varsh 2011 asha aur nirasha achay pan. ramchandra sharma vaidik varsh 2011 sanchar kranti ke karishme, parausi deshon se sanbandhon men katuta, uttari kshetron men hinsatmak ghatnaon ki sanbhavna, arthik drishti se mahatvapurn saugaton ke sath sheyar bajar men naye kirtiman sthapit hone tatha varsh men chah grahnon ki ghatna se sankramak rogon evan prakritik apdaon men vriddhi tatha khel, sinema v glaimar jagat ke lie unnati evan upalabdhiyon se paripurn hone ke karan asha evan nirasha donon ka sammishran hoga.
arthik drishti se naya varsh uttam rahega, sanchar kranti aegi, udyog tatha nivesh ke rup men bharat ko mahatva milega, bhrasht rajneta sarkar ki chavi dhumil karenge. jyotish men deshkal v paristhitiyon ka vishesh mahatva hai. sanhita granthon men rashtra ke bhavishya par vichar karne ki kai paddhatiyan prachlit hain. chaitra shukla pratipda se praranbh navavarsh, shardiya navavarsh, grahan, rajyarohan, bhukanp, sankranti v surya ke mesh rashi men pravesh ki kundli. samay v paristhitiyon ne karavat badli hai, guri parva se navavarshon ka aranbh ab panchangon tak hi simit rah gaya hai. navavarsh ke prati bhartiya janmanas ki mansikta badli hai, aj bharat sahit sara vishva janvri se naya varsh pravesh man apne kamkaj men iska upyog karta hai.
pashchatya navavarsh 1 janvri 2011 ki kundli bharat ke lie kya karishma dikhati hai. samanyatah pashchatya navavarsh ka aranbh kanya lagn se hi hota hai keval grah gochar apna sthan badlte hain. is bar navavarsh 2011 ka agaj kanya lagn ke mesh navansh tatha vishakha nakshatra men ho raha hai. rashtra ki kundli men lagn ekta-akhandta ka karak hota hai. lagn ka svami budh tritiya bhav men vrishchik rashi men sthit hai. tisra bhav sanchar, yatayat tatha khel ka hota hai. tritiya bhav men chandra-budh ki yuti 2011 men sanchar kranti ke rup men apna karishma dikhaegi. 1 janvri 2011 ki kundli prajatantra ka karak shani lagn men desh ki ekta-akhandta hetu uttam hai. bharat ke kuch pranton men jatiya sangharsh ke yog avashya banne ki sanbhavnaen hain
lekin dhire-dhire bharat ki sthiti vishva ke manchitra men adarsh, svachch aur urjavan desh ke rup men ubhregi. 15 navanbar 2011 ke bad shani tula rashi men pravesh karenge, yah samay bharat ke lie agni pariksha ka hoga. svatantra bharat ke vrishabh lagn ki kundli men us samay chathe sthan men sthit brihaspati se shani ka bhraman hoga. shani yahan par parosi deshon se sanbandhon m katuta tatha akramkta utpann karva sakta hai. chaturth sthan janta tatha janta ke sukh ka hota hai. navavarsh kundli men chaturth bhav men surya, mangal aur rahu ki yuti ban rahi hai. falit granthon men is yuti ko nakaratmak prabhav dene vali yuti ki shreni men rakha gaya hai.
mangal atankvadi ghatnaon, durghatana, visfot adi hinsatmak ghatnaon ko barhava dega visheshakar bharat ke upri hisson men yah ghatnaen ho sakti hai. rahu tatha ketu 2 mai 2011 ke bad rashi parivartan kar kramshah vrishchik aur vrishabh rashi men bhraman karenge, vrishabh bharat ka lagn tatha vrishchik saptam bhav men sthit rashi hai. yah samay desh ke lie uttam rahega. rahu se rahu ka bhraman mai-2011 ke bad bharat ke lie uttam hai, udyog tatha nivesh ke rup men bharat ka mahatva barhega. arthik drishti se naya varsh bharat ke lie mahatvapurn saugaton vala hoga.
mai ke bad sheyar bajar nae kirtiman sthapit karega. tritiya bhav patrakarita ka hota hai, mai 2011 ke bad bharat ki loktantrik shasan vyavastha ke chauthe stanbh patrakarita par prashn chihn lagenge. patrakarita men svachchata tatha akramkta ke bajay midiya ka upyog rupya ainthne tatha pad-pratishtha ka durupyog karne men rahega. rajnetaon ki drishti se naya varsh milajula rahega. dasham sthan kendra sarkar, satta paksh tatha shasak varg ka hota hai. shani ki dasham par drishti tatha surya-mangal v rahu ki saptam drishti kendra sarkar ke lie uttam nahin hai. dagi mantri kendra sarkar ki nak men dam karenge. bhrasht rajneta kendra sarkar ki chavi ko nuksan pahuncha sakte hain. dasham sthan ka svami budh parakram bhav men hokar kendra tatha shasak varg ki samasya darsha raha hai.
2011 kul milakar kendra sarkar ke lie kanton bhara hoga. kangres ka dhanu lagn hai. mai 2011 tak samay kashtakari hai. halanki mesh rashi ka guru janta ke bich ek bar punah kangres ko sashakt parti ke rup men sthapit kar sakta hai. kark lagn ki soniya gandhi varsh ke uttararddh men bharat hi nahin apitu vishva men ek adarsh rajneta ke rup men apni chamak barkrar rakhegi. rahul gandhi ke lie naya sal chunautipurn tatha sangharshon se bhara hoga. mithun lagn ki bhajpa uttam sthiti men hai. mithun lagn ka svami budh labh bhav ke svami chandrama ke sath hai. bhajpa shasit rajya anya rajyon par havi rahenge. yah varsh mahila rajneta aur netriyon ke lie uttam hai. shukra bhagya ka svami hokar dvitiya bhav men svarashi men sthit hai.
khel, sinema aur glaimar jagat ke lie naya varsh unnati evan upalabdhi dayak rahega. kunbh lagn ke amitabh bachchan ke lie naya varsh svasthya ke lihaj se uttam nahin hai. sitanbar ke bad unke svasthya men kuch giravat ane ki sanbhavnaen hai. nae varsh ka agaj grahan se hoga, pure sal men chah grahan honge jismen se tin bharat men dikhai denge aur tin nahin. 4 janvri 2011 ko khandagras surya grahan, 1 jun ko khandagras suryagrahan, 15 jun ko khagras chandragrahan, 1 julai ko khandagras suryagrahan, 25 navanbar ko khandagras suryagrahan aur 10 disanbar ko khagras chandragrahan hoga. is prakar ke chah grahan ka agla yog 2047 yani 35 sal ke bad banega. halanki uparyukt chah grahan men 4 jun, 15 jun aur 10 disanbar ke grahan ka asar hi hamare desh men dikhai dega. 1 sal men itne grahan ka hona shubh sanket nahin hai, manav jivan evan jalvayu par iska bura asar parega. sankramak bimari evan prakritik apdaen barhengi.
khel ke lihaj se varsh uttam hai, mai 2011 men kriket ka vishvakap hoga. svatantra bharat ki kundli men surya ki dasha men rahu ka antar rahega, bharat ke lie yah samay achanak labh prapti ka hoga. bharat ka pradarshan uttam rahega aur koi mahatvapurn upalabdhi prapt ho sakti hai. grah-nakshatron ki chal ki mane to sachin tendulakar vishvakap ke bad sanyas le sakte hain.
kul milakar naya sal bharat ke lie asha aur nirasha donon ka samagam lekar aega. ek or jahan arthik drishti se bharat sirmaur banega vahin dusri or bhrashtachari rajneta aur adhikariyon ke karan sir sharm se jhukega. atankvad aur dharmik unmad pure sal havi rahenge, sarkar ki suraksha aur kanun vyavastha lachar rahegi.