shakun ek aisa jana mana madhyam hai jo vyakti ke jivan men hone vali shubhashubh ghatnaon ka sanket banta hai. adikal se vyakti shakun men vishvas karta chala a raha hai. shakun ko do shreniyon men vibhajit kiya ja sakta hai. ashubh se bachne ke lie shubh shakun ka nirman karna aur dusra svayan ghatne vale shubhashubh shakun. ghar se niklte samay koi kauva tivrata se kanv-kanv karne lage to yatra vighnakari hoti hai. muhurt vicharakar bhi yatra ke lie prasthan karte samay koi billi rasta kat jaye to yatra men hani hoti hai. yatra par jane ke samay kauva gay par baithe, gobar par baithe ya hare patte vale vrikshon par baithe to yatri ko svadyukt bhojan prapt hota hai. kahin jate samay kauva chonch men tinka uthae dikhe to yah shakun us vyakti ko labh hi labh karata hai. ye aise shakun hain jin par vyakti ka koi niyantran nahin hai.
nirmit shakun men savatsa gau ka nutan grih-pravesh ke samay dvar par vyavastha kar lena, yatra ke lie prasthan karte samay dahi ka sevan kar lena adi shamil hai. shakun ka shubhashubh prabhav vyakti aur samaj sadiyon se anubhav karta a raha hai. aj vaigyanik yug men samaj ji raha hai. kuchek log shakun ke mahatva ko nakarate hain. parantu aise log bhi apni abhivyakti ke madhyam se yah ahsas kara hi dete hain ki shakun ka astitva hai. jaise bayin ankh farkne par yah kahte hue suna jata hai ki aj meri bayin ankh farak rahi hai. shakun n sirf sharirang ke svatah apratyashit rup se sanchalan se abhivyakti pata hai varan yah vibhinn pashu, pakshiyon evan padarth dvara bhi vyakt hota hai. inmen kauva, ullu, kutta, billi, chamgadar, khargosh, girgit, tota, murga, menrhak, mor, urta hua patta adi anek aisi chije hain jo bhavishya ke sandarbh men apna shubhashubh prabhav batlate hain. aie inmen se kuch ki charcha karen.
kauva
(ka) kisi purush ke mathe se urte hue kauva ka sparsh khule vatavaran men ho jay to us vyakti ka sukh-saubhagya samapt ho jata hai.
(kha) kahin jate samay koi kauva kisi vyakti ke kandhe se takra jay to uska dushman use apne adhikar men leta hai.
(ga) pratah samay koi vyakti kahin ja raha ho aur koi kauva urta hua panv ko sparsh kar jay to yah shakun use tamam khushiyon se bhar deta hai. use jivan men unnati milti hai, adhik dhan ki prapti hoti hai aur shatru uske samne jhuk jate hain.
(gha) kahin par baithakar koi kuch kha raha ho aur koi kauva us khane men se kuch lekar ur jay to us vyakti ko har svikar kar leni chahie kyonki jo jhagra shatru ke sath chal raha hai usmen uski parajay hone vali hai.
(ra) kisi din tisre prahar men kauva kisi ke upar mandrate hue bole to us admi ko apna kapra dhokar taiyar kar lena chahie kyonki use sammanpurvak kisi bhoj men ane ka nimantran milne vala hai. urta hua patta kisi kam se jate samay kisi vriksh ka patta urta hua sir par akar gire to yah shakun vyakti ko karya men saflta prapt karne ka shubh sandesh deta hai.
puja-path: kisi karya ke samay kahin puja-path hone ka svar sunai pare to yah samjhna chahie ki use karya men siddhi milegi aur samman milega.
gayon ka jhund: yadi kisi admi ke darvaje ke pas gayen jhund banakar baithna praranbh karen to yah shakun us ghar ke nivasiyon ke lie pragti ka suchak hai.
paise girna: kahin jate samay kapra pahnte hue harbri men paise niche gir jate hain. yah shubh shakun hai aur vyakti ko dhan labh hone ka sanketak hai.