jivan men svasthya aur madhurta hetu anbar, kidni ston aur opal vinay garg aksar is tarah ke vakya hamen sunne ya parhne ko milte hain- ''jan hai to jahan hai'', ''pahla sukh nirogi kaya'', ''svasth sharir men svasth mastishk rahta hai.'' ''svasthya hi dhan hai''. yah vastav men sach hai. yadi kisi vyakti ko achche svasthya ki kimat ya mahatva ko janna ho, to kisi aspatal men jakar dekhe ki koi marij jivan pane ke lie maut se pratyek kshan kis prakar sangharsh kar raha hota hai. kai bar aisi sthiti utpann ho jati hai
ki doktar bhi kah dete hain ki bimari ilaj se age bhag rahi hai arthat jitna ilaj karte hain, bimari usse kahin age barh jati hai. aisi halat men ehsas hota hai ki kisi vyakti ka svasthya yadi achcha hai, to vah duniya ka sabse dhani aur samriddh vyakti hai. atah isse yah bat siddh hoti hai ki achcha svasthya hi sarvashreshth dhan hai. yadi ap nirogi tatha svasth vyakti hain to is svasthya ko banae rakhne ki avashyakta hoti hai aur yadi ap asvasth hain to ilaj ki avashyakta hoti hai. atah hamen donon hi sthitiyon men svasthya ke prati sajag rahne ki avashyakta hai. aksar log ilaj karvane ke lie sabse pahle angreji davaiyon ki taraf jate hain, parantu unse jab sudhar nahin hota hai ya unke kuprabhav barh jate hain, to ayurvedik ya homyopaithik ilaj ki taraf jate hain. jab vahan bhi koi aram nahin milta hai to gharelu ya prakritik chikitsa ki or jate hain.
jab yahan bhi aram nahin milta hai, to har thakakar baith jate hain aur man lete hain ki yah bimari to ab sharir ke sath hi jaegi ya iska ilaj sanbhav nahin hai tatha sthiti se samjhauta karke jina shuru kar dete hain. lekin hamare rishi muniyon ne ek aur paddhati ki khoj ki hai aur apne gyan aur anubhav ke adhar par chikitsa paddhati banai hai aur vah hai 'ratn chikitsa'. ratn aur uparatn hamare bhavishya ko sajane-sanvarne aur hamen sukh, shanti tatha samriddhi dene ke sath-sath grahon ke anisht prabhavon ko to dur karte hi hain, sath hi hamare svasthya ki raksha tatha bimari ke ilaj ke lie bhi upyog men ate hain.
chikitsa hetu ajakal sarvadhik prachlit aur prasiddh uparatn hain - anbar, kidni ston (jed) tatha opal. anbar ston : yah ek bahut hi halka ratn hai. yah pile, bhure ya shahad ke rang ka hota hai. is ratn men prithvi ke tukron, pattiyon, kire-makoron adi ke chitra-se dikhai dete hain. yah ratn sharir tatha man donon ko svasth rakhta hai. ise pahnne se vyakti men uttejna ki bhavna par niyantran hota hai. kai bar vyakti chahe anchahe uttejna men ya jaldabaji men galat karya kar baithta hai, jisse bari-bari durghatanaen ho jati hain. aisi sthiti men uska raktachap barh jata hai ya avashyakta se adhik ghat jata hai. anbar ston hamare raktachap ko niyantrit karta hai tatha manisak udveg ko niyantrit karte hue hamari urja ko sahi marg par lagata hai, jisse ham puri mansik tanmayata ke sath safltapurvak karya kar sakte hain.
is ratn ko dharan karne se man men anishchitta ki bhavna samapt hoti hai. hamare jivan ke utar-charhav ke karan jo mansik dabav banta hai, use niyantrit karke yah ratn hamare mastishk ko santulit banae rakhta hai. yah hamare sharir men chipi shakti ko ujagar karne men saksham hai, kyonki ismen rinatmak vidyut shakti hoti hai. jis tarah chunbak ka ek sira uske dusre sire ko apni or akarshit karta hai, usi prakar anbar ston vyakti men dhanatmak urja ko ubharakar use urjavan, shaktishali tatha kriyashil banata hai. upyog vidhi anbar ratn ko anya ratnon ki bhanti loket ya anguthi men dharan kiya ja sakta hai.
ise shastron ke anusar guru grah ka uparatn mana gaya hai. atah guruvar ko, guru ki hora men pratah kal gangajal aur kachche dudh se shuddh karke guru ke nimnalikhit mantra ke uchcharan ke sath tarjani men dharan karna chahie. guru ka mantra -kk gran grin graun sah guruve namah. yah ratn sone ya chandi ki anguthi men dharan karna chahie. yadi anguthi dharan nahin karna chahen, to loket ke rup men bhi dharan kar sakte hain. ise hamesha dharan karne se raktachap hamesha niyantrit rahta hai tatha raktachap ki aniyamitta se hone vali dil ki bimari jaise ganbhir rogon se bhi bacha ja sakta hai.
is ratn ko dharan karne ke atirikt ise jal men, visheshakar gulab jal men, dalakar us jal ka sevan karne se is ratn ka prabhav sau guna tak barh jata hai. yadi sanbhav ho, to adhe gilas pani men panch anbar ratn ko dalakar rat bhar chor den aur subah khali pet us pani ko pien. sanbhav ho, to din men bhi usi men se pani len, upar varnit sabhi rogon se mukti milegi tatha apka sharir svasth, kantivan tatha urjavan banega aur apka mansik santulan bana rahega. sabhi karyon men apka man lagega tatha har karya men abhutpurva saflta bhi milegi. yah ratn vrish rashi valon arthat 20 aprail se 20 mai ke bich janme logon ke lie jivan ratn ke rup men aur sinh rashi valon arthat 23 julai se 22 agast ke bich janme logon ke lie bhagya ratn ke rup men bhi karya karta hai. kidni ston (jed) yah gahre hare rang ka aparadarshi ratn hota hai.
iski upri satah par kidni ki akriti dikhai deti hai. yah ratn hepetait ki kism ka ratn hai. jaisa ki nam se hi pata chalta hai, yah ratn kidni se sanbandhit bimariyon se mukti ke lie prayog men laya jata hai. iske atirikt yah ratn hriday, pet adi ki bimari se bachav ke lie bhi prayog men laya jata hai. gurde se sanbandhit bimari aur iske falasvarup daylisis par rakhe gae rogiyon ke lie ya fir jinhen doktar ne gurda badlvane ki salah di ho unke yah ratn atyant labhdayak v prabhavi hota hai. yah ratn jitna dekhne men sadharan hota hai, iske labh utne hi chamatkari hote hain.
jinka svasthya upar varnit bimari ke karan thik nahin rahta ho aur jivan dubhar ho gaya ho, un logon ko yah ratn avashya dharan karna chahie. upyog vidhi : is ratn ko anbar ratn ke saman anguthi ya loket men dharan kiya ja sakta hai. ise budh grah se sanbandhit ratn mana jata hai. ise budhvar ko budh ki hora men budh ke nimnalikhit mantra se abhimantrit aur gangajal v panchamrit se shuddh karke sone ya chandi ki dhatu men dharan karna chahie. budh ka mantra -kk bran brin braun sah budhay namah. is ratn ko dharan karne ke sath-sath iska jal grahan kiya jae, to iska prabhav bhi anbar ratn ki tarah sau guna barh jata hai. rat ko kanch ke ek gilas men adha gilas pani bharakar usmen char-panch kidni ston dalakar chor den. subah khali pet vah pani pi jaen aur fir se taja pani bhar den. yah kriya niyamit rup se karte rahen, ratn ka prabhav dhire-dhire apko rogmukt kar dega aur ap svasth hokar anandamay jivan vyatit kar sakenge. yah ratn prem akarshan, prem vriddhi, durghatana se bachav, dhan vriddhi aur dhan ke sadupyog ki shakti ko bhi barhata hai.
opal : yah hire ka uparatn hai. hire ke multah do uparatn hain - jarkin aur opal. jarkin ka svabhav garm hota hai, jabki opal ka svabhav thanda. jarkin ka svabhav garm hone ke karan yah kamukta ko barhata hai, jabki opal hamare sukh, samriddhi, prem, madhurya evan apsi sanbandhon ko sudharta hai. jab vyakti yuvavastha aur vriddhavastha ke bich arthat 45 varsh ke lagabhag hota hai, us samay hire ke sthan par jarkin ki salah n dekar opal ratn pahnne ki salah di jati hai, jo hire ke saman hi karya karta hai. parantu vyakti ki kamashakti samanya hi rahti hai. jab pati-patni ke bich sanbandhon men karvahat ya darar ane lage, to opal ratn dharan kar sanbandhon ko punarjivit karke apsi madhurya ko barhaya ja sakta hai. iske atirikt yah ratn mansik star ki bhi vriddhi karta hai.
jab vyakti apne ap ko mansik taur par nirash aur thaka hua mahsus karta hai, us samay opal man ko punah urjavan karke nae josh aur umang ke sath jine ki urja pradan karta hai aur mand aur bujha hua man punah romanch aur utsah se bhar uthta hai. is tarah ise dharan karne se vyakti mansik avsad ki sthiti se bach sakta hai. upyog vidhi : yah safed rang ka halka ratn hota hai. iski satah se satrangi prakash niklte rahte hain. dekhne se aisa pratit hota hai mano iski satah par jagh-jagah se ag ki chingariyan nikal rahi hon. is uparatn ko chandi ki anguthi aur loket men dharan kiya jata hai.
ise shukravar ko shukra ki hora men shukra ke nimnalikhit mantra se abhimantrit karke sidhe hath ki anamika men dharan karna chahie. pahnne se purva ise kachche dudh aur gangajal se shuddh avashya kar lena chahie. shukra ka mantra -kk dran drin draun sah shukray namah . janmakundli men shukra jal tatva rashi men sthit ho, to bhi shukra ke lie opal pahnne ki salah di jati hai. jal tatva rashiyan hain - kark, vrishchik aur min. is prakar opal ratn dharan karke ap apne jivan ko aur adhik sukhi, samriddh aur madhur bana sakte hain. ise yadi ap apne premi ya premika ko uphar men anguthi ya loket ke rup men bhent svarup dete hain, to apke bich paraspar akarshan barhega v prem men vriddhi hogi. opal ko kare ya churi men jarvakar ya breslet men pahnne se bhi saman labh ki prapti hoti hai. ye sabhi uparatn fyuchar point ke karyalay men upalabdh hain.