param pujya shri sain baba pan. sharad tripathi sitaron ki kahani sitaron ki jubani stanbh men ham janmapatriyon ke vishleshan ke adhar par yah batane ka prayas karte hain ki kaun se grah yog kisi vyakti ko saflta ke shikhar tak le jane men sahayak hote hain. yah stanbh jahan ek or jyotirvidon ko grah yogon ka vyavharik anubhav karaega, vahin dusri or adhyetaon ko shreshth path pradan karega tatha pathkon ko jyotish ki prasangikta, uski arthavatta tatha satyata ka bodh karane men mil ka patthar sabit hoga. karm aur tapobhumi bharat sada sarvada se svayan parmatma ke avtrit hone ki punyabhumi rahi hai. bhagvan ke chaubis divyavtar to yahin huye hain jinhonne samy-samay par is dhara-dham men dharm ke abhyutthan ke bad sukh-shanti ki aviral dhara pravahit karke jan-jan ko adhyatm ke astitva ki sahaj, pavan anubhuti karayi.
ishkripa aur bhagvedachcha se isi bharat men shirdi sain jaise divya avtari purush bhi avtrit huye tatha sarvadharm sambhav ka anubhav is kalikal men apne prabhav kshetra men jan-jan ko karaya. unka divyavataran aj bhi kasht nivarak evam faldayi hai. yasya smritya ch namoktaya tapodanakriyadishu. prayatnassafalo bhuyat sai bande tamachyutam॥ aj sanpurn vishva men koi shayad hi aisa desh ho, dharm ho, jati, varg ya sanpraday ho jiske jyadatar vyakti shri shirdi 'sainbaba' ke divya nam se parichit n hon. ve vishva ki mahan adhyatmik vibhuti the. inka janm 18.05.1837 sayan 8:21 par pathri namak gram (maharashtra) men brahman parivar men hua tha aur inka laln-palan ek muslim parivar men hua. tatpashchat ve shelu gram ke ek brahman sant guru vekusha ke ashram men 1842 se 1854 tak arthat 12 varshon tak rahe. tatpashchat guru ke adesh se ashirvad prapt kar nav yuvak sant ke rup men shirdi gram pahunche.
parantu vahan do mah tak hi nivas kiya aur achanak ek din gayab ho gaye aur punah tin varshon ke bad 1858 men chandbhai patil (dhup khera ke ek muslim jagirdar) ke bhatije ki barat ke sath bailgari men baithakar shirdi aye aur fir yahin bas gaye. vahan par unhonne ek purani tyagi hui masjid jo viran pari thi ko apna thikana banaya aur use 'dvarka mai' nam diya. sain baba sadharan ghar parivar men paida hue aur apne karmon tatha adhyatm ke dvara aj ghar-ghar men dev tulya puje jate hain. inke janm ka vivaran bahut hi vishvast v jankar sutron se tamam shodhon ke uprant gyat hua hai jo inki janm patri ka vivechan kar jivan se milane par sahi sabit hota hai. yun to ishvar ya devon ki janm patri ka vishleshan sadharan manav ke lie sanbhav nahin hai, par ham baba se ashirvad mangte hue unke jivan par grahon nakshatron ka kya prabhav hua, yah janne ki cheshta karte hai. prastut janmang vrishchik lagn ka hai.
lagnesh mangal dasham bhav men surya ki rashi men sthit hai vahi surya saptam men baithakar lagn bhav ko purn drishti se dekh raha hai. lagnesh ka digbali hona tatha lagnesh ki lagn par chaturth drishti hona tatha sabse tej grah surya dvara lagn ko dekhna, yah jyotish shastra men batata hai ki vyakti mahan pratapi, hathi v drirh nishchayi hota hai jo inke svabhav se mel bhi khata hai. unki janm patri dekhne se gyat hota hai ki janm ke samay lagabhag 8 varsh rahu ki bhogya mahadsha prapt hui. rahu jo ki chathe bhav men sthit hai tatha mesh rashi ke 92541 ka hone se ketu ke nakshatra men hai. rahu ka ketu ke nakshatra men hona, jyotish men achcha nahin mana jata atah bachapan men inhen kafi bhatkav dekhna para. jyotish men chaturthesh man ka tatha navmesh pita ka karak hota hai. is kundli men chaturthesh shani tatha navmesh chandrama hai aur yah donon hi grah ek sath yuti karke dvadash bhav (vyay) men sthit hain atah inhen apne janm dene vale man aur pita ka sath nahin mil saka.
baba navyuvak sant ke rup men shirdi men nivas karne lage. yahan par baba ko jansmuday se jahan vishesh sahyog milta tha vahin kuch logon ke virodh ka bhi samna karna para. chunki baba pujan bhi karte the aur masjid men namaj bhi parhte the to logon ko yah nahin pata chal pata tha ki ve hindu hain ya muslim. yah vah samay tha jab baba ne tamam adhyatmik v antrik shaktiyan prapt ki. unki kundli men ketu, chandrama aur uchch ke shani ki yuti dvadash bhav arthat tula rashi men hai. shani sannyas tatha chandrama man ka karak hota hai aur ketu adhyatm ka, in tinon ki dvadash bhav men yuti yah darshati hai ki yah vyakti purn rup se man, vani, karm se dharm marg aur adhyatm ka palan karega to kundli men uchch ka shani dvadash bhav men hone se jivan bhar drirh ichcha ke sath sannyas marg par chalega. dhire-dhire shirdi aur as-pas ke kshetron men baba ki khayati failti gai aur dur-daraj se log baba ke darshan ko ane lage.
baba apne bhakton ke sath baithakar baten karte aur unki samasyaon ka nirakaran karte. ek bar ek bhakt ne baba ko bhojan par bulaya. baba ne bhi ane ki hami bhar di aur niyat samay par kutte ke rup men bhojan karne pahunche, par grih svami ne kutte ko jalti lakri se marakar bhaga diya. fir jab vah vyakti ulhana lekar pahuncha, 'baba, ap vada karke bhi nahin aye' to baba ne kaha 'main to gaya tha tumne jali lakri se marakar bhaga diya tha' tatha apni pith par nishan bhi dikhaya. vah vyakti bara lajjit hua. aise kai chamatkar hain jo baba ne kiye. unke lagn ke navam bhav men uchch ka guru sthit hai aur yahi uchch ka guru lagn ko pancham drishti se dekh raha hai tatha navam drishti se pancham bhav ko dekh raha hai. yah grah sthiti kundli ke mul trikon bhav lagn, pancham, navam tinon ka sanbandh, uchch ke guru ke sath hai tatha brihaspati 190-231 ka hai arthat budh ke nakshatra men hone ke karan budh jo ki ashtamesh hai, vah saptam men baithakar lagn ko dekh raha hai, inko mahan antrik v chamatkarik shaktiyon ka svami banati hai.
baba lilaen v chamatkar dikhane ke lie nahin karte the, ve to apne bhakton ki raksha v sahayta hetu yah kriyaen karte the. baba ne ajivan brahmacharya ka palan kiya. pratyek stri ko ve mai kahakar hi pukarte the. unke us bhav ko jyotishiya drishti se dekhen to saptam bhav men vrish rashi men surya saptamesh shukra tatha ashtamesh budh ki yuti, yah tinon grahon ka yog virakti ka dyotak hai atah baba ne jivan paryant brahmacharya ka palan kiya. devi kripa se ve svayan abhas se jan chuke the ki vivah sanstha unke lie uchit nahin hai atah unhonne ajivan avivahit rahna uchit samjha. yun to baba jyada shikshit nahin the parantu unhen kai bhashaon ka gyan tha. san 1845-1861 tak 16 varsh ki guru ki mahadsha mili. brihaspati jo gyan ka karak hai. apki kundli men uchch ka baitha hai. is 16 varsh ki avdhi men apne gurh adhyatmik gyan prapt kiya. 1861-1880 tak 19 varsh ki shani mahadsha chali, yah sanyas ka karan bana aur inhonne garibon-dabe-kuchle logon ki seva sahayta ki kyonki shani iska karak hota hai.
1880-1897 tak budh ki mahadsha inko prapt hui. budh ashtamesh hone ke karan tatha budh ki lagn par purn drishti bhi hone ke karan inhonne apne chamatkaron ke dvara chamatkrit kiya chunki ashtamesh gahrai-gurhta ko bhi pradarshit karta hai. iske bad ketu ki dasha men baba ne tamam adhyatmik tatha chamatkarik prayog kiye. unhonne do varsh purva hi mahanirvan ka sanket de diya tha. tatya v ramchand ko jivan dan dekar baba ne sharir chora. 28 sintabar 1918 ko baba ko sadharan sa jvar 2-3 din tak raha. iske bad hi baba ne bhojan bilkul band kar diya. isse unka sharir din-pratidin kshin v durbal hone laga. 17 dinon pashchat arthat 15 aktubar san 1918 ko 2:30 par unhonne sharir ka tyag kar diya. jyotishiya vishleshan se gyat hoga ki 1904 se inki shukra ki 20 varsh ki mahadsha shuru hui. vrishchik lagn se shukra markesh ka karya karta hai kyonki vah dvadash v saptam marak bhavon ka svami hota hai aur saptam men sthit bhi hai.
atah shukra mahadsha unke jivan ki antim dasha sabit hui. baba ne 15.10.1918 ko 2:30 minat par mahaprayan kiya. 15 aktubar 1918 ko shukra men shani ka antar chal raha tha tatha shukra jo ki markesh hai v shani jo dvadash bhav men sthit hai ashtam se ashtam yani tritiya bhav ka bhi svami hai tatha un dinon gochar men shani sinh rashi men 20-481 ka hokar vicharan kar raha tha yani ketu ke nakshatra men tha. shani gochar men sinh rashi men hone se apni tritiya drishti se dvadash bhav ko dekh raha tha tatha inki kundli ka dusra kashtakari grah rahu gochar men vrishchik rashi men arthat lagn men vicharan kar raha tha. yah samay gochar aur dasha-mahadsha ke hisab se jyotish men ayu ke lie sahi nahin tha atah isi samay baba ne apne pranon ka tyag kiya. vishesh : yun to baba ke anuyayi hamesha se hi rahe hain aur shirdi sahit sabhi jagah pujan ka kram anavarat chalta rahta hai par kuch varshon se print midiya ho ya ilektranik midiya ho ya sadharan janmanas, baba ke prati logon men atyadhik astha dikhlai de rahi hai, baba ka mahatm kai guna barh gaya hai.
jyotish ki drishti se iska sabse pramukh karan yah hai ki jis vyakti ki kundli men lagnesh purn bali hokar lagn se purn sanbandh banata hai, aisa jatak bhale hi srishti ke niyamanusar sharir ka tyag to karta hai parantu marnoprant bhi iski khayati dur-dur tak failti hai. dusra unke jivan ke vishottari mahadsha kram ko dekhen to shukra ki mahadshaon men antardashaon ka kram nimn samne ata hai. 1904 - 1924 shukra mahadsha 1924 - 1930 surya '' 1930 - 1940 chandrama '' 1940 - 1947 mangal '' 1947 - 1965 rahu '' 1965 - 1981 guru '' 1981 - 2000 shani '' 2000 - 2017 budh '' is chakra ke madhyam se yah gyat hua ki yadi baba jivit hote to unki budh ki mahadsha hoti. jyotish men ayu ka bhav ashtam bhav mana jata hai aur is kundli men ashtamesh budh hai. agar ham vyakti ke janm ke lie lagnesh ko lete hain to dvitiya janm hetu ashtamesh ko lena hoga. yani vartaman men dusre janm ki dasha budh 2000 se praranbh hui aur budh lagn ko bhi dekh raha hai atah 2000 se jab budh mahadsha praranbh hui tab se baba ke anuyayiyon ki sankhya barhti ja rahi hai. lagta hai isi budh ki mahadsha men, 17 varshon men, baba ka prithvi par purnajanm hoga aur unhen yash v khayati ke charam shikhar tak le jaega.