albela albart pan. sharad tripathi pratibha aur medha ke paryay kahe jane vale ainstin ke bare men yah prasiddh hai ki unka dimag nyujarsi (amerika) ke prinsatan aspatal men aj bhi surakshit hai. unhen dafnaye jane se purva doktar payas staj harve ne unke mastishk ka gre metar nikalakar rakh liya tha taki yah adhyayan kiya ja sake ki unke itne medhavi hone ka rahasya kya hai. vaigyanik to apni shodh men lage hi huye hain, lekin, aiye, ek jyotishiya vishleshan ke dvara bhi yah dekhne ki koshish ki jaye ki albart ke itni vilakshan pratibha se sanpann hone ke kaun-kaun se jyotishiya yog hai. albart ka janm 14 march 1879 ko 11:30 baje dakshin jarmani ke alm shahar men hua tha. parivar men lagabhag arthik vipannata thi. pita haraman feri lagakar bijli ka chota-mota saman bechte the. unke janm ke samay man paulin bhi parhane ka kam karti thi. shishu albart ka sharirik gathan bedaul v sir kafi bara tha, hath pair apekshakrit chote the aur janm ke samay vah roya bhi nahin tha. in sabke karan man-bap ne samjha ki shishu men jivni shakti ka abhav hai.
inhin chintaon ko man men pale hue unke man-bap aprail ka mahina khatm hote-hote myunikh a gaye. din-rat ki vyastata men ve albart ka thik se dhyan nahin rakh pate the. karya ki vyastata men albart ke mata-pita aksar bahar hi rahte the aur akela albart bistar par para rahta tha. albart se do varsh choti bahan malya ka bhi janm ho chuka tha aur vah samanya rup se viksit hone lagi thi. parantu albart ka sharirik vikas samanya nahin tha. albart ke vishay men mata-pita ko bari chinta hoti, parantu ve fir se karobar ke bare men sochne lagte. shayad bahan ke sath ka asar tha ki albart sarhe char sal ki umra ka hote-hote thik hone laga. panch varsh ka hone par albart ko skul men bharti karane ki bhagdaur shuru hui, parantu haraman ainstin ka parivar yahudi tha aur myunikh ke jis ilake men ve rahte the vahan dur-dur tak yahudi skul nahin tha. jarmani men tab yahudiyon ke lie nafarat barhne lagi. isi nafarat ke chalte albart ko kisi kaitholik ya protestent skul men dakhila nahin mila, bamushkil karib do kilomitar dur ek kaitholik charch dvara chalae ja rahe skul men bharti karaya ja saka. vahan bhi yah shart thi ki albart ko grik ya laitin kakshaon men nahin baithne diya jayega, ganit aur jarman ki parhai hi karni hogi. pita ko laga ki sharirik sthiti ke anurup mansik sthiti kamjor hone ka bhi dar tha, parantu bhai fredrik ne sham ko do-dhai ghante apne nirale andaj men ganit sikhana praranbh kiya, savalon ko kahaniyon ki tarah batakar aur usi tarah halakar ke batane ki is shaili ne albart ko ganit men kavita jaisa ras lena sikha diya.
kishoravastha tak unhen ganit men itna ras ane laga ki vah khana-pina tak bhul jate the. us samay skulon men dharm ki shiksha anivarya thi. barah varsh ki umra tak albart ainstin ne bhi baibil aur isai dharm ki tamam jankariyan hasil ki. iske bavjud dharmik sanskar ainstin ko chu nahin paye. sanbhvtya yah ganit ka hi asar tha ki unhonne apne sabhi pathon ko usi tark sarini se parkha aur yah mana ki dhakosla vala ansh nikal den to dharm logon ko udar, sahishnu aur kartavyanishth banane men sahayak siddh ho sakta hai. prathmik shiksha puri karne ke bad albart ko pas hi ke jimnejiyam skul men bharti karana para. vahan kisi vishay par khulakar bat karne, puchne aur tark karne ki chut nahin thi. islie jigyasu svabhav ke albart ko yah skul ras nahin aya aur bar-bar prashn puchne ke karan ve saja bhugtte rahte the. usi samay jarmani men hitalar aur uski naji parti ka uday hone laga tha. yahudiyon ke prati nafarat ke adhar par najiparti apne panv jamati ja rahi thi. is nai dhara ne kamkaj ko aur kathin bana diya, log unhen khulakar sahyog dene se katrane lage. iska asar albart ki parhai par bhi hua. ghar men muflisi aur man men sapne sanjoe albart ne parhai jari rakhi. albart ne is bich haiskul ki pariksha pas kar li aur ek bar fir jyurikh ka rasta pakra aur politeknik ki pariksha pas kar parhai praranbh ki. vahan par mileva merik ke sath parhte huye usse prem ho gaya aur donon sath rahne lage. donon ne usi kolej se sath-sath grejueshan kiya aur kamkaj talashne lage. parhai ke dinon men unhonne bhautiki ke kshetra men gahri ruchi li aur apni pratibha ko nikhara. albart ki pratibha se prabhavit hokar jyurikh ke kuch prabhavshali logon ne prayatn kiya aur unhen svis nagrikta mil gai. svis nagrikta milne ke bad ve kuch skulon men adhyapak ke taur par bhi kam karne lage. mileva ne ek bachchi ko janm diya parantu kuch hafte bad hi vah bachchi mar gai. dukhi danpti ne apne apko kam men rama liya. mahinon sangharsh ke bad ainstin ko barn ke petent aufis men kam mila.
petent aufis men ainstin ke jimme vibhinn utpadon ko parkhne aur unhen pramanit karne ka kam tha. yahan naukri milne ke bad mileva aur ainstin ne vivah kar liya. petent aufis men naukri karte huye ainstin ne sapekshata ke siddhant ki sthapna ki, jisne bhautik shastra ke pichle do sau sal purane niyamon par savaliya nishan laga diya. san 1905 men jab ainstin ki shodh ke nishkarsh prakashit huye to vigyan jagat men khusr-fusar hui aur kuch hi varshon men vah tufan ke rup men badal gai aur jyurikh vishvavidyalay se esosiet profesar pad ka prastav aya aur vahan jvain karne ke bad unhonne murakar nahin dekha. sapekshata ke siddhant ne bhautiki ki duniyan hi badal di. sapekshata ke inhin siddhanton ki badaulat hi ikkisvin sadi ka manushya anushakti aur sanchar ki vilakshan upalabdhiyon vale is yug men ji raha hai. 1905 men ainstin ne tin mahatvapurn shodh patra likhe. tinon alg-alag ayamon men sapekshata ke siddhanton ka hi vistar the. jyurikh vishvavidyalay men 6 varsh tak profesri fir pragke jarman vishvavidyalay, fir jyurikh aur ant men barlin ke kainsar vilhem instityut men ainstin 1933 tak rahe. is avdhi men unhonne vigyan aur darshan ke kshetra men yungatrkari dharnaen di. saflta ki bulandiyon par pahunchte hi ainstin ne apne apko sabit kar diya lekin unke niji jivan men utar-charhav ate rahe. unki patni mileva, unke ganit aur vigyan ke prati samarpan se sabse jyada pareshan chal rahi thi aur talak dene par ar gayi thi. usse talak ke bad san 1917 men ve bimar pare aur unhonne elsa se vivah kar liya. 1921 men ainstin ko nobel puraskar mila.
1933 men ainstin ko ek bhayanak trasdi jhelni pari kyonki ainstin yahudi the aur hitalar v uski naji parti ka adhar hi yahudiyon ke prati nafarat tha islie unhen profesar pad se hata diya gaya tatha unki sanpatti jabt kar li gai v jarman nagrikta bhi chin gai parantu amerika ne unki pratibha ka adar karte hue unhen instityut auf edvans stadij ka nideshak bana diya. 1939 men ek patra ke dvara unhonne ameriki rashtrapti ko aise anubam ke bare men bataya jo ek bare ilake ka safaya sekend men hi kar sakta tha. 1945 men hiroshima-nagsaki par giraye gaye bam us abhiyan ka parinat rup tha. ainstin ko yahudiyon ke naye rajya ka svapnadrishta kaha gaya. dusre mahayuddh ki samapti ke bad ijrayal ki sthapna hui. tabhi unhonne avibhajit kshetra ka ek naya siddhant sthapit kiya. gurutvakarshan aur vidyut chunbkiya kshetra ko paribhashit karne vale is siddhant ke chamatkar ane vale varshon men dekhne ko milenge. 18 aprail 1955 ko jab yah vaigyanik mahasmadhi men lin hua tab bhi vah srishti ko chalane vale niyamon ki gutthi ko suljhane men laga hua tha. prastut janmank ke anusar albart ka janm jyeshtha nakshatra ke tritiya charan men hua tha. jyeshtha nakshatra mul sangyak nakshatra hota hai jiske prabhav se kahin n kahin balyavastha men kafi dinon tak khas-taur se lagabhag 10 varsh budh ki mahadsha tak pita ki arthik sthiti kharab v samasyaon se ghira hota hai.
atah isi ke prabhav se apka bachapan garibi men bita. lagnesh budh 10:56 ka hokar ashtamesh shani ke nakshatra men sthit hai aur dasham bhav men ashtamesh aur lagnesh budh aur lagnesh shani ki yuti hona apko ganit ka pravin banata hai tatha isi ke sath-sath ap bhautik vigyan ke maharthi bhi kahe jate hain. navagrahon men bhautikta ka sabse pramukh karak grah shukra ko mana jata hai jo ap ki kundli men uchch ka hokar tatha lagnesh budh ke nakshatra men sthit hokar dasham bhav men budh aur shani ke sath yuti kiye hue hai. rajya ka bhav dasham hota hai tatha rajya ka karak grah surya hota hai. vah bhi dasham bhav men budh, shukra aur shani ke sath yuti banaye hue hai. atah dasham bhav men budh, shukra, shani, surya in char grahon ki yuti ne apko ganit aur bhautik vigyan ke kshetra men maharthi banakar vishva men samman dilaya. mai 1903 se lekar mai 1906 tak inki shukra mahadsha men rahu ki antardasha chal rahi thi. shukra panchmesh hai tatha rahu ashtam bhav men sthit hai. pancham bhav uchch gyan ka hota hai tatha ashtam bhav gurh gyan, shodh v risarch ka hota hai. isi ashtam bhav men rahu ke sath labhesh uchch ke mangal ki yuti hai. atah isi vajah se san 1905 men apka shodh patra vishva men pahli bar prakashit hua. san 1921 men isi tarah surya men shukra ki antardasha chal rahi thi. surya aur shukra ki yuti dasham bhav men hai tatha surya tritiyesh hokar dasham men sthit hai. yahan par is bat ko kuch is tarah samjhen ki mithun lagn men surya ashtam se ashtam arthat tritiya ka svami hokar apne se ashtam arthat dasham men sthit hai. yah yog is kundli men surya ki gurhta ko batata hai.
isi surya ki mahadsha men san 1921 men unhen nobel puruskar se sammanit kiya gaya. apko hitalar ki tanashahi ki vajah se apne desh jarmani se bahar hokar amerika men basna para aur vahan bhi apko samman mila. iska jyotishiya karan yah hai ki dvadash bhav videsh ko batata hai. tritiya bhav (arthat dvadash se chaturtha) videsh men karya kshetra ke vistar ko batata hai. navam bhav (dvadash se dashm) videsh men karya kshetra ke vistar ko batata hai. in tinon ke hi svami arthat shukra, surya aur shani ki yuti ek sath hai tatha dashmesh brihaspati navam men sthit hai. jyotish ke isi yog ke karan apko videsh men samman mila. ashtam bhav men rahu ki uchch ke mangal ke sath yuti ek bahut hi ganbhir yog hai kyonki mangal visfot aur agni ka karak grah hai aur rahu ek vinashkari aur rahasyamay grah hai. in donon ki yuti ashtam bhav men hone ki vajah se apne anubam ke kshetra men ullekhniya karya kiya halanki san 1933 men isi mangal men rahu ka antar chal raha tha aur us samay inhin visfotkari grahon ki dasha-antardasha men apko bhayanak trasdi jhelne ke bad apne pad se hatna para. san 1955 men rahu ki mahadsha men chandrama ki antardasha chal rahi thi chandrama jo ki dvitiya bhav marak ka svami hokar chathe arthat rog bhav men nich ka hokar sthit hai brihaspati bhi apki kundli men marak prabhav rakhta hai tatha san 1955 men ye mithun rashi ka hokar apke lagn men gochar kar raha tha tatha rahu bhi marak bhav arthat saptam men dhanu rashi ka hokar gochar kar raha tha. isi ke falasvarup apka yah samay mrityudayi siddh hua.