masottam mase shravan mase shailesh pratap shastri shastron men savan ke mahatmya par bahut kuch likha gaya hai. is mas men shiv aradhna ka vishesh mahatva hai. ise manokamnaon ki purti ka mas bhi kaha jata hai. varsh ke sabhi mason men masottam mas shravan mas apna ek vishisht mahatva rakhta hain. bhartiya vanmay men shravan mas ka vishesh mahatva hai. is mas ki apni sanskriti hoti hai. jeth ke tivra tap aur asharh ki umas se klant prakriti ko amrit varsha ki darkar hoti hain.
shravan mas, shravan nakshatra tatha somvar se bhagvan shiv shankar ka gahra sanbandh hain. bhagvan shiv ne svayan apne shrimukh se sanatkumar se kaha hai ki mujhe 12 mahinon men savan (shravn) vishesh priya hai. isi kal men ve shri hari ke sath milakar prithvi par lilaen rachte hain. is mas ki ek visheshta yah bhi hain ki iska koi bhi din vrat shunya nahin dekha gaya. is mahinen men gayatri mantra, mahamrityunjay mantra, shatrudripath aur purushsukt ka path evan panchakshar, shadakshar adi shiv mantron v namon ka jap vishesh fal dene vala hain.
shravan mas ka mahatmya sunne arthat shravan yogya ho jane ke karan is mas ka nam shravan hua. purnima tithi ka shravan nakshatra ke sath yog hone se bhi is mas ka nam shravan kaha gaya jo shravan (sunne) matra se siddhi dene vala hai. shravan mas v shravan nakshatra ke svami chandra aur chandra ke svami bhagvan shiv, shravan mas ke adhishthata devadhidev tryambakam shiv hi hain. shravan puja ka niyam : shravan men ek mas tak shivalay men sthapit, pran-pratishthit shivling ya dhatu se nirmit ling ka gangajal v dugdh se rudrabhishek karen, yah shiv ko atyant priya hain.
vahi uttaravahini gangajal - panchamrit ka abhishek bhi mahafldayi hain. kushodak se vyadhi shanti, jal se varsha, dadhi se pashu dhan, ikh ke ras se lakshmi, madhu se dhan, dudh se evan 1000 mantron sahit ghi ki dhara se putra v vansh vriddhi hoti hai. shravan mas men dvadash jyotirlingon par uttaravahini gangajal kanvar men lekar paidal yatra kar, abhishek karne matra se ashvamegh yagya ke saman fal milta hain. un namah shivay mantra ke jap se akal mrityu ka bhay samapt ho jata hai.
shravan mas men varon ka mahatva : savan men somvar somvari vrat rotak bhi kahte hain. ise som ya chandravar bhi kahte hain. yah din shiv ko atipriya hai. manglvar ko mangla gauri vrat, budhvar ko budh ganpti vrat, brihaspativar ko brihaspati dev vrat, shukravar ko jivantika devi vrat, shanivar ko bajrang bali v narsinh vrat aur ravivar ko surya vrat hota hain. tithiyon ke devta : shravan pratipda tithi ke devta agni, dvitiya ke brahm, tritiya ke gauri, chaturthi ke gannayak, panchmi ke sarp, shashthi ke skand, saptami ke surya, ashtami ke shiv, navmi ke durga, dashmi ke yam, ekadshi ke svami vishvadev hain, dvadshi ke bhagvan shri hari, trayodshi ke kamdev, chaturdashi ke shiv, amavasya ke pitar aur purnima ke svami chandra hain.
tithiyon ke vrat : shravan shukla v krishn paksh ke vrat- dvitiya ko audunbar vrat, tritiya ko gauri vrat, chaturthi ko durva ganpti vrat, panchmi ko uttam nag panchmi vrat, shashthi ko supaudan vrat, saptami ko shitladevi vrat, ashtami aur chaturdashi ko devi vrat, navmi ko nakt vrat, dashmi ko ashavrat, ekadshi ko bhagvan hari vrat, dva adshi ko shridhar vrat, amavasya ko pithora vrat, kushotpatan aur vrishbhon ka archan kare, purnima ko utsarjan, upakarm sabha, dip upakarm ki sabha men raksha bandhan, shravni karm, sarp bali tatha hayagriv namak ye sat vrat shravni purnima ko hote hain.
shiv ka shravan men jalabhishek prasang katha : satyug men dev-danvon ke madhya amrit prapti ke lie sagar manthan ho raha tha. amrit kalash se purva kalkut vish nikla, uski bhayankar lapat n sah sakne ke karan sabhi devagan brahmaji ke pas gae. brahma ji ne apne tapobal se kaha ab to samast brahmand ko sadashiv hi bacha sakte hain. sabhi devgnon ki prarthana par bhagvan shiv pragat hue aur unhonne vastu sthiti ko gyat karne ke pashchat brahmaji ke anurodh par vish ki bhayankta se jagat ke sanrakshan hetu kalyan bhavna se turant vish ko ekatra kar pan kar liya aur vishpan se srishti vinash se bach gayi.
vahi vish unhonne apne kanth men avruddh kar liya, jisse unka kanth nila ho gaya aur ve nilkanth kahlaye. isi se inka nam shiv ke sath nilkanth para. samudra manthan se nikle us halahal ke pan ke samay ke bare men manyata hai ki vah shravan mas hi tha aur us vish ke tap ko shant karne ke lie devtaon ne varshatu men tapnashak belapatra charhakar gangajal se unka (shiv ka) pujan v jalabhishek aranbh kiya, tabhi se jalabhishek ki paranpra ka shrignesh (praranbh) mana jata hai. shiv ka ek arth jal bhi hota hai, aur yahi jal pran bhi hain. shivling par jalarpan ka arth hain vishyukt yogiraj men pran visarjan karke param tatva men apna pran mila dena- samarpan kar dena. yahi shravni jalabhishek ka sandesh hai.