shani ke prakop se har vyakti darta hai. lekin kya shani pratyek ke lie sarvada ahitakar hi hai? aisa nahin hai. apitu yah ek aisa grah hai, jiske fal pahle se hi malum par jate hain evan yadi prayas kar ise shant kiya jae, to bahut had tak ashubhta dur ho jati hai. iske viprit yadi anya grah, jaise rahu, guru, shukra adi viprit fal de rahe hon, to inke asar ko mor dena bahut kathin hai. yah avashya hai ki shani ki mar bahut tej hai. lekin sath hi yadi yah shubh fal deta hai, to rank se raja bhi bana deta hai. kyonki shani ki ashubhta ko kam kiya ja sakta hai, yahi karan hai ki shani ki sabse adhik puja-aradhna ki jati hai.
yah kisko achche aur kisko bure fal pradan karta hai? mesh lagn ke lie yah badhakarak grah hai. vrish ke lie bhi, navam, dasham ka svami hote hue bhi, badhakarak hai aur bahut achche fal nahin deta. mithun aur kanya ke lie yah madhyam faldayi hai. karka-sinh ke lie yah achcha nahin hai. lekin sinh men madhyam fal deta hai. tula ke lie yah purn yogkarak hai evan apni dasha-antardasha men purn sukh-shanti evan samriddhidayak hai. vrishchik evan dhanu ke lie shani sadharan faldayi hai. makar ke lie shubh evan kunbh ke lie yah kuch ashubhta lie shubh hai. min ke lie bhi shani ashubh nahin hai. uttarakalamrit ke anusar shukra men shani ki antardasha ullekhniya hai. jab shani yogkarak hota hai aur yah dasha ati hai, to fal utne hi ulte milte hain. yadi yah kamjor hota hai, to fal achche milte hain.
shani ki sarhe sati bhi bahut prabhavshali hoti hai. yah dasha se bhi adhik jatak ko ya to tang kar deti hai, ya upar charha deti hai. jabbhi shani chandrama se barhven, chandrama ke upar, ya chandrama se dusre bhav men gochar karta hai, to shani ki sarhe sati kahlati hai. isi prakar jab shani chandra se chaithe, ya athven bhav men gochar karta hai, to shani ki dhaiyya kahlati hai. am taur par shani ke chaithe bhav ki dhaiyya ka bahut adhik asar mahsus nahin hota hai evan sarhe sati ka asar sabse adhik hota hai. yadi chandrama se sarhe sati, ya ashtam dhaiyya chal rahi ho aur lagn se athven, ya barhven bhav men shani ho, to shani ka prakop kai guna barh jata hai; sath hi vahan par badhakarak grah bhi baithen hon, to shani ka prakop apni charam sima par pahunch jata hai. iske sath yadi dasha bhi shukra men shani, ya shani men shukra ki a jae, to shani mrityutulya kasht deta hai.
isi prakar yadi shani ki sarhe sati to ho, lekin yah yogkarak bhi ho aur dasha bhi yogkarak grah ki ho evan lagn se kendra, ya trikon men vicharan kare, to shani atishubh faldayi ho jata hai. shani ke prakop men jatak ko manhani sahni parti hai. karobar band ho jata hai aur ghate barhte jate hain. sarkari puchtach shuru ho jati hai. jel aur karj ka bhay bahut satata hai. svasthya kharab ho jata hai. khas taur se rat ki nind ur jati hai.
pet men dard rahne lagta hai. koi rasta nahin sujhta. dost dushman ho jate hain. sath uthne-baithne vale log gayab ho jate hain. ghar men bachche, patni, bhai-bahan, man-bap sab sikh dete hain. lekin uske duahkh ko koi nahin bantta. koi kam karne men man nahin lagta. aisi halat ho jati hai ki jivan bojh ban jata hai.
aisi halat men shani ke upay shanti pradan karte hain, thora-thora karya karne ki shakti dete hain aur atmabal barhate hain. nimn upay atyant saral hain, jo koi bhi kar sakta hai:
- shani ke mantra ka jap karen. - un pran prin praun sah shanaishcharay namah, ya un shan shanaishcharay namah.
- har shanivar chaya dan karen. ek stil ki katori men sarson ka tel le kar, usmen ek sikka dal kar, apni shakla dekh kar, shani par charhaen, ya dakaut ko dan den.
- sundar kand ka nitya, ya har shanivar path karen.
- kale chane, urad, kale til, kala kapra evan loha shanivar ko garibon ko dan den.
- satmukhi aur chaidhmukhi rudraksh dharan karen.
- nilam ratn dharan karen; anyatha nili, ya lajavart, panch dhatu men, dharan karen.
- kale kutte ko tel se chupri roti, mishtann sahit, khilaen.
- shani ke siddh mandir men shanivar ko sarson ke tel se shani dev ka abhishek karen.
- ghore ki nal ka challa dahine hath ki madhyama men, shanivar ki sham ko, dharan karen.
- pipal ke per ke niche, sham ko, tel ka dipak jalaen.
- hanuman ji ko shanivar ko chameli ka tel tatha chola charhaen.
- hanumanashtak, athva bajrang ban ka shuddhata se path karen.
- adhik kasht hone par 1, 5, ya 8 bar nimn totka karen .
shukravar ko sava pav kale chane pani men bhigo den. shanivar ko pani se nikal kar unhen kale kapre men bandh len. sath men ek tukra kachcha koyla, ek rupye ka sikka, kuch kale til dal den. bandh kar ise, sir par se 7 bar var kar, chalte pani men baha aen (bahane koi bhi ja sakta hai)
uparyukt upayon men se 3-4, ya adhik upay, apni shakti anusar, karen, to avashya hi shani ke prakop se rahat milegi.
shani ke lie tel ka dan sabse bara dan mana gaya hai. kahte hain ki shani ek bar hanuman ji se hath karne laga ki main bara hun. hanuman ji ne use apni punch men bandh liya aur apna kam karte rahe. shani punch men bandha jamin se tatha patthar ki ragar kha kar lahuluhan ho gaya. bad men shani ne hanuman ji se mafi mangi. hanuman ji ne shani se vachan liya ki vah unke bhakton ko kabhi duahkh nahin pahunchaega. sharir ki pira ko dur karne ke lie shani dev usi din se tel mangne lage evan teldata par prasann ho kar ashirvad dene lage.
shani ke upayon ke lie kisi ek siddh mandir men ap shani ka dan ya abhishek kar sakte hain jaise- vrindavan ke pas kokila van, maharashtra men shingnapur, tamilnadu men karaikal ke pas tirunallaru, gvaliyar men shani dev mandir, dilli men kanaet ples men hanuman mandir ke pas shani mandir, chandni chaik men favvare ke pas shani mandir evan mahrauli se 8 ki.mi. dur asola-fatehpur beri men shani dham.