muhurt bodh men bhadra vichar rashmi chaudhri muhurt nikalne men var, adi ke atirikt karan ka apna mahatva hai. vishti namak karan ka hi dusra nam bhadra hai jo sab prakar ke shubh karyon men tyajya mani gayi hai. lekin kuch sthitiyon men bhadra shubh bhi hoti hai lekin kab aur kaise, janie is lekh se. panchang ke panch angon men- tithi, bar, nakshatra, yog evan karan ke dvara anekanek shubhashubh muhurton ka nirdharan kiya jata hai. jin-jin tithiyon men jis sthiti men 'vishti karn' rahta hai, use bhadrakal kaha jata hai. muhurt vichar men bhadra ko ashubh yog mana gaya hai, jismen sabhi shubh karyon ko sanpadit karna purnataya varjit hai. bhadra panchang ke panch angon men se ek ang-'karn' par adharit hai yah ek ashubh yog hai. bhadra (vishti karn) men agni lagana, kisi ko dand dena ityadi samast dusht karm to kiye ja sakte hain kintu kisi bhi manglik karya ke lie bhadra sarvatha tyajya hai.
bhadra ke samay yadi chandra 4, 5, 11, 12 rashiyon men rahta hai to bhadra mrityu lok men mani jati hai. yadi chandra 1, 2, 3, 8 rashiyon men ho to bhadra svarg lok men aur 6, 7, 9, 10 rashi men ho to bhadra patal lok men mani jati hai. yadi bhadra mrityu lok men ho arthat bhadra ke samay chandra yadi kark, sinh, kunbh tatha min rashiyon men gochar kare to yah kal vishesh ashubh mana jata hai. ek pauranik katha ke anusar 'bhadra' bhagvan surya narayan ki kanya hai. yah bhagvan surya ki patni chaya se utpann hai tatha shani dev ki sagi bahan hai. vah kale varn, lanbe kesh tatha bare-bare danton vali tatha bhayankar rup vali kanya hai. janm lete hi bhadra yagyaon men vighn, badha pahunchane lagi aur utsavon tatha mangl-yatra adi men upadrav karne lagi tatha sanpurn jagat ko pira pahunchane lagi. uske uchchanrakhal svabhav ko dekh surya dev ko uske vivah ke bare men chinta hone lagi aur ve sochne lage ki is svechcha charini, dushta, kurupa kanya ka vivah kiske sath kiya jay.
surya dev ne jis-jis devta, asur, kinnar adi se bhadra ke vivah ka prastav rakha, sabhi ne unke prastav ko manne se inkar kar diya. yahan tak ki bhadra ne surya dev dvara banvaye gaye apne vivah mandap, toran adi sab ko ukharakar fenk diya tatha sabhi logon ko aur bhi adhik kasht dene lagi. usi samay praja ke duahkh ko dekhakar brahma ji surya dev ke pas aye. surya narayan se apni kanya ko sanmarg par lane ke lie brahma ji se uchit paramarsh dene ko kaha. tab brahma ji ne vishti ko bulakar kaha- 'bhadre, bav, balav, kaulav adi karnon ke ant men tum nivas karo aur jo vyakti yatra, grih pravesh tatha anya manglik karya tumhare samay men kare, unhin men tum vighn karo, jo tumhara adar n kare, unka karya tum dhvast kar dena.'
is prakar vishti ko updesh dekar brahma ji apne dham ko chale gaye. idhar vishti bhi devta, daitya tatha manushya sab praniyon ko kasht deti hui ghumne lagi. is prakar bhadra ki utpatti hui. vah ati dusht prakriti ki hai islie manglik karyon men uska avashya hi tyag karna chahie. bhadra mukh aur punch- bhadra panch ghari mukh men, do ghari (bhadravas) kanth men, gyarah ghari hriday men, char ghari puchch men sthit rahti hai. jab bhadra mukh men rahti hai to karya ka nash hota hai, kanth men dhan ka nash, hriday men pran ka nash, nabhi men kalah, kati men arthanash kintu puchch men nishchit rup se vijay evan karya siddhi hoti hai. vishti karan ko char bhagon men vibhajit karke bhadra mukh aur punch is prakar gyat kiya ja sakta hai- shukla paksh ki chaturthi, ashtami, ekadshi evan purnima tatha krishn paksh ki- chaturdashi, dashmi, ekadshi evan saptami tithiyon ko kramshah vishti karan ke pratham bhag ki panch ghatiyan (2 ghante tak), dvitiya bhag ki 5 ghati, tritiya bhag ki pratham panch ghati tatha vishti karan ke chaturth bhag ki pratham panch ghatiyon tak bhadra ka vas mukh men rahta hai.
isi prakar shukla paksh ki chaturthi, ashtami ekadshi evan purnima tatha krishn paksh men chaturdashi, dashmi, saptami evan ekadshi ko kramshah vishti karan ke chaturth bhag ki antim tin ghariyon men, vishti karan ke pratham bhag ki antim tin ghariyon men, vishti karan ke dvitiya bhag ki antim tin ghariyon men tatha vishti karan ke tritiya bhag ki antim tin ghatiyon men arthat 1 ghanta 12 minat tak bhadra ka vas puchch men rahta hai. bhadra ke barah nam hain jo is prakar hain- dhanya dadhimukhi bhadra mahamari kharanna kalratri maharudra vishti kulputrika bhairvi mahakali asur kshay kari. jo vyakti in barah namon ka pratah smaran karta hai use kisi bhi vyadhi ka bhay nahin hota aur uske sabhi grah anukul ho jate hain.
uske karyon men koi vighn nahin hota. yuddh tatha rajkul men vah vijay prapt karta hai, jo vidhi purvak vishti ka pujan karta hai, niahsandeh uske sabhi karya siddh ho jate hain. bhadra ke vrat ki vidhi : jis din bhadra ho, us din upvas karna chahie. yadi ratri ke samay bhadra ho to do din tak upvas karna chahie. (ek bhukta) vrat karen to adhik upyukt hoga. stri athva purush vrat karen to adhik upyukt hoga. stri athva purush vrat ke din sarvoshdhi yukt jal se snan karen athva nadi par jakar vidhi purvak snan karen.
devta tatha pitron ka tarpan evan pujan kar kusha ki bhadra ki murti banayen aur gandh, pushp, dhup, dip, naivedya adi se uski puja karen. bhadra ke barah namon se 108 bar havan karne ke bad brahman ko bhojan karakar svayan bhi til mishrit bhojan grahan karen. fir pujan ke ant men is prakar prarthana karni chahie. ''chaya suryasute devi vishtirishtarth dayini. pujitasi yathashaktya bhadre bhadraprada bhav॥ (uttar p. 117/39) is prakar satrah bhadra-vrat kar ant men udyapan karen. lohe ki pith par bhadra ki murti sthapit kar, kala vastra arpit kar gandh, pushp adi se pujan kar prarthana karen. loha, bail, til, bachra sahit kali gay, kala kanbal aur yathashakti dakshina ke sath vah murti brahman ko dan kar den athva visarjan kar den.
is prakar jo bhi vyakti bhadra vrat evan tadantar vidhi purvak vratodyapan karta hai uske kisi bhi karya men vighn nahin parta tatha use pret, grah, bhut, pishach, dakini, shakini, yaksh, gandharva, rakshas adi kisi prakar ka kasht nahin dete. uska apne priya se viyog nahin hota aur ant men use surya lok ki prapti hoti hai.