thailesimiya : lal rakt koshikaon ki vikriti acharya avinash sinh rakt ki lal koshikaon men vikriti ane ke karan thailesimiya hota hai. yah rog prayah anuvanshik hota hai aur adhikatar bachchon ko grasit karta hai, uchit samay par upchar n hone par bachche ki mrityu tak ho sakti hai. rakt ke lal kanon ki ayu lagabhag 120 dinon ki hoti hai. lekin jab thailesimiya hota hai, tab in kanon ki ayu kam ho kar sirf 20 din aur is se bhi kam ho jati hai. isse sharir men sthit himoglobin par sidha asar parta hai. yadi himoglobin ki matra sharir men kam hoti hai, to sharir kamjor ho jata hai, jisse sharir ko kai rog grast kar lete hain.
ek svasth jatak ke sharir men lal rakt koshikaon ki sankhya 45 se 50 lakh prati ghan milimitar hoti hai. lal rakt koshikaon ka nirman lal asthi majja men hota hai. himoglobin ki upasthiti ke karan hi in rakt koshikaon ka rang lal dikhai deta hai. lal rakt koshikaen sharir men, auksijan aur karbanadaiauksaid ko parivartit karti hain. himoglobin men auksijan se shighrata se sanyojan kar asthayi yaugik auksi himoglobin banane ki kshamata hoti hai.
yah lagatar auksijan ko shvasan sansthan tak pahuncha kar jatak ko jivan dan deta rahta hai. garbh men bachcha thahar jane par agar bachche ke andar uchit matra men himoglobin ka ansh nahin pahunchta, to bachcha thailesimiya ka shikar ho jata hai. bachche ke janm se lagabhag 6 mah men hi thailesimiya ke lakshan najar a jate hain. bachche ki tvacha, nakhun, ankhen aur jibh pili parne lagti hain. munh men jabre men bhi dosh a jata hai, jisse dant ugne men pareshaniyan ane lagti hain tatha danton men vishmta ane lagti hai. yakrit aur pliha ki lanbai barhne lagti hai. bachche ka vikas ruk jata hai. uparyukt lakshan piliya ke bhi hote hain.
yadi doktar inhen piliya samajh kar upchar karte rahen, to rog bigrne ki sanbhavnaen barh jati hain. islie rog ke lakshanon ki thik janch kar ke sahi upchar se labh prapt ho sakta hai. thailesimiya do prakar ka hota hai- 'mainr' aur 'mejr'. mainar thailesimiya ka rogi samanya jivan jita hai, jabki mejar thailesimiya ka rogi asamanya jivan jita hai. mejar thailesimiya ke rogi ko lagabhag har tin saptah men ek botal khun dena anivarya ho jata hai. yadi samay par rogi ko khun n mile, to jivan ka ant ho jata hai. samay par khun milta rahe, to rogi lanba jivan ji sakta hai.
jaisa ki upar bataya gaya hai yah rog anuvanshik hota hai. yadi mata-pita donon mainar thailesimiya ke shikar hain, tab bachche ko is rog ki sanbhavna adhik hoti hai. yadi mata-pita donon men se koi ek mainar thailesimiya ka rogi hai, to bachche ko mejar thailesimiya ki koi sanbhavna nahin hoti. mainar thailesimiya ke shikar vyakti ko kabhi bhi is bat ka abhas nahin hota ki uske khun men dosh hai. shadi se pahle pati-patni ke khun ki janch ho jae, to hone vale bachche shayad is anuvanshik rog se bach jaen. lal rakt koshikaon ki vikriti ke upchar men abhi vaigyanikon ko saflta prapt nahin hui hai. lekin anusandhan lagatar jari hai.
thailesimiya se bachne ke upay : shadi se purva var-vadhu donon ke rakt ki janch avashya karva leni chahie, taki hone vali santan ko aisa rog n ho. karibi rishte men shadi karne se parhej karen. garbhadharan ke char mah ke andar bachche ke bhrun ka parikshan karana chahie. bhrun men thailesimiya ke lakshan pate hi garbhapat karva lena chahie. mainar thailesimiya se bachne ke lie nim aur pipal ke patton ka ras niyamit rup se ek-ek chammach pratah kal pien. labh hoga. fal tatha hari patti vali sabjiyon ka niyamit istemal karte rahna chahie. rakt parikshan karva kar is rog ki upasthiti ki pahchan kar leni chahie.
thailesimiya ke jyotishiya karan : thailesimiya lal rakt koshikaon ki vikriti ke karan hota hai. kal purush ki kundli men pancham bhav yakrit ka hota hai. yakrit se rakt ki vriddhi hoti hai. rakt men lal koshikaon ka nirman asthi majja se hota hai, jiska karak mangal hota hai. asthiyon ka karak surya hota hai. rakt ki tarlta ka karak chandra hai. yadi kisi kundli men pancham bhav, panchmesh, mangal, surya, lagn aur lagnesh dushprabhavon men ho jaen, to rakt ki lal koshikaon men vikriti paida hoti hai. inmen vishesh kar mangal pradhan grah hai; arthat mangal ka dushit hona rakt se sanbandhit vyadhiyan deta hai.
vibhinn lagnon men thailesimiya :
mesh lagn : lagnesh mangal shashth bhav men ho, budh dvadash bhav men surya se yukt ho, lekin budh ast n ho, chandra rahu se yukt, ya drisht ho, to thailesimiya ho sakta hai.
vrish lagn : panchmesh budh guru se yukt ho, mangal par guru ki drishti ho, lagnesh trik bhavon men surya se ast ho, chandra se dvitiya, dvadash bhavon men koi grah n ho to thailesimiya rog hota hai.
mithun lagn : panchmesh mangal se yukt ya drisht ho, lekin panchmesh svagrihi n ho, lagnesh trik bhavon men guru se drisht ho, chandra shani se yukt ho, to thailesimiya hota hai.
kark lagn : panchmesh mangal, shani se yukt ho aur budh se drisht ho, lagnesh chandra, shani, ya rahu, ketu se drisht ho, to thailesimiya hone ki sanbhavna barh jati hai.
sinh lagn : lagnesh panchmesh se panchm-navam bhav men ho aur shani in donon ko purn drishti se dekh raha ho, shani pancham bhav men ho aur mangal ko dekhta ho, mangal chandra se yukt aur rahu-ketu se drisht ho, to thailesimiya hota hai.
kanya lagn : panchmesh mangal se drisht, ya yukt ho, lagnesh surya se ast ho aur trik bhavon men ho, guru pancham bhav men ho aur chandra se yukt ho tatha ketu se drisht ho, to thailesimiya hota hai.
tula lagn : panchmesh guru se yukt ho, lagnesh aur mangal par guru ki drishti ho, surya bhi guru se drisht ho, chandra rahu -ketu se yukt, ya drisht ho, to thailesimiya ho sakta hai.
vrishchik lagn : lagnesh mangal ashtam bhav men ho aur budh se drisht ho, budh ast n ho aur panchmesh chandra se yukt ho kar shashth bhav men rahu-ketu se drisht ho, to thailesimiya hota hai.
dhanu lagn : panchmesh mangal shukra se drisht, athva yukt ho, lagnesh guru surya se ast ho aur budh ke ansh guru ke anshon se kuch kam hon, lekin guru ke anshon ke nikat hon; arthat 10 ke andar hon, chandra pancham bhav men shani, ya rahu-ketu se drisht ho, to thailesimiya hota hai.
makar lagn : guru pancham bhav men, panchmesh shukra ekadash bhav men surya se ast ho, lagnesh shani trik bhavon men, mangl-chandra navam bhav men rahu-ketu se drisht hon, to thailesimiya hota hai.
kunbh lagn : panchmesh guru se yukt, ya drisht ho aur trik bhavon men ho, lagnesh ast ho, mangal chandra se yukt, ya drisht ho aur ketu se drisht ho, to thailesimiya hota hai.
min lagn : lagnesh trik bhavo men ast ho, shukra pancham bhav men shani se yukt ho, mangal aur panchmesh rahu-ketu se yukt hon aur shukra se drisht hon, to thailesimiya hota hai. uparyukt yog chalit par adharit hain. dasha aur gochar men sanbandhit grah jab dushprabhavon men rahenge, to rog men tivrata hogi. thailesimiya anuvanshik hai. islie rog mukti ki sanbhavnaen bahut kam hoti hain. udaharan kundli : yah janmakundli ek tin varshiya balak ki hai, jo thailesimiya rog se grast hai. balak ke janm samay tula lagn udit ho raha tha.
lagn men surya-budh, tritiya bhav men mangal, chaturth bhav men chandra ketu, saptam bhav men, guru- shani, dasham men rahu, ekadash men shukra sthit the. jatak ka janm surya ki dasha men, budh ke antar men hua. tula lagn ki kundli men guru akarak grah hai. pancham bhav ka svami shani guru se yukt hai. mangal rakt ke lal kanon ke karak par guru ki drishti hai. surya par guru ki akarak drishti hai.
chandra ketu yukt ho kar pirit hai. lagnesh shukra par bhi guru ki drishti hai. isi karan yah balak mejar thailesimiya rog se grast hai, kyonki pancham bhav, lagnesh, mangal, chandra aur surya, jo kramshah yakrit, tan, rakt majja, rakt aur urja ke karak hain, sabhi akarak guru se pirit hai. isi lie jatak ko mejar thailesimiya rog hai.