vibhinn upaskon evan bhakton ki ishvar prapti ki rochak kathaen rashmi chaudhri prastut lekh men puranon ke adhar par kuch rochak aitihasik kathaon ka ullekh kiya gaya hai. iske dvara pathkgnon ko yah jankari milegi ki kis prakar raja vikramaditya evan unke vanshjon ko ishvar prapti hui aur kaise ve bhagavadkripa ke bhagi ban sake. raja vikramaditya ki katha : prachin kal ke agnivanshiya rajaon men raja shankh ka ullekh milta hai. usne virmti namak ek devangna se gandharva sen namak putra ko prapt kiya. putra ke janm samay akash se pushpavrishti hui tatha shital mand sugandh vayu bahne lagi. usi samay shishyon sahit 'shivdrishti' namak ek brahman tapasya ke liye van men gaye aur shiv ki aradhna se ve shivasvarup ho gaye. tin hajar varsh purn hone par jab kaliyug ka agaman hua, tab shakon ke vinash aur arya dharm ki vriddhi ke liye ve shivdrishti hi kailash parvat se bhagvan shankar ki agya pakar prithvi par 'vikramaditya' nam se prasiddh huye. ve bachapan se mahan, buddhiman tatha mata-pita ko anand dene vale the. buddhi visharad vikramaditya panch varsh ki balyavastha men hi tap karne van ko chale gaye.
barah varshon tak tap karne ke uprant unhen ishvar prapti hui aur ve aishvarya sanpann ho gaye. unhonne 'ambavti' namak divya nagri men akar battis murtiyon se samanvit, bhagvan shiv dvara abhirakshit, ramniya aur divya sinhasan ko sushobhit kiya. bhagvti parvati dvara preshit ek vaital unki raksha men sadaiv tatpar rahta tha. us vir raja vikramaditya ne mahakaleshvar men jakar devadhidev mahadev ki puja- archana ki aur anek vyuhon se paripurn dharm sabha ka nirman kiya. usne anek lataon se purn, pushpanvit sthan par apne divya sinhasan ko sthapit kiya tatha ved-vedang parangat mukhay brahmanon ko bulakar vidhivat unki puja kar unse anek dharma-gathaen sunin. usi samay 'betal' namak devta brahman ka rup dharan kar 'apki jay ho' aisa kahte hue vahan aya aur raja ka abhivadan kar asan par baith gaya. kalantar men isi rudra svarup baital dvara aitihasik rochak akhyan vikramaditya ko sunaye gaye. vikram betal ki inhin kathaon ko ''baital panchvishti'' ke nam se sangrahit bhi kiya gaya.
tin hajar varsh purn hone par jab kaliyug ka agaman hua, tab shakon ke vinash aur arya dharm ki vriddhi ke liye ve shivdrishti hi kailash parvat se bhagvan shankar ki agya pakar prithvi par 'vikramaditya' nam se prasiddh huye.
raja shalivahan tatha isa masih ki katha - raja vikramaditya ke svargalok chale jane ke pashchat bahut se raja huye. us samay bharatavarsh men atharah rajya the. lagabhag ek sau varsh vyatit ho jane par shak adi videshi raja anek logon ke sath sindhu nadi ko par kar arya desh men aye. unhonne aryon ko jitakar unka dhan lut liya aur vapas apne desh ko laut gaye. isi samay vikramaditya ka pautra raja 'shalivahn' sinhasan par asin hua. usne shak, chin adi deshon ki sena par vijay prapt ki, usne sindhu pradesh ko aryon ka uttam sthan nirdharit kiya aur malechchon ke liye sindhu ke us par ka pradesh niyat kiya. ek samay ki bat hai, vah shakadhish shalivahan him shikhar par gaya. usne hun desh ke madhya sthit parvat par ek divya sundar purush ko dekha. uska sharir gora tha aur usne shvet vastra dharan kiye the. us vyakti ko dekhakar shakraj ne prasannata se pucha, ''ap kaun hain?'' usne kaha - 'main ishputra hun. raja ne pucha- apka kaun sa dharm hai? ishputra ne kaha - maharaj, satya ka vinash ho jane par maryada rahit mlechch pradesh men mai masih banakar aya aur dasyuon ke madhya isha masi namak ki ek kanya utpann hui, usi ko dasyuon se prapt kar mainne masihatva prapt kiya. mainne mlechchon men jis dharm ki sthapna ki, use suniye. sabse pahle manas aur daihik mal ko nikalakar sharir ko purnataya nirmal kar lena chahiye. fir isht devta ka jap karna chahiye, satya vani bolni chahiye, nyay se chalna chahiye aur man ko ekagrakar suryamandal men sthit parmatma ki puja karni chahie kyonki ishvar aur surya men samanta hai. parmatma bhi achal hai aur surya bhi achal hai. surya anitya bhuton ke sar ka charo or se akarshan karte hain. he bhupal. aise kritya se mere hriday men nitya vishuddh kalyankari ish murti prapt hui hai. isliye mera nam 'isha masih' pratishthit hua. yah sunakar raja shalivahan ne us mlechch pujya ko pranam kiya aur unki kripa se apne rajya men akar ashvamedh yagya kiya aur sath varsh tak rajya karke ant men svargalok chala gaya. raja bhoj ki katha : shalivahan ke vansh men das raja huye. unhonne panch sau varshon tak shasan kiya. tadantar bhumandal par dhan-maryada lupt hone lagi. shalivahan ke vansh men antim dasven raja 'bhojraja' huye. unhonne desh ki maryada kshin hote dekh digvijay ke liye prasthan kiya. unhonne sindhu nadi ko parakar gandhar, mlechch aur kashmir ke rajaon ko parast kiya tatha unka kosh chinakar unhen dandit bhi kiya. usi samay raja bhoj ne marusthal men vidyaman mahadev ji ka darshan kiya. mahadev ji ko panchagavya mishrit gangajal se snan karakar chandan adi se bhakti purvak unka pujan kiya. bhojraj ne kaha -'he marusthal men nivas karne vale tatha mlechchon se gupt shuddh sachchidanand svarup vale girijapte. ap tripurasur ke vinashak tatha nanavidh maya shakti ke pravartak hain. main apki sharan men aya hun.
ap mujhe apna das samjhen. main apko namaskar karta hun.'' is stuti se prasann hokar bhagvan shiv ne raja se kaha- he bhojraj ! tumhen mahakaleshvar tirth men jana chahiye, is darun pradesh men arya-dharm hai hi nahin. meri kripa se tum vishuddh ho atah tumhen is arya pradesh men nahin ana chahiye. bhagvan shiv ke in vachnon ko sunakar raja bhoj apni sena ke sath vapas apne desh ko chala gaya. raja bhoj ne hi shiv ki kripa prapt karke dvijavarg ke liye sanskrit vani ka prachar kiya aur shudron ke liye prakrit bhasha chalai. inhonne pachas varshon tak rajya karke ant men svarg lok prapt kiya. kalikal ki katha : bhojraj ke svargarohan ke pashchat uske vansh men sat raja huye, kintu ve sabhi alpayu the, jo tin sau varsh ke bhitar hi mar gaye. tadantar agnivansh ka vistar hua aur ganvon aur janpdon men bahut se balvan raja huye. unke rajya men praja agni hotra karne vali, gau, brahman ka hit chahne vali tatha dvapar ke saman dharm karya karne men nipun thi. sarvatra dvapar yug hi malum parta tha. dvapar ke saman aisa dharmacharan dekhakar 'kali' ne bhaybhit hokar mlechchon ke sath nilachal parvat par jakar hari ki sharan li. vahan usne barah vasha tak prayatn purvak kathor tapashcharya ki. is dhyan yogatmak tapashcharya se use bhagvan shri krishn ka darshan hua. kali ne stuti karte huye shrikrishn se kaha- 'he bhagvan ! ap mera sashtang dandavat pranam svikar karen. he kripanidhe ! main apki sharan men aya hun. ap sabhi papon ka vinash karte hain. sabhi kalon ka nirman karne vale ap hi hain. satyug men ap gaur varn ke the. treta men raktavarn tatha dvapar men pitavarn ke the. mere samay (kaliyug) men ap krishn svarup hain. mere putron ne mlechch hone par bhi arya dharm svikar kiya hai. mere rajya men pratyek ghar men dyut, madya, stri hasya, svarn adi hona chahiye, parantu agnipath men paida huye kshatriyon ne unka vinash kar diya hai. he janardan. main apke charn-kamlon ki sharan men aya hun, meri raksha kijiye.''
shrikrishn muskarakar kahne lage- kaliraj, main tumhari raksha ke liye anshrup men mahavti men avtirn hounga, vah mera ansh bhumi men akar mahabli agnivanshiya rajaon ka vinash karega aur mlechch vanshiya rajaon ki pratishtha karega. yah kahakar bhagvan adrishya ho gaye aur radha ke sath shrikrishn ka sakshat darshan pakar kaliraj bhi atyant prasann ho gaya. kadachit kaliraj ki isi prarthana ke karan kaliyug men sarvatra moh-maya, lobh-lipsa evan pap karmon ka itna adhik vistar ho chuka hai, jiska samul vinash karne ke lie shayad fir kisi upasak ki kathor tapasya se prasann hokar prabhu ko punah prithvi par avtirn hona parega.