(lagn bhav) se lekar dvadash bhav tak sthiti ke anusar 12 prakar ke ‘kalasarp dosh’ dekhne men ate han jinka fal bhi bhinna-bhinn hota hai tatha bhavon ke anusar banne vale kalasarp dosh ki shanti ke upay bhi prithk-prithak hi karne chahiye, jo is prakar hain:
1. pratham se saptam bhav (anant kalasarp yog) jab rahu pratham (lagn bhav) tatha ketu saptam bhav men ho to anant kalasarp yog ka nirman hota hai. yah grah sthiti jatak ke svasthya, sharir tatha ayu par bhi prashn chihn lagata hai. vishesh: (kalasarp yog jis bhav se lekar jis bhav tak banta hai, usko tatha jis-jis bhav par rahu-ketu ki drishti padti hai, un bhavon ko bhi prabhavit karta hai. jaise pratham bhav se lekar dvadash bhav tak banne vale kalasarp yog men rahu ki pancham drishti pancham bhav par, saptam bhav tatha navam bhav par hogi atah yah kundli ke lagn, pancham, saptam tatha navam bhavon ko bhi prabhavit karega. isi prakar kramshah vibhinn bhavon ke kalasarp yogon ka fal samjhna chahie.)
upay: nile rang ke vastron ka atyadhik prayog n karen tatha sadaiv chandi dharan karen. yadi svasthya par pratikul prabhav adhik ho to uttam svasthya pradata surya dev ko ravivar ko tanbe ke lote men jal, roli, shahad aur lal pushp milakar aghrya pradan karen.
2. dvitiya se ashtam bhav (kulik kalasarp yog) yadi rahu dvitiya tatha ketu ashtam bhavagat hon tatha inke bich men sabhi grah hon to ‘kulik’ namak kalasarp yog banega. is yog se prabhavit jatak ke jivan men sangharsh, vani-dosh, dhanhinta, parivar evan sanbandhiyon se algav ityadi ka bahulya rahta hai.
upay: mandir men bahurangi kanbal dan karen. budhvar ko gay ko hara chara khilayen.
3. tritiya se navam bhav (vasuki kalasarp yog) jab rahu-ketu tritiya tatha navam bhav men sthit hokar vasuki kalasarp yog ka nirman karen to nimn upay karne chahiye. ismen rahu ke parakram sthan men sthit hone ke karan parakram men kami, alas, apas men manmutav, vaimanasya, sathi se anaban, bhagya tatha labh men kami rahegi.
upay: vriddhajanon ka samman karen, sona dharan karen. manglvar ko sundar kand ka path karen tatha kisi bhi pashu ya pakshi ko pinjre men bandi banakar n rakhen.
4. chaturth se dasham bhav (shankhpal kalasarp yog) chaturth bhav men rahu tatha dasham bhavagat ketu ke bich men sabhi saton grahon ki sthiti ‘shankhpal’ kalasarp yog’ ka nirman karti hai. is grahyog men janme jatak ke jivan men sukh ka abhav mukhyatah (matrisukh ka abhav), vahan se kasht, ghar, makan ka der se banna ityadi jaise kasht ate rahte hain.
upay: 400 gram saf suthre badam pani men bahayen, bhagvan shiv ko kachcha dudh arpit karen, chandrama ke mantra ka jap athva purnima ka vrat karen.
5. pancham se ekadash bhav (padm kalasarp yog) yadi pancham bhav men rahu tatha ekadash bhav men ketu dvara kalasarp yog ka nirman ho to use ‘padm kalasarp yog kahenge. pancham bhav ko santan tatha buddhi evan prasiddhi ka bhav kaha jata hai. atah jatak ko santan se kasht, buddhi, vivek ki nyunta tatha upri hava ityadi ka prabhav bhi rahta hai.
upay: jivan men saflta prapt karne ke liye sarasvati ji ki puja, pile vastron ka prayog tatha haldi ka tukda sadaiv apne pas rakhna chahiye, vidyalay men dan dena chahiye, acharan men satyata evan shuchita ka purn dhyan rakhna chahie.
6. shashth se dvadash bhav (mahapadm kalasarp yog) shashth bhav men rahu tatha dvadash men ketu dvara mahapadm kalasarp yog ka nirman hota hai. chatha bhav: rog, vivad, rin, jivan men abhav, chor, shatru tatha adhinasth karmachariyon ka bhav hai. atah kalasarp yog ki is sthiti men jatak ko vividh rog, kamar men pida, shatru bhay, karje ki sthiti tatha apne sevkon se pareshani hoti hai.
upay: bahan ki seva karen, mama mami se sanbandh madhur rakhen, beti athva bua ko uphar den tatha unka purn samman karen. karje se mukti pane ke liye kisi bhi manglvar se munge ke hanuman ji ki puja karen aur unke samaksh rin mochak mangal stotra ka path karen.
7. saptam se lagn bhav (takshak kalasarp yog) yadi saptam bhav men rahu tatha lagn men ketu hon to takshak namak kalasarp yog ka nirman hota hai jo jatak ko apne jivan sathi se anaban, sajha vyapar men hani jaise fal pradan karta hai.
upay: manglvar ko nariyal bahte pani men pravahit karen. ghar men kutta n palen, lohe ki ek goli par lal rang karke sadaiv apne pas rakhen. yadi is yog ke falasvarup vivah men adachan a rahi ho athva jivan sathi se rishte achche n hon to labh prapt karne ke liye vishnu tatha lakshmi ji ka pujan karna chahiye.
8. ashtam se dvitiya bhav (karkotak kalasarp yog) ashtam ayu bhav hone ke karan is yog se prabhavit jatak ko alpayu, prem vivah men badha tatha gupt rogon ki sanbhavnaen bani rahti hain.
upay: kisi bhi prakar ka vyasan n palen, shani chalisa ka path karen, rogon se mukti ke liye batuk bhairav ka mantra jap athva pujan karen. 800 gram shishe ke ath tukde karke budhvar ko ek sath bahte jal men pravahit karen.
9. navam se tritiya bhav (shankhchud kalasarp yog) jab rahu navam bhav men ho tatha ketu tritiya bhav men ho to shankhchud kalasarp yog ka nirman hota hai. is yog se prabhavit jatak ka bhagya uska sath nahin deta, jatak nastik hota hai, uchch shiksha prapti men badhaen ati hain tatha bhagya prabhavit hone ke karan pratibhavan hone ke bad bhi jivan men utni pragti nahin ho pati hai jitni honi chahie.
upay: guruvar se praranbh karke tin din lagatar chane ki dal bahte pani men pravahit karni chahie, guruvar ko dopahar men panchmukhi rudraksh pile dhage men gale men dharan karen, kisi kanya ke vivah men yathashakti dan den. guruvar ko pakshiyon ko jau khilayen.
10. dasham se chaturth bhav (ghatak kalasarp yog) jab rahu dasham, ketu chaturth tatha in donon ke bich sabhi saton grah sthit hon to ghatak namak kalasarp yog ka nirman hota hai. dasham bhav chunki pita, uchchadhikariyon evan jivika ka bhav hai to is yog se prabhavit jatak ko apne vyavsay tatha naukri men pareshani, uchchadhikariyon evan pita se sanbandh madhur n rahna, jivan men saflta, pareshaniyan v prasiddhi n milna ityadi rahti hain.
upay: pratyek manglvar hanuman ji ko chola chadhayen, hare rang ka koi bhi vastra sadaiv apne pas rakhen, budhvar se praranbh karke pratidin sarasvati chalisa ka path karen. pital ke bartan men kisi pavitra nadi ka pani bharakar ghar men rakhen.
11. ekadash se panchmbhav (vishadhar kalasarp yog) ekadash bhav men rahu tatha pancham bhav men ketu ho tatha inke bich men sabhi grah hon to vishadhar namak kalasarp yog hota hai. aise jatak ke jivan men labh men kami, ichchaon, abhilashaon ki purti n hona ityadi pareshaniyan ati rahti hain.
upay: apne ap se kuch hissa mandir men dan karen. 400 gram shishe ke das tukde karke das budhvar tak jal men pravahit karen, guruvar ke din nau mukhi rudraksh pile dhage men gale men dharan karen. ghar men kabad ikattha n karen, kharab pade bijli ke upkrnon ko yathashighra ghar se bahar fenk den, navratron men ghar ke sabhi sadasya apne hath men sparsh karke ek nariyal jal men pravahit karen.
12. dvadash se shashth bhav (sheshnag kalasarp yog) yadi dvadash bhav men rahu tatha shashth bhavagat ketu ke bich men sabhi sapt grah (surya se shani paryanta) sthit hokar kalasarp yog ka nirman karen to is kalasarp yog ko ‘sheshnag kal sarp yog’ ki sangya di jati hai. is yog se prabhavit jatak ko apne jivan ke vividh kshetron men hani, vibhinn prakar ke dand tatha kabhi-kabhi karavas bhi bhogna padta hai. use apne jivan kal men apni patni se sanbandh vichched ityadi dukhon ka samna bhi karna padta hai. in ashubh falon men nyunta tatha labh prapt karne ke liye nimnalikhit upay karne chahiye.
upay: rasoighar men athva jamin par baithakar hi bhojan karen. lal rang ke kapde ki choti thaili men khand ya saunth bharakar apne pas rakhen. somvar ke din chandi ke do tukde lekar ek pani men bahayen, dusra apne pas rakhen. pratyek shanivar jalebi ka dan karen. shanivar ke din kala dhaga gale men dharan karen. shanivar ko rahu ka mantra ‘‘un ran rahve namah tatha ketu ka mantra un ken ketve namah ka jap avashya karen. uparyukt upayon ko shraddhapurvak karne se kalasarp dosh se hone vale ashubh fal kafi had tak samapt ho jate hain tatha shubh fal ki prapti hoti hai. atah rahu-ketu janit kalasarp dosh ki shanti ke liye tatha shubh falon ki prapti hetu sarvapratham aur sadaiv prabhu ke shri charnon ki sharan men rahna param avashyak hai.