sharirik evan mansik viklangta, lakva tatha dardanak maut ka karan banne vala mastishk raktasrav ‘bren haimrej’ ke prakop men ajakal teji se vriddhi ho rahi hai. kabhi iska shikar adhik ayu vale hote the lekin ab kam ayu vale bhi iska shikar ban rahe hain. ayurvedik drishtikon: mastishk raktasrav ke mukhya karan uchch raktachap, enyurijm aur artiriyovinas malfaermeshan hai. mastishk visheshagyaon ka manna hai ki enyurijm ke vibhag men khun ki naliyon ke andar ek prakar ka gubbara is rog ke hone par fat jata hai to rogi ko ‘‘bren haimrej’’ ho jata hai aur marij behosh ho jata hai jabki artiriyovinas malfaermeshan men dimag men khun ki nason ka ek asamanya guchcha ban jata hai.
aisa mana jata hai ki yah guchcha paidaishi hota hai aur vyakti ki umra ke sath-sath barhta rahta hai aur ek samay aisa ata hai ki mastishk ka adhik se adhik rakt is artiriyovinas malfaermeshan se hokar jane lagta hai jis karan mastishk ke dusre bhag men, rakt ki apurti kam karke, adhikansh rakt ko apne andar ikattha kar leta hai jiski vajah se vah fat jata hai. enyurijm ke rogi ka ilaj yadi gubbara fatne ke char ghante ke andar shuru ho jae, to rog ka pata lagaya ja sakta hai parantu shalya chikitsa dvara fate hue gubbare ko sil kar diya jata hai.
enyurijm ka ilaj jald n hone se iske dobara fatne ki ashanka bahut hoti hai. agar pahle bren haimrej se rogi bach bhi jae to dusri ya tisri bar nas fatne par rogi ko jivit rahna asanbhav ho jata hai. isi prakar artiriyovinas malfaermeshan men bhi rogi ka jald ilaj hona avashyak hai.
enyurijm ya artiriyovinas malfaermeshan ke karan hone vale bren haimrej yuva evan madhyam varg ke logon men adhik paya jata hai jabki raktachap aur madhumeh ke karan hone vala bren haimrej bujurg logon men adhik hota hai. jin parivaron men raktachap ya madhumeh ki samasya nahin hoti aur kisi ko bren haimrej ho jata hai to iska karan madhumeh ya raktachap nahin balki 45 pratishat enyurijm ya artiriyovinas malfaermeshan hota hai aur inki ayu 20 se 40 varsh tak hoti hai.
inhin logon par parivarik evan samajik jimmedariyan adhik hoti hain. islie kuch visheshagyaon ka manna hain ki enyurijm aur artiriyovinas malfaermeshan ka rog purushon aur mahilaon men saman rup se paya jata hai
lekin uchch raktachap ke karan ‘‘bren haimrej’’ jyadatar purushon men adhik paya jata hai kyonki inhin par parivarik, samajik aur vyavsayik jimmedariyan adhik hoti hanai jabki enyurijm aur artiriyovinas malfaermeshan ka tanav se koi sanbandh nahin hota. rog ke lakshana: jab kisi ko sir dard ya gardan men tej dard ho aur ankhon ke samne andhera cha jata ho to ise mamuli nahin samjhna chahiye. iska turant upchar karvana chahie kyonki ye bren haimrej ke hi lakshan hanai.
rog ke upay: bren haimrej ka ekmatra upay shalya chikitsa hi hai. lakshanon ko dekhte hue jald visheshagyaon ki dekh-rekh men shalya chikitsa dvara bren haimrej se bacha ja sakta hai. jyotishiya drishtikon: jyotish ke anusar bren haimrej pratham bhav, lagnesh, surya, budh aur mangal ke kuprabhavon men rahne se hota hai. kalpurush ki kundli men pratham bhav sir aur mastishk ka netritva karta hai. surya sira/mastishk tatha sharir urja ka ‘kark’ hai. mangal bhi urja pradan karta hai. budh tvacha aur nason ka karak hai aur rakt nason men bahta hai. islie sanbandhit bhav, bhav ke karak evan svami jab dushprabhavon men rahte hain to rog hote hain.
vibhinn lagnon men mastishk raktasrav mesh lagna: lagnesh ashtam bhav men, shani shashth bhav men, budh lagn men, surya dvitiya bhav men rahu-ketu se drisht ya yukt ho to bren haimrej jaisa rog deta hai.
vrish lagna: lagn men guru, mangal dasham bhav men, shukra shashth bhav men, budh se yukt aur surya saptam bhav men ho, chandra chaturth ya ashtam bhav men rahu-ketu se drisht ya yukt ho to sanbandhit rog deta hai.
mithun lagna: mangal lagn men ya lagn par drishti de, budh shashth ya ashtam bhav men ho, guru trikon bhav men ho aur chandra mangal ki drishti ya yuti ho to bren haimrej rog ho sakta hai.
kark lagna: mangal aur lagnesh rahu ya ketu se yukt ya drisht ho aur budh lagn men sthit ho, surya dvitiya bhav men ho aur shani se drisht ho to jatak ko bren haimrej deta hai.
sinh lagna: lagnesh surya rahu-ketu se yukt ho aur budh ast n hokar lagn men rahe aur shani se drisht ho, mangal shashtha-saptam ya dasham bhav men chandra se yukt ya drisht ho to jatak ko bren haimrej deta hai.
kanya lagna: lagnesh ast ho, lagn men guru-mangal se yukt ho, surya shashth, saptam ya ashtam bhav men ho aur budh ast ho aur rahu-ketu se drisht ho to jatak ko beran haimrej deta hai.
tula lagna: surya budh lagn men aur budh ast ho, lagnesh chandra tritiya bhav men ho aur rahu-ketu se drisht ho, vakri guru lagn par drishti de to jatak ko bren haimrej deta hai.
vrishchik lagna: lagnesh nich ka aur chandra se yukt tatha rahu se drisht ho, lagn men budh dvadash bhav men surya shani se drisht ho to jatak ko bren haimrej ho sakte hain.
dhanu lagna: shukra aur shani lagn bhav men aur mangl-shani ek dusre par drishti rakhe, lagnesh guru trik bhavon men aur budh tritiya men surya se ast ho to bren haimrej hota hai.
makar lagna: mangal lagn men guru se drisht ho, budh pancham bhav men guru se drisht ya yukt ho, surya-shani chaturth bhav men ho aur shani ast ho to mastishk sanbandhit rog deta hai.
kunbh lagna: shani guru se yukt hokar pancham bhav men ho, mangal lagn par drishti rakhe, surya lagn men ho aur budh ast ho, rahu-ketu par mangal ki drishti aur rahu-ketu lagn par drishti rakhe, to bren haimrej rog deta hai.
min lagna: shukra lagn men budh se yukt ho aur budh ast nahin ho, surya dvadash bhav men rahu-ketu ke prabhav men ho, lagnesh shani se yukt saptam bhav athva trik bhavon men ho to jatak ko bren haimrej hota hai.
uprokt yog apni dashantardasha aur gochar ke viprit hone par rog dete hain. uske uprant rog se rahat mil jati hai yadi ayu yog prabal ho.