bimari ka bagair davai bhi ilaj hai, magar maut ka koi ilaj nahin. jyotish duniyavi hisab-kitab hai, koi davae khudai nahin. bimari ka ilaj ho sakta hai, lekin maut ka nahin. isi prakar jyotish ganna dvara falit kathan kaha jata hai, lekin yah khuda ka kaha gaya vachan nahin hai ki ismen truti n hon.
jyotish men falit kathan ki aneko paddhatiyan hai, jismen mukhya rup se parashar paddhati prachlit hai. lekin jaimini, ya krishnamurti paddhatiyan bhi upyog men layi jati hain. aisi hi ek paddhati ka nam hai ‘lal kitab’. lal kitab paddhati ke lekhak kaun hain, yah kahna to kathin hai. lekin jis rup men aj yah prachlit hai, uske mukhya rachyita shri rupchand joshi ji hain. vah raksha vibhag men lekha adhikari the. unhonne farsi ke gutke ko urdu men anuvad kar lal kitab ke nam se prakashit karvaya. prakashan sva. pan. girdhari lal sharma ne kiya, jo ganv farvala, tahsil nuramahal, jila jalandhar, panjab ke vasi the.
lal kitab mukhya rup se urdu bhasha men chapi hai aur iske san 1939 se le kar 1952 tak ke sanskaranon men lal kitab gutka, lal kitab ke arman, lal kitab ke farman, lal kitab varshafal sarni, lal kitab lagn sarni adi mukhya hain. lal kitab men adhisankhya shabd urdu-farsi ke sath-sath angreji, panjabi evan sanskrit ke bhi hain. ismen hindi aur panjabi ke muhavre bhi hain. iske lekhak avashya hi farsi, urdu evan sanskrit ke bhartiya vidvan rahe honge, kyonki iske upayon men hindu devi-devtaon ke nam, pipal adi ka jikra anek bar aya hai.
lal kitab paddhati ki parashar paddhati se kai samantaen hain. ismen janmapatri ki ganna usi rup se ki jati hai, jaise parashar paddhati men. lekin ismen parashar paddhati ka sarlikaran kiya gaya hai. parashri men grahon ke bad bhav ki hi sabse adhik mahatta hai. rashi ki mahatta usse kahin kam hai. rashiyan keval grah ki shakti ko janne ke lie hi kam ati hain.
kaun sa grah kaisa fal dega, yah nishchit hota hai keval uske bhav se; arthat grah jis bhav men baitha hoga, vah uska hi fal dega. isi tathya ko adhik mahatta dete hue lal kitab paddhati men keval bhavon ko mana gaya hai evan use khane ke nam se jana gaya hai. rashiyon ko chor diya gaya hai. atah lagn kundli bana kar usmen se rashi ke ank mita diye jate hain aur usmen rashiyon ke badle khana nanbar 1 se 12 tak dal diye jate hain.
lal kitab men vinshottari dasha ko bilkul bhi nahin liya gaya hai, varan grahon ko varsh sankhya di gayi hai evan us ayu par vah grah faldayi hota hai, jaise shani 36 varsh men, guru 16 varsh men ityadi. lal kitab ki apni dasha paddhati bhi hai, lekin ismen keval 35 sal ka chakra hota hai. isi ko manushya jivan men 3 bar ghuma kar 105 varsh tak ka hisab laga liya jata hai. lal kitab paddhati men grah soye, ya jage hue, dharmi-adharmi, andhe, nek ya mande adi avastha men mane gaye hain. isse yah pata chal jata hai ki grah fal dene men saksham hai, ya nahin. isi prakar pratyek bhav ka koi grah kismat jagane vala rahta hai, jo us bhav ko vishesh rup se shaktishali bana deta hai.
lal kitab men varsh kundli ko vishesh mahatva diya gaya hai, lekin varsh kundli banane ki paddhati bilkul fark hai. ismen gat varsh ke anusar grahon ko ek khane se dusre khane men rakh diya jata hai. is prakriya men rahu-ketu sath bhi a sakte hain, ya budh surya se kai ghar alag ho sakta hai. iske bad varsh kundli men jo shubh, ya ashubh grah hain, ve us varsh purn rup se asar karte hain. ashubh grahon ko upay ke dvara shant kiya ja sakta hai, ya shubh banaya ja sakta hai. varsh kundli ke ashubh grahon ka upay janmadin se 43 din ke andar hi karne ko kaha gaya hai.
lal kitab uttar bharat ke panjab men bahut prasiddh hai. iski mukhya lokapriyata iske asan upayon ke karan hai, jo asan hone ke sath-sath satik bhi hain. ismen kai upay grahon ki bajay lakshanon dvara bhi bataye gaye hain, jaise yadi kisi vyakti par rajdrbar ke jhagre barhte jaen, ya karobar men nuksan hona shuru ho jae, to vah apne vazan ke barabar kachcha koyla jal pravah kare, ya man-samman ki barhotri ke lie gau ki seva kare.
lal kitab men purva janm ke rin evan unke upay ati vishishtata se diye gaye hain. pitri rin, matri rin, kanya rin adi sabhi rin grahon ki vishesh khane men sthiti dvara darshaye jate hain. rinon se mukti ke lie saral upay bhi diye gaye hain jaise pitri rin guru ke 2,5,9, ya 12 ven khane men baithne se hota hai aur isse mukti ke lie pratyek parivar vale se ek-ek rupya ekatrit kar ke mandir men dan den. aisa karne se nirantar nuksan, ya kharab svasthya, ya mukaddama adi samapt ho jate hain aur jatak sukh se rah pata hai. lal kitab ke sabhi upay din men hi karne ko bataye gaye hain evan vishesh din, ya var ka koi vichar nahin kiya gaya hai. sachchai evan shuddh bhojan par vishesh dhyan diya gaya hai. kisi bhi upay ke bich mans, madira, jhuthe vachan, parastri gaman ki vishesh manahi hai.
is kanpyutar yug men lal kitab paddhati ko purn rup se fyuchar paeint dvara nirmit liyo star evan liyo pam saeftaveyr men utara gaya hai. iske dvara lal kitab kundli se le kar grah sthiti, dasha, grah fal, pitri rin, upay, varsh kundli nirman evan varsh upay adi sabhi bakhubi jan sakte hai.