sab tirath bar-bar ganga sagar ek bar navin rahuja ganga sagar ko tirthon ka pita kaha jata hai, kahne ka tatparya hai ki ganga sagar ka anya tirthon ki apeksha atyadhik mahatva hai. shayad yahi karan hai ki jan sadharan men yah kahavat bahut prachlit hai ki- ''sab tirath bar-bar, ganga sagar ek bar.'' ganga jis sthan par samudra men milti hai, use ganga sagar kaha gaya hai. ganga sagar ek bahut sundar van dvip samuh hai jo bangal ki dakshin sima men bangal ki khari par sthit hai. prachin samay men ise patal lok ke nam se bhi jana jata tha. kalakatte se yatri prayah jahaj men ganga sagar jate hain.
yahan mele ke dinon men kafi bhir-bhar v raunak rahti hai. lekin baki dinon men shanti evan ekakipan chaya rahta hai. tirth sthan-sagar dvip men keval thore se sadhu hi rahte hain. yah ab van se dhaka aur prayah janhin hai. is sagar dvip men jahan ganga sagar mela hota hai, vahan se ek mil uttar men vamanakhal sthan par ek prachin mandir hai. is samay jahan ganga sagar par mela lagta hai, pahle yahin gangaji samudra men milti thi, kintu ab ganga ka muhana piche hat gaya hai. ab ganga sagar ke pas gangaji ki ek choti dhara samudra se milti hai. aj yahan sapat maidan hai aur jahan tak najar jati hai vahan keval ghana jangal.
mele ke dinon men ganga ke kinare par mele ke lie sthan banane ke lie in janglon ko kai milon tak kat diya jata hai. ganga sagar ka mela makar sankranti ko lagta hai. khane-pine ke lie hotal, puja-path ki samagri v anya samanon ki bhi bahut-si dukanen khul jati hain. sare tirthon ka fal akele ganga sagar men mil jata hai. sankranti ke din ganga sagar men snan ka mahatmya sabse bara mana gaya hai. pratah aur dopahar snan aur mundana-karm hota hai. yahan par log shraddh v pindadan bhi karte hain. kapil muni ke mandir men jakar darshan karte hain, iske bad log lautte hain or panchven din mela samapt ho jata hai. ganga sagar se kuch duri par kapil rishi ka san 1973 men banaya gaya naya mandir hai jismen bich men kapil rishi ki murti hai. us murti ke ek taraf raja bhagirath ko god men lie hue gangaji ki murti hai tatha dusri taraf raja sagar tatha hanuman ji ki murti hai.
iske alava yahan sankhay yog ke acharya kapilanand ji ka ashram, mahadev mandir, yogendra math, shiv shakti-mahanirvan ashram aur bharat sevashram sangh ka vishal mandir bhi hain. ramayan men ek katha milti hai jiske anusar kapil muni kisi anya sthan par tapasya kar rahe the. aise hi samay men ayodhya ke suryavanshi raja sagar ek ashvamedh yagya ka anushthan karne lage. unke ashvamedh yagya se darakar indra ne rakshas rup dharan kar yagya ke ashva ko chura liya aur patal lok men le jakar kapil ke ashram men bandh diya. raja sagar ki do patniyan thin- keshini aur sumti. keshini ke garbh se asmanjas paida hua aur sumti ke garbh se sath hajar putra. asmanjas bara hi uddhat prakriti ka tha. vah praja ko bahut pira deta tha. atah sagar ne use apne rajya se nikal diya tha. ashvamedh ka ghora chura liye jane ke karan sagar bari chinta men par gaye. unhonne apne sath hajar putron ko ashva dhundhne ke lie kaha.
sathon hajar putra ashva dhundhte dhundhte-dhundhte patal lok men pahunch gaye. vahan un logon ne kapil muni ke ashram men yagyaiya ashva ko bandha dekha. un logon ne muni kapil ko hi chor samajhakar unka kafi apman kar diya. apmanit hokar rishi kapil ne sabhi ko shap diya- 'tum log bhasm ho jao.' shap milte hi sabhi bhasm ho gaye. putron ke ane men vilanb dekhakar raja sagar ne apne pautra anshuman, jo asmanjas ka putra tha, ko pata lagane ke lie bheja. anshuman khojte-khojte patal lok pahuncha. vahan apne sabhi chachaon ko bhasm rup men parinat dekha to sari ssthiti samajh gaya. unhonne kapil muni ki stuti kar prasann kiya. kapil muni ne use ghora le jane ki anumti de di aur yah bhi kaha ki yadi raja sagar ka koi vanshaj ganga ko vahan tak le aye to sabhi ka uddhar ho jaega. anshuman ghora lekar ayodhya laut aya.
yagya samapt karne ke bad raja sagar ne 30 hajar varshon tak rajya kiya aur ant men anshuman ko rajagaddi dekar svarg sidhar gaye. anshuman ne ganga ko prithvi par lane ka kafi prayatn kiya, lekin safal nahin ho paya. anshuman ke putra dilip ne dirghakal tak tapasya ki. lekin vah bhi safal nahin ho paya. dilip ke putra bhagirath ne ghor tapasya ki. ganga ne ashvasan diya ki main jarur prithvi par aungi, lekin jis samay main svargalok se prithvi par aungi, us samay mere pravah ko rokne ke lie koi upasthit hona chahie. bhagirath ne iske lie bhagvan shiv ko prasann kiya. bhagvan shiv ne ganga ko apni jata men dharan kar liya. bhagirath ne unhen punah prasann kiya to shivji ne ganga ko chor diya. ganga shivji ke mastak se sat sroton men bhumi par utri. hranidi, pavni aur nalini namak tin pravah purva ki or chal gaye, vad.ksh, sita tatha sindhu namak tin pravah pashchim ki or chale gaye aur antim ek pravah bhagirath ke batae hue marg se chalne laga. bhagirath paidal ganga ke sath nahin chal sakte the, atah unhen ek rath diya gaya. bhagirath ganga ko lekar usi jagah aye jahan unke prapitamah adi bhasm hue the.
ganga sabka uddhar karti hui sagar men mil gayi. bhagirath dvara laye jane ke karan ganga ka ek nam bhagirthi bhi para. jahan bhagirath ke pitron ka uddhar hua, vahi sthan sagar dvip ya gangasagar kahlata hai. ganga sagar se kuch duri par kapil rishi ka san 1973 men banaya gaya naya mandir hai jismen bich men kapil rishi ki murti hai. us murti ke ek taraf raja bhagirath ko god men lie hue gangaji ki murti hai tatha dusri taraf raja sagar tatha hanuman ji ki murti hai.