maghmas- mahatmya evan vrat (01 janvri 2010 se 30 janvri 2010) pan. brajkishor bharadvaj 'brajvasi' magh mas ka mahatmya bara hi divya hai. is mah ka pratyek divas ek parva v vrat ke rup men jana jata hai. unka jivan dhanya ho jata hai jo magh mas ke niyam v vratadi ka acharan karte hain. magh mas praranbh hote hi sadhak ko vratadi evan tirthadi gaman ka vishuddh bhav se kamna parak ya fir nishkam sankalp avashya hi karna chahie, kyonki bina sankalp ke karya siddh nahin hota. shastra kahta hai sankalp hi siddhiyon ka mul hai. bhartiya sanvatsar ka gyarhvan chandramas aur dasvan saurmas 'magh' kahlata hai. is mahine men magha nakshatrayukt purnima hone se iska nam magh para. dharmik drishtikon se is mas ka bahut adhik mahatva hai. is mas men shital jal ke bhitar dubki lagane vale manushya papmukt ho svargalok men jate hain.
maghe nimagnaah salile sushite vimuktapapastridivan prayanti॥ magh mas men prayag men snan, dan, bhagvan vishnu ke pujan aur harikirtan ke mahatva ka varnan karte hue gosvami tulsidas ji ne shriramchritmanas men likha hai. magh makaragat ravi jab hoi. tirthptihin av sab koi॥ dev danuj kinnar n shrenin. sadar majjahin sakal tribenin॥ pujhi madhav pad jaljata. parsi akhay batu harshhi gata॥ padmapuran ke uttarakhand men magh mas ke mahatmya ka varnan karte hue kaha gaya hai ki vrat, dan aur tapasya se bhi bhagvan shrihri ko utni prasannata nahin hoti, jitni ki magh mahine men snanmatra se hoti hai. isliye svargalabh, sabhi papon se mukti aur bhagvan vasudev ki priti prapt karne ke liye pratyek manushya ko magh snan karna chahiye. vratairdanaistapobhishch n tatha priyate hariah. maghamajjanamatren yatha prinati keshvah॥ pritye vasudevasya sarvapapanuttaye. maghasnanan prakurvit svargalabhay manvah॥ is maghmas men purnima ko jo vyakti brahmavaivartapuran ka dan karta lai, use brahmalok ki prapti hoti hai- puranan brahmavaivart yo dadyanmaghmasi ch. paurnamasyan shubhdine brahmaloke mahiyate॥
(matsyapuran 53/35) is mas men snan, dan, upvas aur bhagvan madhav ki puja atyant faldayi hai. is vishay men mahabharat ke anushasanaparva men is prakaran varnan prapt hai. dashtirth sahasrani tistah kotayastatha paraah॥ samagachchanti maghyan tu prayage bharatarshabh. maghmasan prayage tu niyatah sanshitavratah॥ snanatva tu bharatashreshth nirmalah svargamapnuyat.
(maha., anu. 25/36-38) he bharat shreshth ! maghmas ki amavasya ko prayagraj men tin karor das hajar anya tirthon ka samagam hota hai. jo niyampurvak uttam vrat ka palan karte hue maghmas men prayag men snan karta hai, vah sab papon se mukt hokar svarg men jata hai. jo magh mas men brahmanon ko til dan karta hai, vah samast jantuon se bhare hue narak ka darshan nahin karta- magh mas se tilan yastu brahmanebhyah prayachchati. sarvasattvasmakirnan narkan s n pashyati॥
(maha., anu. 66/8) jo magh mas ko niyampurvak ek samay ke bhojan se vyatit karta hai, vah dhanvan kul men janm lekar apne kutumbijnon men mahatva ko prapt hota hai- maghan tu niyato masmekabhakten yah kshipet. shrimatkule gyatimadhye s mahattvan prapadyate॥
(maha., anu. 106/21) magh mas ki dvadshitithi ko din-rat upvas karke bhagvan madhvki puja karne se upasak ko rajsuyagya ka fal prapt hota hai aur vah apne kulka uddhar kar deta hai- ahoratren dvadashyan maghmase tu madhavam. rajsuyavmvaproti kulan chaiv samuddharet॥
(maha., anu. 109/4) jin manushyon ko chirkalatak svargalok men rahne ki ichcha ho, unhen maghmas men suya r ke makrrashi men sthit hone par avashya snan karna chahiye. svargaloke chiran vaso yeshan mansi vartate.
yatra krapi jale taistu sratavyan mrigbhaskare॥ iske lie pratahkal til, jal, pushp, kush lekar is prakar sankalp karna chahiye- kk tassat adya maghe masi amukapakshe amuk-tithimarabhya makararasth ravin yavat amukgotraah amukasharma ;varma/guptohanddh vaikunthanivaspurvak shrivishnuprityarthan pratah snan karishye. iske bad nimn prarthana karen- duahkhdaridraynashay shrivishnostoshnay ch. pratahsnanan karomyadya maghe papvinashanam॥ makarasthe ravau maghe govindachyut madhav. snanenanen men dev yathoktafalado bhav॥ divakar jagannath prabhakar namo'stu te. paripurnan kurushvedan maghasnanan mahavratam॥ maghmasmiman punyan sramyahan dev madhav. tirthasyasya jale nityan prasid bhagavan hare॥ magh mas ki aisi visheshta hai ki ismen jahan-kahin bhi jal ho, vah gangajal ke saman hota hai, fir bhi prayag, kashi, naimisharanya, kurukshetra, haridvar tatha anya pavitra tirthon aur nadiyon men snan ka bara mahattva hai. sath hi man ki nirmalata evan shraddha bhi avashyak hai. is prasang men padmapuran men ek bari rochak katha ayi hai, jo is prakar hai- katha : prachin kal men narmada ke tat par suvrat namak ek brahmanadevta nivas karte the. ve samast ved-vedangon, dharmashastron evan puranon ke gyata the. sath hi unhonne tarkashastra, jyotish, gajvidya, ashvavidya, mantrashastra, sankhyshastra, yogshastra aur chaunsath kalaon ka bhi adhyayan kiya tha.
ve anek deshon ki bhashaen aur lipiyan bhi jante the. itne vigya hote hue bhi suvratne apne gyan ka prayog dharmakaryon men nahin kiya, apitu ajivan dhan kamane ke lobh men hi fanse rahe. iske liye unhonne chandal se bhi dan lene men sankoch nahin kiya, is prakar unhonne ek lakh svarnamudraen arjit kar lin. dhanoparjan men lage-lage hi unhen vriddhavastha ne a ghera, sara sharir jarjar ho gaya. kalke prabhav se sari indriyan shithil ho gayin aur ve kahin ane-jane men asamarth ho gaye. sahsa unke man men vivek uday hua ki mainne sara jivan dhan kamane men nasht kar diya, apna parlok sudharne ki or kabhi dhyan hi nahin diya. ab mera udvar kaise ho? mainne to ajivan koi satkarm kiya hi nahin. suvrat is prakar pashchatap ki agni men dagdh ho rahe the, udhar ratri men choron ne unka sara dhan chori kar liya.
suvrat ko pashchatap to tha hi, dhan ke chori chale jane par uski nashvarta ka bhi bodh ho gaya. ab unhen chinta thi to keval apne parlok ki. vyakulchitt ho ve apne udvar ka upay soch rahe the ki unhen yah adha shlok smaran men aya- maghe nimagnaah salile sushite vimuktapapastridivan prayanti॥ suvratko apne udvar ka mul mantra mil gaya. unhonne magh-snan ka sankalp liya aur chal diye narmada men snan karne. is prakar ve nau dinon tak pratah narmada ke jal men snan karte rahe. dasven din snan ke bad ve ashakt ho gaye, shit se pidit ho unhonne pran tyag diya. yadyapi unhonne jivanabhar koi satkarm nahin kiya tha, pappurvak hi dhanarjan kiya tha, parantu maghmas men snan karke pashchatppurvak nirmal man hi pran tyagne se unke liye divya viman aya aur us par arurh ho ve svargalok chale gaye. is prakar ki magh-snan ki apurva mahima hai. is mas ki pratyek tithi parva hai. kadachit ashaktavastha men pure mas ka niyam n le sake to shastron ne yah bhi vyavastha di hai ki tin din athva ek din avashya magh-snan vrat ka palan kare- 'masaparyantan snanasambhave tu trayhmekahan va srayat.' (nirnayasindhu)