mangal ka arth shubhta, manglikta, madhurta, anukulta se hai. yah parakram shaurya, bal v sahas ka pratik hai. yadi mangal bali evan shubh prabhav men ho to yah shakti, samarthya, bhusanpatti evan vaibhav deta hai aur vyakti ko tejasvi, balvan, nipun, atmanirbhar, svabhimani, spasht vyavharvadi, parakrami, nayak banata hai. yadi mangal nirbal v ashubh prabhav men ho to jatak ko krodhi, alsi, dhokhebaj, murkh, hathi, jhagralu, kukarmi banata hai aur jatak apni in adton se apna nuksan kar jivan ko kashtamay bana leta hai. saur mandal men sabhi grah surya ke charon or chakkar lagate hain. hamari prithvi ka paribhraman path mangal aur shukra grahon ke bich hai. paribhraman ke dauran mangal grah kabhi prithvi ke bahut nikat (lagabhag 487 lakh mil ki duri) aur kabhi kafi dur (lagabhag 2333 lakh mil ki duri) par chala jata hai.
islie yah kabhi chota aur kabhi bara dikhai deta hai. yah lagabhag 687 dinon men surya ki prarikrama karta hai. mangal ka vyas lagabhag 4221 mil hai. surya se dur hone ke karan yah akash men sarlta se dekha ja sakta hai. mangal udit hone ke lagabhag 10 mah bad vakri hota hai fir lagabhag do mah ke bad margi hota hai aur uske lagabhag das mah bad arthat uday hone ke lagabhag 22 mah bad ast ho jata hai. mangal ka angar saman lal, ushn prakriti, agni tatva tatha tamoguni pravriti hai. mesh evan vrishchik rashi tatha mrigshira, chitra, dhanishtha nakshatron ka yah svami hai. mesh rashi iski mul trikon rashi bhi hai.
surya, chandra v guru iske mitra hain jabki budh se iski shatruta hai. makar rashi men yah uchch ka aur kark men nich pravriti ka hota hai. akashiya sansad men surya ko raja evan mangal ko senapti ka pad diya gaya hai. mangal udar se pith, putte, nak, kapal, snayu, jannendriyon ke bahya bhag ka karak mana gaya hai. yah kushth rog, rakt vikar, jvar, vran, chot, raktasrav, vishpan, netra rog adi ka bhi karak hai. bhai, prithvi, putra sukh, nirman karya, jhagra, sasural, ag adi iske prabhavadhin ate hain. mangal ghor svabhimani, anushasanapriya, atyadhik kathor, evan kshatriya (senapti) svabhav ka grah hai. aisa svabhav samanya rup men ashniya hota hai aur islie mangal ko krur papi svabhav ka purush prakriti grah mana gaya hai.
janmakundli men mangal apne sthan se chaturth, saptam evan ashtam sthan ko dekhta hai. chaturth sthan sukh ka, saptam sthan jivnsathi evan bhagidar ka tatha ashtam sthan ayu v nash ka hai jo jivan men mahatvapurn bhumika nibhate hain. mangal krodh uttejna evan avesh ka dyotak hai. krodh uttejna ki sthiti men vivek ka sath chut jata hai aur jatak sukh se vanchit ho jata hai aur jivnsathi v sahyogi se anaban ya vaicharik matbhed se unka sath v sahyog chut jata hai jisse uska jivan kashtamay ban jata hai aur uski jivan shakti ka hras hota hai.
mangal janmakundli ke tisre aur chathe bhav ka karak grah hain yadi mangal apni rashi men ya uchch ka hokar kendra bhav men sthit ho to ruchak namak yog banta hai jismen utpann jatak sharir ka majbut, akarshak balvan, dhani, raja ya uske samakaksh hota hai.
kundli 1: mahan parakrami evan lokapriya samrat prithviraj chaihan ki janmakundli men mangal lagnesh hokar saptam bhav men sthit hokar lagn ko purn drishti se dekh raha hai. mangal par dashmesh (rajyesh) v ekadshesh (labhesh) shani ki tritiya uchch drishti mangal ko aur bal pradan kar rahi hai. parakram sthan (tritiya bhav) men uchch ke rahu bhi mangal ko pancham drishti se dekh rahe hain. parakramesh budh, dhanesh shukra evan bhagyesh guru dasham bhav (rajya sthan) men virajman hain aur un par lagnesh mangal ki chaturth uchch drishti ne unko aur bal pradan kiya jiske falasvarup jatak mahan parakrami evan yogya shasak bane.
kundli 2: prasiddh dasyu mansinh ki hai. yahan labhesh mangal ashtam bhav men hai. ashtamesh budh uchch ke hokar ekadash bhav men nich shukra ke sath hai jin par mangal ki chaturth drishti hai. mangal ki mul trikon rashi mesh men shashtam bhav men rahu hai jis par shani (parakramesh) ki tritiya nich drishti hai jiske karan rahu ka shani yukt prabhav mangal ne arjit kiya. mangal ki saptam drishti dvitiya (dhan) bhav tatha ashtam uchch drishti tritiya (parakram) bhav par par rahi hai aur dushit mangal shashtesh hokar shashtam se shashtam arthat ekadash bhav ko bhi chaturth drishti se dekh raha hai. falasvarup jatak ne apne parakram evan bahubal ko labh arjan evan dhan sanchay hetu dakaiti, hinsa v atank ka sahara liya. shani ki dasham drishti, lagnesh sthit guru par parne se buddhi bal ka durupyog hua aur jatak ke jivan ki disha sadmarg se bhatak gai.
kundli 3: nathuram godse ki hai. janmakundli men mangal shashtesh v ekadshesh (shashtam se shashtama) ka svami hai aur donon bhav hinsa pradhan hai. mangal lagn men hai jis par nich shani ki tritiya drishti v ketu ki navam drishti hai jo uske pap prabhav ko aur barha rahi hai. dushit mangal ki chaturth drishti chandrama (man) evan guru (buddhi) ko bhi dushit kar rahi hai. mangal budh ki rashi men lagn men hai jisse lagn v lagnesh budh dushit ho rahe hain. lagnesh budh dvadash bhav men hain jo mangal se to dushit hai hi, ek or shani v dusri or mangal hone se papakartari yog men bhi hai. budh svayan bhi surya v rahu ke sath hai. is prakar man, buddhi v vivek ke dushit hone se jatak (nathuram godse) dvara mahatma gandhi jaise mahapurush ki hatya ka dushkarm kiya gaya. mangal apne svabhav, sthiti evan bal anusar fal deta hai. mangal ka surya se sanbandh do ushn prakriti vale grahon ka sanbandh hai jo prabal urja ka srot hai. is par shubh prabhav jatak ko sahsi, srijnatmak karyon men sanlagn (sarjan, daektar, abhiyanta, sena, pulis adhikari adi) bhumipti adi bana sakta hai vahin ashubh prabhav dushkarm hinsa v arajkta ki or le ja sakta hai. mangal ka chandra se sanbandh agni evan jal tatvon ka sanbandh hai jisse vashp utpann hoti hai jiski sakaratmak shakti injan chala sakti hai vahin nakaratmak disha men vah sarvanash bhi kar sakti hai arthat chandra mangal par shubh prabhav jatak ko unchaiyon par pahuncha sakta hai vahin ashubh prabhav uske jivan ko narkiya bana sakta hai. mangal ka budh se sanbandh sahas aur vivek ka sanbandh hai. agar yah shubh evan sakaratmak ho to jatak apne karyon se bahut unnati evan khyati arjit kar sakta hai vahin ashubh evan nakaratmak prabhav usko vinash ke kagar par khara kar sakta hai. mangal aur guru ka sanbandh sahas evan gyan dharm arthat bal buddhi ka sanbandh hai.
agar yah shubh hai jo jatak achcha vidvan, shilpi, jyotishi, neta, varishth adhikari v sanpann vyakti banakar prasiddhi arjit karta hai kintu ashubh prabhav jatak ki urja ko galat disha ki or mor denge jisse jatak dushpravriti ka ho jaega. shukra kamashakti v saundarya ka pratik hai falasvarup mangal evan shukra ka sanbandh jatak ko atishay kami bana deta hai. is par ashubh prabhav jatak ko maryadahin, vyasni, vyabhichari bana sakta hai. shubh prabhav jatak ko vyapar men kushlta evan vahan sukh ki bahulta bhi deta hai. mangal aur shani ka sanbandh do tamoguni kintu shatru grahon ka hai tatha agni evan vayu tatvon ka sanyog hai jiske falasvarup mangal ki prakhrta men kuch kami to ati hai kintu uske prabhav ka dayra barh jata hai.
in par ashubh prabhav jatak ko vyapar men dhurt, kapti v avishvasi bana deta hai. mangal rahu ki yuti samanyatah mangal ke ashubh prabhav men aur yogdan deti hai vahin mangal ketu ki yuti mangal ki ashubhta men kami kar uske shubhatva ko barhati hai. yahan yah dhyan men rakhne yogya hai ki rahu ketu jis rashi men hote hain uske svami grah ke gunon ko atmasat kar parinam dete hain.
kundli 4: jarmani ke tanashah shasak hitalar ki hai. yahan mangal svarashi ka saptam (kendra) sthan men sthit hokar ruchak yog bana raha hai. uchch ke surya (ekadshesh-labhesh) budh (navmesh bhagyesh) v shukra (lagnesh) ke sath hone se mangal bali hai. guru apni rashi dhanu men tritiya (parakram) bhav men hai jahan dashmesh (rajyesh) chandra bhi virajman hai. uchch rashi (dhanu) sthit ketu guru evan chandra ke bal men atishay vriddhi kar rahe hain. falasvarup jatak ek sadharan sainik se jarmani ka shasak evan parakrami yoddha bana. mangal par shubh prabhav ke atirikt ashubh prabhav bhi hai. mangal par shani ki dasham nich drishti hai tatha ketu ki pancham drishti hai. mangal par ashtamesh shukra v dvadshesh budh ka bhi prabhav hai. in ashubh prabhavon ne uske parakram evan buddhi ko dushit kiya aur us par vidhvanskari prabhav kar diya. falasvarup jatak ki vichardhara evan pravritti tanashah shasak ki ho gai aur uski nishthurta v vinashkari pravritti use patan ki or le gai.
kundli 5: yogiraj arvind ghosh ki hai jismen panchmesh v dashmesh mangal lagn men nich ke hain jahan guru (shashtesh v bhagyesh) uchch ke hokar virajman hai. falasvarup mangal ka nichatva bhang ho gaya aur use guru ka shubhatva bhi mila. chandra (man) aur guru (gyan) ki pratinidhi hai kyonki guru chandrama ki rashi kark evan chadrama guru ki rashi dhanu men hai jo shreshth faldayak hokar man se gyan prapti ki sthiti darshati hai. lagn men sthit guru navmi drishti se navam (bhagya evan dharma) sthan ko svakshetriya drishti se tatha pancham drishti se pancham (buddhi) bhav ko dekh raha hai. falasvarup jatak ki urja, karm v buddhi dharm aur gyan ki or unmukh ho gai aur unhonne mahan yog shakti prapt ki.
kundli 6: ek safal vakil jo bad men uchch nyayalay ke nyayadhish bhi bane, ki hai. yahan lagnesh mangal chaturth bhav men budh (parakramesh evan shashtesh) ke sath hai jo dasham sthan (karm bhav) ko dekh rahe hain. falasvarup karm, buddhi v sahas ka sanyog bana. dhanesh shukra panchmesh surya se yukt hai aur un par bhagyesh guru ki pancham drishti hai. chaturthesh chandra v dashmesh labhesh shani ki pancham (buddhi) bhav men yuti hai aur un par guru (bhagyash) ki drishti hai jiske falasvarup pancham bhav (buddhi sthan) aur balvan ho gaya. lagnesh mangal v shashtamesh budh ki yuti ne vidhi (dand) sanbandhi vyavsay ko darshaya vahin karm, bhagya v buddhi ke sanyog ne usmen atishay pragti ki. falasvarup jatak ne ek safal vidhi vyavsayi (visheshakar apradhik mamlon men) banakar khyati v samriddhi arjit ki aur nyayadhish ke garimamay pad ko bhi sushobhit kiya.
kundli 7: ek safal mahila chikitsak ki hai. yahan mangal guru ki rashi dhanu men surya (dvadshesh) v rahu ke sath chaturth (sukh) bhav men sthit hai aur un par shani (panchmesh v shashtamesh) ki drishti hai. lagn men chaturthesh v saptamesh guru kundli ki shubhta evan bal pradan kar rahe hain. shani panchmesh v shashtamesh hokar dasham sthan men hai jo surya mangal se drisht hai aur chikitsa kshetra men saflta ko darshata hai. lagnesh dashmesh budh vrishchik rashi ka hokar tritiya (parakram) bhav men hai jo sahsi, nipun evan karya kushal hone ka parichayak hai. labhesh chandrama ka labh sthan men svagrihi hona, shreshth dhan labh ka sanket deta hai. jatika ek prasiddh shalya chikitsak hai jisne apni dakshata evan sahas se kai jatil mamlon men safal apreshan kar dhan aur yash prapt kiya. chaturth bhav men mangal par rahu ketu v shani ka pap prabhav, shukra ki shashtam bhav men upasthiti v rahu ki us par navam drishti, saptam bhav par mangal v shani ki drishti ne inke grihasth jivan men kai pareshaniyan paida ki kintu saptam sthan par karak guru ki svakshetriya drishti ne inke grihasth jivan ko tutne se bacha liya.
kundli 8: ek jatika ki hai. chaturth sthan men lagnesh mangal nich ke hokar chaturthesh chandra ke sath hai jahan dashmesh v labhesh shani bhi vakri hokar virajman hai jiske falasvarup lagn (tanu) evan chandra (man) donon men dushit prabhav a gaya. saptam bhav men svarashi tula ke shukra par rahu ki pancham drishti v dushit mangal ki chaturth drishti ne shubh malavya yog ko bhi naganya bana diya. pati karak guru vakri hokar shashtam sthan men hai jin par vakri shani ki tritiya drishti hai. mangal ki shukra par chaturth drishti ne jatika ko vasnamyi bana diya. man karak chandrama v lagnesh mangal ki krur papi vakri grah shani se yuti ne is mansikta men aur buddhi ki jiske falasvarup jatika ke sanbandh kai vyaktiyon se bane kintu unki paristhiti vivah ke rup men nahin ho pai. dvadash bhav par dvadshmesh guru ki svakshetriya drishti tatha saptamesh ke svarashisth hone se jatika ko asthai rup se shaiyya sukh to mila kintu patikarak guru evan chaturth v saptam par ashubh prabhav ne use vivah evan grihasth sukh se vanchit rakha.
kundli 9: janmakundli ek safal udyami injiniyar ki hai jisne apna udyog sthapit kar ashatit pragti ki. yahan mangal chaturth bhav men uchch ke shani ke sath hai. mangal panchmesh v dashmesh hone se yog karak hai aur dasham (vyavsay) v ekadash (labh sthan) ko dekh raha hai. bhagyesh guru pancham (buddhi) bhav men sthit hokar bhagya (navm), labh (ekadsh) evan lagn ko dekh raha hai. lagnesh chandra ki navmesh guru se yuti pancham (trikon) bhav men hone se chandra ke nichatva ka ashubh prabhav naganya ho gaya. shani mangal ka sanbandh injiniyaring udyog ko ingit karta hai. uchchasth shani ki dhanesh surya par tritiya drishti v lagn par drishti jatak ko udyog dvara dhan prapti ka yog darshati hai. labhesh shukra ki tritiyesh v dvadshesh budh ke sath saptam (vyapar) bhav men yuti ayat-niryat ya videsh vyapar se labh ingit karti hai. dashmesh mangal ki labhesh shukra evan labh bhav par drishti, bhagyesh guru ki lagn, bhagya v labh bhav par drishti labh men karm evan bhagya ka prabal sahyog batata hai. lagnesh chandrama ka bhagyesh guru ke sath pancham bhav men yuti purva janm ke punya fal v shubhatva ka sanket deti hai. jatak ek injiniyar evan safal udyami hai jiska vyavsay desh videsh men faila hua hai. iska jivan dhan, sukh, svasthya, dharm evan samman se paripurn hai.