hastarekha shastra ka vikas prathmtah bharat men hi hua. ise samudrik shastra ke nam se bhi jana jata hai. parantu kuch pashchatya vidvanon ka aisa manna hai ki hastarekha vigyan ka prasar pahle chin men isa masih ke janm se 3000 varsh purva ho chuka tha. fir vahan se yah vidya vishva ke dusre deshon men viksit hui. lekin gris men chin se pahle is shastra ka prasar tha. iska praman grik sahitya men milta hai. paeliman, alatuniya, plini aur hispanas adi vidvanon ki smritiyon men is bat ka ullekh hai. sach to yah hai ki hamara bharatavarsh ya yon kahen to aryavart hi anya vidyaon ki tarah hastarekha gyan ka udgam sthan raha hai. yah hamare prachin maharshiyon ka adbhut gyan hi tha ki grahon ka manushyon par parne vale vistrit prabhav ka ullekh sarvapratham kiya. sath hi hastarekhaon ke adhar par manushya jivan ki ghatnaon ka sanbandh bhi bataya.
unhonne is shastra ka nam ‘‘samudrik vidya’’ diya jiske gyan se manushya ke chihnon aur hastarekhaon ke prabhav ko jana ja sakta hai. samudra rishi aise bhartiya rishi the jinhonne kramik rup se angalakshan aur hastarekhaon ke adhyayan ka marg prashast kiya aur isi karan ‘‘samudren’’ shabd ke adhar par is shastra ko samudrik ki sangya di. vaise yah shastra inse pahle angalakshan ke nam se jana jata tha. samudra rishi ke pashchat anya pramukh vidvanon men narad, varah, mandanya, paramukh, rajabhoj aur sumant adi ka nam liya ja sakta hai. nardpuran ko adhunik itihaskar isa purva chathi shatabdi ke as-pas mante hain. is narad puran men bhi angalakshan par bahutayat se samagri payi jati hai. valmiki ramayan men bhi anek sthalon par angalakshan ki charcha ki gai hai. chahe shriram ke bare men unke mahapurush hone ke ang lakshanon ka ullekh ho ya fir ram vadh ke asatya samachar sunakar sitaji ke dvara apne ang lakshanon ko dekhakar yah kahna ki vah vidhva nahin ho sakti hain kuch panktiyan drashtavya hai- ‘‘imani khalu- padmani padaryovai kulastriyah. adhirajye abhipichyante narendrah patibhiah sah..
vaidyanyan santi vai narcho'lakshanairbhagya- durlabha. batamanastani pashyani pashyanti hat lakshana..’’ valmiki ramayan men prastut is varnan se yah purnatah siddh hoga ki adi kavi valmiki ko ang lakshan ka chamatkarik gyan tha. hindu manyataon ke anusar unki rachna tretayug ki lagabhag 1296000 varsh purva ki hai. anya kai udaharan bhi valmiki ramayan men hastarekha gyan ke sanbandh men milti hai. atah nishkarshatah yah kaha ja sakta hai ki bharat hi hastarekha shastra ka udgam sthan raha hai. pashchatya vidvanon men ‘‘kiro’’ ko hastarekha shastra ka gyata evan bhavishyavakta ke rup men jana jata hai. ek bar ki ghatna hai - ek vyakti ki hatya ho gai thi aur skaetlaind yard ki pulis ko khas surag nahin mil raha tha. usi tamashbinon ki bhir men se ek vyakti ne apna ‘‘vijiting karda’’ pulis ko diya aur madad karne ki peshakash ki. us vijiting kard par likha tha - ‘‘kaunt lui heman kiro’’ (hastarekha visheshagya). pulis ne use shav ke pas jane ki ijajat de di. kiro ne shav ke pas paye gaye anguliyon ke nishan bhi mange. usne uska bariki se adhyayan kiya aur fir apni ankhen mund li. kiro ne netra kholakar batana shuru kiya - is vriddh ka hatyara nishchit hi ek yuvak hai. yah sambhrant parivar se sanbandh rakhta hai aur apni bayin-jeb men sone ki ek ghari rakhta hai. yah mritak ka nikat parijan bhi hai. yah sunakar vahan par khare log aur patrakaron ne uphas bhi kiya. parantu janch karne par kiro ki bhavishyavani satya sabit hui. isse achanbhit hokar unhin patrakron ne apne patron men kiro ke bare men vistrit jankari chapi aur kiro ratanerat vikhyat ho gaye.
ek sthal par kiro ne likha hai ki vah sansarik prapanch se dur hokar man ko ekagra kar yah karya karte hain aur usne yah vidya banaras men sikhi hai. kiro ka janm 1866 i. men aylaind men hua tha. san 1883 men satrah varsh ki ayu men ve bharat aye. bharat ke anek shahron - puna, madras, karnatak, kalakatta, banaras adi men rahakar vibhinn jyotish kendron men inhonne gyanarjan kiya. fir 1891 men inglaind, 1893 men amerika aur 1897 men rus ki yatraon ke dauran apne hastarekha gyan se vishva ko chamatkrit kar diya. kiro ke pas vishesh shaktiyan bhi thin jiske karan unki bhavishyavaniyan satya hoti gain. parantu apni mrityu ke ek mah purva hi unki chamatkarik shakti samapt ho gai aur san 1936 men ek ratri sarak kinare lainppost ke niche mrit paye gaye. atah yah kahna atishyokti nahin hogi ki hastarekha men khyati arjit karne ke lie hastarekha gyan ke sath vyakti ka udar banakar kam se kam kuch ghante apne isht evan ishvar men dhyan lagana chahie. aisa karne se man nirmal ho jata hai. use sarvagya ka ashirvad prapt hota hai aur antah prerna se vah yukt rahta hai.