahchan nahin hai, kyonki is prakar ki koi bhi vastu is sthiti men ghum sakti hai.
prashna: rudraksh ki shuddhata ki kya pahchan hai?
uttara: eksa-re rudraksh ki sarvashreshth pahchan vidhi hai. ismen rudraksh ke mukh bij rup men dikhai de jate hain. vahin kritrim jor adi bhi pakar men a jate hain. maikroskop dvara bhi mukh ki lakir ki gahrai ke bhitar ek safed ubhri hui lakir-si dekhi ja sakti hai, jaisi ki chinti ke piche-piche ek lakir si dikhai deti hai. yahi shuddhata ki purn pahchan hai.