jyotish men rahu-ketu ko chaya grah kaha gaya hai, kintu lal-kitab ke anusar ye chaya grah bhi apna shubh-ashubh prabhav dene men piche nahin rahte hain. prastut lekh men lal kitab ke adhar par rahu ketu se sanbandhit kuch mahatvapurn tathyon ki vivechna ki ja rahi hai.
lal kitab' men rahu ko 'sarasvati' kaha gaya hai kyonki ye achche-bure donon prakar ke vicharon ka karak grah hai. iska rang nila hai. budh, shani, ketu iske mitra tatha surya, mangal, shukra shatru hain. guru, chandra rahu ke lie sam-grah hain. 'lal kitab' men ise 'karkti hui bijli' kaha gaya hai jismen pal bhar men sab kuch jalakar khak kar dene ki takat hai. iske lie 3, 4, 5, 6, 10 bhav shubh tatha 1, 2, 7, 8, 9, 11, 12 bhav ashubh mane gaye hain.
surya ke sath ya surya se drisht rahu-surya ko grahan laga deta hai. chandra ke sath hone par chandra ke fal ko manda kar deta hai kintu apne mande prabhav ko kam kar leta hai. mangal ke sath rahu kathor dil vala insan banate hain. budh v rahu achcha fal dete hain. guru ke sath ya drishti sanbandh hone se rahu guru ke fal ko bahut ashubh kar deta hai. shukra ke sath rahu shadi men deri karvata hai evan charitrik dosh bhi deta hai. shani v rahu ikatthe shani ka 'gulam' hai.
yadi kundli men rahu ashubh hokar mandi asar kar raha ho to guruvar ko muli dan karen ya shanivar ko kachche koyle chalte pani men bahaen. rahu ke mandi ke asar ko kam karne ke lie chandi ka chaukor tukra hamesha apne pas rakhen. rahu ke ashubh asar ko kam karne ke lie surkh rang vali masur ki dal pratahkal safaikarmi ko deni chahie ya kabhi-kabhi kuch paise dene chahie.
yadi rahu achanak bimari paida kare, to marij ke vajan ke barabar jaun bahte pani men bahaen ya kisi garib ko jaun dan karen. tanbaku ka sevan n karen evan jab tak ho sake, sanyukt parivar men hi rahen. dekhne men aya hai ki surya ke sath sthit rahu, vyakti ki arthik sthiti evan naukri-vyavsay ko hani pahunchata hai. iska asar n keval us bhav par parta hai jismen rahu baitha hai balki uske sath vala ghar bhi jal jata hai.
rahu : urad, garm kapre, sarson, kala ful, rai, tel, kulfi adi men jo bhi upalabdh ho uska yathashakti dan karne se rahu se sanbandhit kashton se chutkara milta hai. rahu ka din shanivar hai atah iska dan bhi shanivar ko hi karna chahie.
ketu : ketu ka rang chitkbra tatha din ravivar hai. shukra, rahu iske mitra tatha chandra, mangal shatru grah hai. surya, budh, guru, shani sam grah hain. kundli men chatha bhav ketu ka apna ghar hota hai. larka, bhanja, kela, charpai, tange, chipkli, chuha, nar gaureyya, guptang, til, asangadh, rirh ki haddi, jor, pyaj, lahsun adi sab chijen ketu se sanbandhit hain.
lal kitab ke anusar chandra ko dudh evan ketu ko ninbu kaha gaya hai arthat donon ek dusre ke pakke shatru hain. ketu yadi chanradma ke sath hai to yah 'grahan yog' bana deta hai. chandrama 'man' ka karak grah hai. chandra-ketu ka milan man ki shanti bhang karne vala hota hai. mangl-ketu ka ek bhav men hona donon ka fal ashubh karta hai. yadi budh-ketu sath hon tab bhi ketu ka fal shubh nahin rahta. guru ke sath ketu prayah bura fal nahin deta.
lal kitab ke anusar ketu ke lie 1, 2, 5, 7, 10, 12 shubh evan 3, 3, 4, 6, 8, 9, 11 ashubh mane gaye hain.
- yadi ketu lagn men budh ke sath ho to lohe ki goli par lal rang karke apne pas rakhen.
- ketu tisre bhav men ho to chane ki dal bahte pani men bahaen.
- ketu bhav 4 men ho to purahit ko pile rang ki vastuen dan karen.
- yadi ketu 5ven ghar men ho to gajar ya muli ko rat men sirhane rakhakar pratah dharmasthal men dan karen.
- ketu chathe bhav ho to chah pyaj jamin men ghar ke bahar daba den.
- satvan ghar shukra ka 'pakka ghar' hai aur ketu ka mitra shukra hai atah bhav 7ven men ketu prayah thik-thak fal deta hai.
- athvan mangal ka ghar hai aur mangal ketu ka shatru hai atah 'dushmana' ke ghar men ketu ashubh hi rahta hai. yadi ketu athven bhav men ho to ganesh ji ki puja karen ya chitkbra kanbal mandir men dan karen.
- yadi ketu barhven ghar men ho aur vyakti kutton ko pareshan kare to santan par bahut ganda asar hoga. is sthiti men dudh men angutha dalakar chusna shubhdayak hota hai.
dan yogya vastuen : til, bakra, jhandi, kajal, uni kanbal, satnja, muli adi men jo bhi upalabdh ho unka yathashakti ravivar ko dan karne se labh hota hai.