hamare samaksh anek aisi kundliyan ati hain jinmen kuch hamen kafi prabhavit karti hain aur aksar ham unke bare men kafi kuch sochne ko vivash bhi ho jate hain. kuch logon ki kundliyan aisi hoti hain jinhen dekhakar man vyathit ho jata hai aur ham sochne ko vivash ho jate hain ki vidhata ne unki grah sthiti aisi kyon banai. lekin ham chah kar bhi kuch nahin kar sakte, kyonki honi ko koi nahin tal sakta.
aksar log kahte hain ki jyotishiyon ka to grah kuch bigar hi nahin sakte, kyonki unhen sab kuch pahle se hi malum hota hai. lekin yatharthatah aisa nahin hota. grah chal ka prabhav sabhi par parta hai. han jyotish hamen us prabhav ko svikar karne ke lie prerit kar deta hai aur jis tarah varsha ki sanbhavna hone par ham apne sath chata rakhte hain taki varsha se bach saken, usi tarah jyotishiya upay arthat mantra, yantra evan sadhna dvara svayan ko santulit rakhte hue bhavishya men hone vali ghatnaon ke prati sajag aur unke anukul svayan ko dhalne ko tatpar ho jate hain.
faltah unka pratikul prabhav bhi apekshakrit kam kashtadayak lagta hai. lekin har vyakti ko kal chakra ki ghatnaon ko jhelna hi parta hai aur kai bar grah chal ke anurup ham n chahte hue bhi avanchit karya karne ko vivash ho jate hain. aisa hi kuch yogesh ke sath hua. yogesh bachapan se hi tej-tararra evan sahsi tha. use apne doston ke sath mataragashti karna bahut achcha lagta aur adhik se adhik samay vah unhin ke sath vyatit karta. apni is dinacharya men mata-pita ka hastakshep vah bilkul pasand nahin karta.
apne kaelej ke chunav men usne apne ek dost ka nam adhyaksh pad ke lie prastavit kiya aur uske prachar abhiyan men rat din ek kar diya. is kram men use khane pine ki sudh bhi n rahi. vah aur uske dost bas har kimat par apni parti ke ummidvar ko adhyaksh banana chahte the. parantu dusri parti ke ummidvar ka dabdba bhi kam nahin tha aur uska bhi vidyarthi varg par achcha khasa prabhav tha.
dona ummidvaron ki toliyon men ae din tutu mainmain hoti rahti aur donon hi apni jit ke lie kuch n kuch naya karne ki firak men rahte. ek din yogesh ko pata chala ki virodhi parti ka ek larka unki parti ke kuch larkon ko torne ki koshish kar raha hai. yah sun kar use bahut gussa aya aur vah apne dost hamid ke sath fauran us larke ke pas pahuncha. us larke se kafi kaha suni hui aur use chetavni dekar chor diya. parantu agle din fir unhen pata chala ki virodhi parti ke log unke vishvast logon ke khilaf koi ganbhir mamla lekar pracharya ke pas ja rahe hain.
hamid ka khun khaul utha aur vah viket bait lekar fauran unke pas pahuncha. pahle kafi bak jhak hoti rahi, lekin fir naubat mar-pit ki a gai aur hamid ne jor se bait se virodhi parti ke ek larke ke sir par prahar kar diya jisse uska sir fat gaya aur uski vahin par mrityu ho gai. navyuvkon ko kato to khun nahin. pulis ke ane par yogesh ne bina soche samjhe hamid ko bachate hue bait se marne ka iljam apne upar le liya aur use giraftar kar liya gaya. iljam apne upar lete hue yogesh ne shayad iska parinam nahin socha tha.
uske upar dhara 302 ka mukdma chala jismen parivar ki sari sanpatti bik gai. karib 4 sal tak mukdma chala aur 4 sal bad atyant mashakkat ke bad, jab ghar ki arthik sthiti bahut kharab ho chuki thi, yogesh ko jel se mukti mili. jel men tina ne, jo uski bachapan ki sahpathi thi, bahut madad ki. tina apni parhai puri kar vakil ban gai thi. usne use jel se bari karane men pura sahyog diya aur jel se chutne ke bad parivar valon ki marji ke khilaf yogesh ne tina ke sath antarjatiya vivah kiya.
yogesh ko jel se to mukti mil gai, par parivar ka sukh nahin mila. vah tina ke sath parivar se alag ho gaya. kuch hi sal men uske mata pita ka dehant ho gaya aur arthik rup se bhi vah kafi pareshan raha. jis dost ki khatir vah jel gaya, usne kabhi bhi uski khair khabar nahin puchi aur n hi kabhi uski madad ki. ise kismat ka khel hi kahenge ki uske upar aise katla ka iljam laga jo usne kiya hi nahin tha.
yogesh ki kundli men grahon ki sthiti se aie dekhen ki uske jivan men yah ghatna kyon ghatit hui. uski kundli men parakram sthan men svarashi ka rahu tatha is sthan ka karak evan sahas ka pratik grah mangal labh sthan men sthit hai. faltah yogesh bachapan se nidar evan sahsi tha. mitron ka vichar gyarhven bhav se kiya jata hai. is bhav ka svami shukra apni uchch rashi men sthit hai aur chunki mangal shukra ki rashi men hai islie usmen apne doston ke sath mauj-masti karne, idhar udhar dadagiri karne jaisi pravritti utpann hui. sarvarth chintamni ke adhyay 7 shlok 45 men kaha gaya haiah
danadhipen sandrishte lagne tannay kepi va. tasminkendra trikonasthe mahadan karo bhavet.. arthat lagn par navmesh brihaspati ki navam drishti hone se evan lagnesh ke trikon men sthit hone se mahadani yog banta hai. kundli men brihaspati ki mitra sthan par purn drishti hai, jiske karan yogesh ne apne mitra ke lie apne jivan ke bahumulya 4 varshon ki ahuti de di. ashtam bhav ka surya shatru shani ki rashi men shani ki drishti men rahu se shadashtak hokar sthit hai, islie rahu ki mahadsha men yogesh ko bandhak dosh mila.
man ka karak chandrama saptam bhav men donon or se shani evan surya se ghira hone ke karan papakartari yog bana raha hai, islie yogesh ne bina soche samjhe itna bara nirnay le liya. saptam bhav ke svami chandrama ki pancham bhav men sthiti prem vivah ko bhi darsha rahi hai. kalatra karak shukra bhagya sthan men uchch ka hokar sthit hai, jisse vivah ke pashchat patni ke bhagya ka labh mila.
gyarhven bhav ke svami shukra ki nich grah budh evan pap grah ketu ke sath yuti tatha pap grah rahu ki drishti shukra par hone ke karan us dost ne yogesh ka kabhi sath nahin diya aur n hi koi sanbandh rakha. kutunb sthan ke svami surya ka ashtam bhav men hona dhan evan kutunb tatha pita ke sukh ke lie ashubh hai. sath hi mata ka karak chandrama bhi pap prabhav men hone ke karan matri aur pitri sukh, kautunbik hani tatha arthik pareshani ke yog bana raha hai.