janm patrika men injiniyaring yog rashmi chaudhri ek safal injiniyar banane men mukhytah shani aur mangal grah ka yog karak hona ati avashyak hai. lekin bhinna-bhinn takniki karyon men vibhinn grahon ka yogdan bhi mahatvapurn hain jaise ti. vi., dur sanchar, kanpyutar sanbandhi yogyata hetu budh, vastra nirman men injiniyaring hetu brihaspati, bachchon ke khilaune, saundarya prasadhan adi ke kshetra men dakshata hetu chandra, shukra tatha vidyut vibhag men ek safal injiniyar banne ke liye urja aur agni pradhan grah surya ka shubh aur yogkarak hona ati avashyak hai. injiniyaring men dakshata prapt karne ke lie injiniyaring ke karak grahon ka lagn ya lagnesh, chaturth bhav ya chaturthesh, saptam bhav, saptamesh tatha dasham bhav, dashmesh evan panchmesh aur navam (bhagya bhav) evan navmesh se shubh sanbandh hona ati avashyak hai. in bhavon par in karak grahon ka jitna adhik shubh prabhav hoga jatak ko apne vyavsay men utni hi ruchi hogi. 'maharshi mantreshvar' krit ''faldipika'' ke anusar ''tigmanshurjanayapyusheshshito yantrashmakaran narah'' arthat yadi surya-chandrama sath-sath men ho to jatak yantrakarak injiniyar tatha mashinri ke karya karta hai.
yadi lagn bhav se mangal v shani ka sanbandh ho to jatak injiniyar hota hai. mesh lagn men yadi shani chaturth bhav men sthit ho tatha mangal ka prabhav bhi lagn evan dasham bhav par ho to jatak injiniyar hota hai. makar ya kunbh lagn ho, dasham ya saptam bhav men mangal sthit ho to jatak injiniyar hota hai. yadi surya lagn, chandra lagn evan janm lagn ek hi ho tatha un par shani v mangal ka prabhav adhik ho to jatak ek safal injiniyar hota hai. yadi chaturth bhav men shani sthit ho aur us par ketu ka prabhav ho athva chaturth bhav men mangal evan ketu ki yuti ho, shani saptam bhav men sthit ho to jatak injiniyar hota hai. dasham bhav chunki karyabhav hai atah dasham bhav evan dashmesh ka yadi shani, mangal, ketu evan brihaspati se sanbandh ho to jatak ek safal injiniyar hota hai. dasham bhav evan chaturth bhav men se kisi ek men shani v dusre men mangal sthit ho tatha guru ka lagn, chaturth evan navam, dasham kinhin do bhavon par prabhav ho to jatak vastra udyog men injiniyar hota hai. yadi dhanu lagn ho, dasham bhav men shani sthit ho, lagn saptam evan dasham bhav men se kinhin do bhavon par mangal, ketu ya surya ki sthiti, drishti ya yuti sanbandh ho to jatak safal vidyut injiniyar hota hai. lagn men mangal svarashisth ho, shani chaturth bhavasth ho ya shani surya ki dasham bhav par drishti ho to jatak injiniyar hota hai. yadi kundli men chandra shani ya chandra mangal ki yuti ho tatha chaturth ya pancham bhav par mangal, ketu ya rahu ki yuti sthiti ya drishti prabhav ho to jatak injiniyaring men dakshata prapt karta hai. lagnasth budh par mangal ya shani ki drishti ho tatha brihaspati dvitiya bhav men sthit ho athva in tinon grahon ka kisi bhi rup men shubh sanbandh ban raha ho to jatak kanpyutar injiniyar hota hai tatha use mashinri evan kalpurjon adi se sanbandhit achchi jankari hoti hai. rahu-ketu, shani aur budh yadi shubh sthiti men hon to jatak ko tikshn buddhi aur achchi soch pradan karte hain. yadi dasham bhav men rahu ya ketu sthit hai. dasham bhav par shani ki drishti ho, budh shani ki rashi men, ya shani budh ki yuti ya budh par shani ki drishti ka prabhav ho to jatak ko kanpyutar injiniyar ke rup men achchi saflta prapt hoti hai.
janm patrika men shukra-shani ka karak yog bhi kanpyutar injiniyaring men saflta dilata hai. dasham bhav men yadi surya, mangal, shani aur budh grahon se 'chaturgrahi' ka yog ban raha ho to vyakti ek safal injiniyar hone ke sath-sath khub dhan kamata hai. navam bhav (bhagya bhav) men yadi dhanesh ya labhesh hokar budh sthit ho tatha dasham bhav par mangal ka prabhav ho, shukra budh ki yuti yadi lagn men athva shukra budh ki rashi men sthit ho to jatak hardaveyar injiniyar hota hai. yadi dasham bhav men surya shani ki yuti ho sath hi surya dhanesh, labhesh ya bhagyesh ho aur chaturth evan pancham bhav par surya, mangal evan ketu ki sthiti, yuti ya drishti prabhav ho to jatak ko injiniyaring ke kshetra men atyant saflta, khayati, prasiddhi evan samman bhi milta hai. ab ham kuch kundliyon ki jyotishiya vivechna karenge.
kundli nan-1, ek safal injiniyar ki hai jo injiniyaring ke kshetra men atyadhik nam v paisa kamakar aj ek vildar ke rup men bhi apna svatantra vyavsay chala raha hai. is kundli men sinh lagn men guru mitra rashisth hokar lagn men vidyaman hai, jiski saptam evan navam bhav par purn drishti hai. chaturthesh evan navmesh hokar yokarak mangal surya evan shukra ke sath dasham bhav (karya sthan) men sthit hai. surya lagnesh hokar dasham bhavasth hai jo shukra evan mangal ke sath yuti bana raha hai. shukra svarashisth hai tatha dhanesh evan labhesh budh svayan labh bhav men sthit hai. kundli men chandra svarashisth hai tatha shani aur rahu ki yuti bhi hai. shashth bhav ka svami ashtam bhav men sthit hokar viprit rajyog ka nirman kar raha hai tatha shani min rashisth hai. 'faldipika' ke anusar min rashi ka shani yadi chathe ya athven bhav men sthit ho to jatak ko jamin jaydad tatha bhavan ya inse sanbandhit karyon se purn labh dilata hai. yahi karan hai ki jatak ek safal injiniyar to hai hi sath hi bilding nirman men bhi apna khub nam kama raha hai. dasham bhav, dashmesh (shukra) dvitiya (dhan bhav), pancham (khayati prasiddhi) bhav evam mangal par shani ki drishti hai. lagn chaturth evan pancham bhav par dashamasth mangal ki drishti hai tatha shani aur ketu ka drishti sanbandh bhi ban raha hai. kundli men mangal rohini nakshatra (chandra ke nakshatra) men hai, shani budh ke nakshatra (revti men) tatha chandra shani ke nakshatra pushya men sthit hai. is drishti se bhi mangal, shani, chandra v budh ka sanbandh ban raha hai. atah har drishti se grahon ki sthiti atyant shubh hai, jo jatak ko prabal bhagya ka svami banakar injiniyaring vyavsay men purnata evan dakshata pradan kar rahi hai.
kundli nan. 2 kunbh lagn evan kark rashi ki hai. kundli men grahon ki sthiti kuch is prakar hai. lagnesh shani vakri hokar chaturth bhav men sthit hai. chandra purn bali hokar svarashisth hai, mangal ko sthanabal prapt hai tatha mangal dasham bhav men svarashisth hai. yogkarak shukra dhanesh aur labhesh guru ke sath labh bhav men hi sthit hai tatha panchmesh aur ashtamesh budh saptamesh surya ke sath dvadash bhavasth araguhokar budhaditya yog ka nirman kar raha hai. labhesh guru bhi apni trikon rashi men sthit hokar labh bhav men hi baitha hai. shani tatha mangal ka parivartan yog chaturth aur dasham bhav men ban raha hai. shani aur mangal ki drishti lagn bhav par bhi hai. labhesh dhanesh aur bhagyesh ki yuti labh bhav men hi ban rahi hai.
kundli nan. 3 vrishchik lagn ki kundli hai. lagn men shani mangal ki rashi men hai tatha chaturth bhav men mangal shani ki rashi men sthit hai. sath hi shukra aur budh ka rashi-parivartan yog bhi ban raha hai. lagnasth shani par ketu ki drishti hai tatha bhagyesh chandra bhi shani ki rashi men tritiya sthan men baitha hai. chaturth bhavasth mangal ki saptam, dasham aur ekadash bhav (labh bhav) par drishti hai. isse spasht hai ki jatak mangal evan shani se sanbandhit vyavsay se labh prapt karega. kundli men yadi mangal shubh sthiti men ho tatha shani bhi achchi sthiti men ho to jatak maikenikal injiniyar ban sakta hai. ye sare yog is jatak ki janmapatrika men vidyaman hain. lagnasth shani mangal ki rashi men sthit hokar saptam aur dasham bhav par drishti bhi dal raha hai. kundli men shani aur mangal donon hi balvan hain. jatak ek safal maikenikal injiniyar ke rup men karya kar raha hai.
kundli nan. 4 ek kanpyutar injiniyar ki hai. lagnesh shukra saptam bhav men mangal ke sath yuti bana raha hai. saptamesh mangal saptam bhav men svarashisth hai. surya, budh, guru ka yog ashtam bhav men hai. shasht bhav ka svami guru ashtam bhav men viprit rajyog ka nirman kar raha hai. shani dasham bhav men chandra ki rashi men sthit hai. shani tula lagn ke liye yogkarak grah hai. shani ki drishti saptam aur chaturth bhav par par rahi hai. dashamasth shani aur min ka chandra jatak ko karyaprayan dhanvan, vidvan, adhikari evan parakrami bana raha hai. kundli men shani par mangal ki drishti evan mangal par shani ki drishti hai. budh bhi guru evan surya ke sath sthit hai jo jatak ko tikshn buddhi ka svami bana raha hai. yahan par
kundli nan. 5 ki vivechna karna ati avashyak hai aur prasangik bhi hai kyonki abhi hal hi men kanada ke vatrlu vishvavidyalay ne bharat ke purva rashtrapti aur eyronotikal vaigyanik e. pi. je. abdul kalam ko injiniyaring men doktar ki manad upadhi se sammanit kiya hai. aiye inki kundli ka jyotishiya drishti se vishleshan karte hain. purva rashtrapti do. abdul kalam ka lagn dhanu hai. unki kundli men shani, guru, surya, budh, ketu, shukra, mangal adi grahon ki sudrirh evan shubh sthiti ne unhen anveshak banaya aur desh ke sarvochch pad par pahunchaya. inki kundli men lagnasth shani ki tritiya, saptam evan dasham bhav par drishti hai. pancham bhav se shiksha, buddhi aur prasiddhi ka vichar kiya jata hai. jiska svami mangal labh bhav men sthit hai, vidya aur buddhi ke karak guru aur budh uchch rashisth hain. uchch shiksha ka vichar navam bhav se karte hain. kundli men navam bhavesh surya dasham bhav men budh aur ketu ke sath sthit hai. kundli ke grah yog is bat ka spasht sanket de rahe hain ki unhen apni kushagra buddhi, uchch koti ke gyan evan uchchatam bauddhik kshamata ne ek safal vaigyanik, avishkarak evan injiriyar banakar desh ke sarvochch pad par pahunchaya.