purushottam mas ke vrat niyam (15 aprail 2010 se 14 mai 2010) pan. brajkishor bharadvaj 'brajvasi' purushottam mas bara hi pavan v divya mas hai. ise 'adhimas' aur 'malmas' bhi kahte hain. malmas ki drishti se shubh karmon ke varjit hone ke karan yah mas nindit hai. parantu purushottameti masasya namapyasti sahetukam. tasya svami kripasindhuah purushottam uchyate॥ ahmevasya sanjatah svami ch madhusudnah. etannamna jagatsarvan pavitran ch bhavishyati॥ matsadrishyamupagamya masanamdhipo bhavet. jagatpujyo jagadvandyo maso'yan tu bhavishyati॥ pujkanan ch sarveshan duahkhdaridryakhandanah॥ bhagvan purushottam isko apna nam dekar iske svami ban gae hain. atah iski mahima bahut barh gai hai. is purushottam mas men sadhna karne se koi vyakti papmukt hokar bhagvan ko prapt ho sakta hai. yah mas anya sabhi mason ka adhipti hai. yah jagatpujya aur jagadvandya hai tatha ismen puja karne par yah logon ke duahkh daridrya aur pap ka nash karta hai. puranon ki uktiyan hain- yenahamarchito bhaktya mase'smin purushottame. dhanputrasukhan labdhva pashchad golokvasbhak॥ arthat is mas men purushottam bhagvan ki nishtha evan vidhipurvak puja karne se bhagvan atyant prasann hote hain aur sadhak is lok men sab prakar ke dhan-putradi ke sukhon ka bhog kar mrityu ke bad vaikunth jata hai. atah sabhi gharon men, mandiron men, tirthon men aur pavitra sthalon men is mas bhagvan ki vishesh rup se mahapuja honi chahie.
sath hi dharm ki raksha ke lie vrat-niyamon ka acharan karte hue dan, punya, pujan, katha, kirtan aur jagaran karna chahie. isse gau, brahman, sadhu-sant, dharm, desh aur vishva ka mangal hoga. kyonki kaha gaya hai- manglan manglarchanan sarvamanglmangalam. parmanandarajyan ch satyamaksharamavyayam॥ jo manglrup hain, jinka pujan mangalamay hai, jo sabhi manglon ka mangal karne vale hain tatha jo parmanand ke raja hain, aise satya, akshar aur avyay purushottam bhagvan vasudev ka dhyan karna chahie. '¬namo bhagvte vasudevay.' mantra ka niyamit rup se jap karna chahie. is mas men shri vishnu sahasranam, purush sukt, shri sukt, harivansh puran evan ekadshi mahatmya kathaon ke shravan se bhi sabhi manorath pure hote hain. ghat-sthapan karna chahie aur ghi ka akhand dip bhi rakhna chahie. shri shaligram bhagvan ki murti sthapit karke uski puja svayan karni chahie ya kisi yogya brahman dvara karani chahie. shrimadbhagavadgita ke 15 ven (purushottam namk) adhyay ka nitya prempurvak arth sahit path karna chahie. purushottam mas men shrimadbhagavat ki katha ka path karna-karana mahan punyadayak hota hai. yathasanbhav sava lakh tulsidal par chandan se ram, ¬ya krishn nam likhakar bhagvan shaligram ya bhagavadvigrahmurti par charhane chahie. iski mahima apranpar hai. purushottam mas men purushottam mahatmya ki katha sunni chahie. nitya pratahkal suryoday se purva uthakar snanadi nitya karmon se nivritt hokar 'govardhanadharan vande gopalan goprupinam. gokulotsavamishanan govindan gopikapriyam॥' mantra ka jap karte hue purushottam bhagvan ki vidhipurvak shodshopchar se puja karni chahie.
puja karte samay aur katha shravn-pathan karte samay nilvsna param dyutimti bhagvti shriradhaji ke sahit nav-nil-nird-shyam-ghan, pit vastradhari dvibhuj murlidhar purushottam bhagvan ka dhyan karte rahna chahie. purushottam mahatmya men shri kaundinya rishi kahte hain. dhyayennavaghanashyaman dvibhujan murlidharam. lasatpitptan ramyan saradhan purushottamam॥ purushottam vrat karne vale ko kya bhojan karna chahie aur kya nahin, kya varjya hai aur kya avarjya iske sanbandh men shrivalmiki rishi ne kaha hai- purushottam mas men ek samay havishyann bhojan karna chahie. bhojan men gehun, chaval, safed dhan, jau, mung, til, bathua, matar, chaulai, kakri, kela, anvla, dahi, dudh, ghi, am, harre, pipal, jira, sonth, sendha namak, imli, pan-supari, katahal, shahtut, samak, methi adi ka sevan karna chahie. keval savan ya keval jau par rahna adhik hitakar hai. makhn-misri pathya hai. gur nahin khana chahie, lekin ukh ka ya ukh ke ras ka sevan karna chahie. mans, shahad, chaval ka manr, urad, rai, masur ki dal, bakri, bhains aur bher ka dudh ye sab tyajya kaha hain. kashifal (kumhara), muli, pyaj, lahsun, gajar, baigan, nalika adi ka sevan varjit hai.
tilka tel, dushit ann, basi ann adi bhi grahan n karen. abhakshya aur nashe ki chijon ka sevan nahin karna chahie. falahar par rahen aur sanbhav ho to krichcha-chandrayan vrat karen. is mas brahmacharya ka palan aur prithvi par shayan karna karen. thali men bhojan n karen, balki palash ke bane pattal par bhojan karen. rajasvala stri aur dharmabhrasht tatha sanskar rahit logon se dur rahen. parastri ka bhulakar bhi sparsh nahin karen. is mas vaishnav ki seva karni chahie. vaishnavon ko bhojan karana bahut punyaprad hota hai. purushottam mas ke vrati ko shiv ya anya devi-devta, brahman, ved, guru, gau, sadhu-sannyasi, stri, dharm aur pragyaganon ki ninda bhulakar bhi n to karni aur n hi sunni chahie. tanbe ke patra men dudh, chamre ke patra men pani tatha keval apne lie pakaya hua ann ye sab dushit mane gae hain. ataev inka parityag karna chahie. din men sona nahin chahie. sanbhav ho, to mas ke ant men udyapan ke lie ek mandap ki vyavastha kar yogya pandit dvara bhagvan ki shodshopchar puja karakar char-panch vedvid brahmanon dvara chaturvyuh ka jap karana chahie. fir dashansh havan karakar nariyal ka hom karna chahie.
gauon ko ghas tatha dana dena chahie. brahmanon ko bhojan karana chahie. vaishnavon ko yathashakti vasu-sona, chandi adi evan gay, ghi, ann, vastra, patra, juta, chata adi aur gita-bhagavat adi pustakon ka dan karna chahie. kanse ke bartan men tis pue rakhakar sanput karke brahmana-vaishnav ko dan karne vala akshay punya ka bhagi hota hai. purushottam mas men bhakti purvak adhyatm vidya ka shravan karne se brahm hatyadi janit pap nasht hote hain. pitrigan moksh ko prapt hote hain tatha din-pratidin ashvamedh yagya ka fal prapt hota hai. is vidya nishkam bhav se shravan kiya jae, to vyakti papmukt ho jata hai. tatashchadhyatmavidyayaah kurvit shravnan sudhiah. sarvatha vittahino'pi muhurtan svasthamansah॥ ajivika n ho to bhi buddhiman manushya ko do ghari shant man se guru se adhyatm vidya ka shravan karna aur purushottam tatva ko samjhna chahie, kyonki gita men kaha gaya hai- uttamah purushastvanyah parmatyetyudahritah. yo lokatrayyavishya bibhartyavyay ishvarah॥ (15/17) 'kshar aur akshara-in donon se uttam purush to anya hi hai, jo tinon lokon men pravesh karke apra-para prakriti aur purush sab ka dharn-poshan karta hai. vah avinashi parmeshvar aur parmatma hai.' gatirbharta prabhuah sakshi nivasah sharnan suhrit. prabhvah pralyah sthanan nidhanan bijamavyayam॥ (9/18) vahi purushottam sab ki ekmatra gati-muktisthan hain.
jo sab ke sakshi, ashray, sharanya tatha suhrid hain, vah bhagvan sab ki utpatti, lay, adhar aur nidhanasvarup hain. sab charachar ke bij-karan, avinashi, mata, dhata, pita aur pitamah hain aur vahi purushottam kahlate hain. upadrashtanumanta ch bharta bhokta maheshvarah. parmatmeti chapyukto dehe'sminpurushah parah॥ (13/22) vastav men vahi purushottam deh men sthit hue bhi pare hain; sakshi, upadrashta, anumanta, bharta aur bhokta hain. brahmadikon ke bhi svami mahan ishvar hain; vahi sat-chit-anandaghan, vishuddh parmatma, purushottam bhagvan kahlate hain. bhagvan purushottam ki vani hai yasmatksharamatito'hamaksharadpi chottamah. ato'smi loke vede ch prathitah purushottamah॥ (15/18) kyonki main nashvan jadavarg kshetra prakriti se sarvatha atit hun aur maya men sthit avinashi jivatma se bhi uttam hun, islie lok men aur ved men bhi purushottam nam se prasiddh hun. purushottam mas men purushottam ko janne ki shraddha rakhte hue jo payatnapurvak vrat karna hai, vastav men vahi sachcha bhajan, bhav, bhakti aur mumukshuta hai. jo purushottam ke ati gopniya rahasya ko tatva se jan gaya, vah gyanvan aur kritarth ho gaya.
atah purushottam tatva ko samjhna aur uska bhajan karna chahie. shraddha-bhaktipurvak bhagvan ka nam, jap, kirtan, satsang, yagya, havan, dan-punya, din-seva, tirthayatra, arta-seva, go-raksha, katha-shravan, path-puja adi niyamon ka achrn-palan karna bhajan hai. is kalavdhi men vivah, mundan, griharanbh, navin grihapravesh yagyaopvit, kamya vratanushthan, navin abhushan banvana, naya vahan kharidna adi varjit hain.