solah sanskaron men namakaran sanskar ka apna ek vishesh mahatva hai, kisi bhi padarth, sthan ya vyakti ke gun athva avgun adi ke nirnay men uska nam mahatvapurn sthan rakhta hai. dharmik tatha suprasiddh aitihasik granthon ke charitra naykon, khalnaykon tatha anyanya patron ke nam dekhakar achanbha hota hai ki kaise inke charitranurup nam purva men hi rakh die gae the. duryodhan ke nam se akasmat ek aise yoddha ki chavi utarakar samne a jati hai jo anyaypurn yuddh men vishvas rakhta ho. bhim nam se bhimkay tatha mahabli yoddha ka rup samne a jata hai, arjun nam se aise vyakti ka bodh hota hai jo kathin se kathin paristhiti men bhi sthir chitt rahe. dusshasan nam sunte hi man glani tatha dhikkar se bhar uthta hai.
jahan ram, krishn, shiv, sita, isa, guru nanak adi maryada ke adarshapalak hone ke karan svatah pratyek prani ke man men raman karne lagte hain vahin ravan, kans, bhasmasur, manthra, kaikeyi adi nam sunte hi man vishakt ho uthta hai. tatparya yah hai ki arya jati men purva men namakaran se pahle gun-avgun tatha charitra ka khub achchi tarah se vichar kar liya jata tha. yatha nam charitrik gun bhi vyakti men vaise hi bhar jate the. yadi kisi alp buddhi balak ko dhurt kahin ka, pagal, bhainse, gurgobar sinh, kahil, suar, paji adi nam upnamon se nirantar sanbodhit kiya jata hai, to kuch samay bad vah yatha nam vaise hi vyavhar karne lagta hai. arthat vaisa hi ban jata hai.
kayrta, virta, prem ras, bhakti ras adi ka pratik kisi prachin charitra ka nam yadi niyamit rup se kisi ke lie prayog kiya jata hai to us charitra ki chavi nam ke sath hriday men utrne lagti hai. vyakti ke bhavishya nirman men nam ek pramukh bhumika nibhata hai. nam ki sarthakata ke sath-sath usmen dhvani saukarya ka bhi dhyan rakhna chahie. koi nam bhale hi sundar se sundar arth vala ho, yadi uske uchcharan men klishtata ke karan kathinai ati ho to vah nam lokapriya nahin ho pata. saikron filmi charitron ke badle hue nam is bat ki svatah pushti kar denge yatha dilip kumar, pradip kumar, kishor kumar, nimmi, madhubala, mina kumari, lata, madhuri, naushad adi. shastrakaron ne isilie nam chayan ke lie kuch vaigyanik tatha vivechnatmak niyam sunishchit kie hain. in sabka varnan sarvatha dhvani vigyan tatha manovigyan ke adhar par kiya gaya hai.
sujhav diya gaya hai ki do, tin athva char akshar vale ese nam rakhe jaen jinke ant men ghosh- g gh, j jh, d dh, d dh n, b bh m, y r l v h men se koi akshar hona chahie. madhya men antasth y r l v men se koi tatha ant men dirgh svar sanyukt, kridant nam rakhen taddhit nahin. striyon ke nam visham akshar ke akarant hone chahie jisse purushon ki tulna men unse adhik komlta dhvanit ho. kridant ka arth hai dhatuon se vikar lagakar bane hue shabd jaise ram, chandra, prakash, anand adi shabd ram, chadi, kasri, nadi adi dhatuon se vikrit hokar bane hain. islie nam aise hon jinke ant men uparyukt shabd aen. taddhit ka arth hai sangyavachak shabdon se vikrit hokar bane shabd yatha pandav, vasudev, bhagvan dayalu, kripalu adi. ye pandu, vasu, bhag, daya, kripa adi shabdon se taddhit pratyay lagakar bane shabd hain. taddhit nam klisht hone ke karan hi tyajya mane gae hain.