kunbh mahaparva  

is varsh guru evan surya ke sinh rashi men pravesh karne par kartikadi shravan mas ki amavasya, arthat 27 agast 2003 se nasika/tryanbkeshvar men kunbh parva ke mukhya snan ka ayojan kiya gaya hai. vaidik vanamay ke anusar tryanbkeshvar men shaiv evan nasik men, jahan bhagvan shri ram ne apne banvas ka chaidhvan varsh vyatit kiya tha, vaishnav log snan karte hain. yah svayan men ashcharya ki bat hai ki kunbh parva men, bina kisi nimantran ke, lakhon-karoron log ek hi samay par, ek hi sthan par ekatrit ho jate hain.

kunbh parva ka pauranik tathya

mahabharat evan anya granthon ke anusar devasur men paraspar yuddh ke samay samudra manthan hua. us samay amrit kalash prapt hua, jise kunbh bhi kaha jata hai. is amrit kunbh ko le kar prayag, ujjain, nasik, haridvar adi 4 sthanon par vishram ke samay garur ji ne vahan dev yajan kiya. isi bich amrit ki kuch bunde vahan chalak parin, jis karan in 4 sthalon ki dharti ko shuchi sangyak mana jane laga evan vahan kunbh parva manaya jane laga. hindu dharm ganrathon men kunbh parva ka atyant vistrit ullekh paya jata hai. pauranik kathaon ke anusar samast dev evan devigan kunbh par agaman kar ke anandit hote hain. kunbh parva par shraddh, yagya, dan, tap, mantra siddhi adi pramukh rup se siddh hote hain. kunbh parva ke samay, dharm sindhu ke anusar, 8 dan mukhya mane gaye hain tatha inki visheshtaen ati labhkari hain. ye ath dan is prakar hain:

1. til 2. loha athva lohe se nirmit vastuen 3. kapas athva kapas se nirmit vastuen 4. sona, athva sone se bani vastuen 5. namak 6. sapt dhanya 7. prithvi 8. gay. kunbh parva par bhishm ji ko tarpan dena sabhi ke lie avashyak evan punyakari mana gaya hai.

kunbh parva ka jyotishiya drishtikon

kunbh mela lagabhag 12 varshon bad parta hai. guru evan surya ki rashi ke anusar yah parva manaya jata hai, jiska ullekh skand puran men nimn shlok men ata hai:

haridvare kunbh yoge mesharke kunbh guro. prayage meshasthejye makarasth divakre.. ujjainyan ch mesharke sinhasthe ch vrihaspate. sinhasthitejya sinharke nasike gautmi tate..

kunbh aur mesh rashi men surya hone par haridvar men, mesh rashi men guru aur makar rashi men surya hone par prayag tatha sinh rashi men guru aur mesh rashi men surya hone par ujjain men kunbh parva hota hai. sinh rashi men guru aur sinh rashi men hi surya jab hota hai, tab nasik panchvti men sinhasth mahakunbh parva manaya jata hai.

apni kundli men rajyogon ki jankari paen brihat kundli riport men

is prakar agast 2003 se nasika/tryanbkeshvar men kunbh parva manaya ja raha hai tatha aprail 2004 se yah parva ujjain men manaya jaega. ujjain ke sath haridvar men ardh kunbh bhi manaya jaega. vrishchik ke guru men prayag men ardh kunbh manaya jata hai. ardh kunbh keval haridvar evan prayag men manaya jata hai, ujjain evan nasik men nahin. isse pahle kab aur kahan kunbh ka mela manaya gaya, yah bhi uprokt talika se dekha ja sakta hai. is prakar kunbh ka mela, ek nishchit samay ke pashchat n ho kar, lagabhag 12 varshon ke antral men punah usi sthan par manaya jata hai. guru evan surya ke rashi sancharan ke anusar kabhi nasik men pahle evan kabhi ujjain men pahle kunbh parta hai.

snan evan pujan ka mahatva

surya, guru evan chandra ki vividh sthitiyon ke anusar kunbh parva ke ayojan par bhinna-bhinn charon sthalon ka shahi snan hota hai. tadnusar vibhinn akharon ke mahanton ka snan hota hai. iske pashchat shankracharyon ka snan hota hai. iske bad mahamandleshvaradi ka snanadi hota hai. kunbh parva par kiye gaye dharm kritya koti guna adhik fal pradan karne vale hote hain. atah is parva par sabhi ko dharm labh lena chahie. ganga, yamuna, sarasvati, krishna, kaveri, brahmaputra adi kai aisi pavitra nadiyan hain, jinmane snan karte samay sarvapratham pair ka sparsh anuchit mana gaya hai. is karan snan karte samay sarvapratham thora sa jal apne hathon men lekar sir par chirkna chahie. tatpashchat sare ang ko nahlaya ja sakta hai. kunbh parva par tanbe ke lote se surya ko aghrya dena ati labhkari hai.

aghrya dene se netra dosh, nav grah dosh, pitri dosh nasht hote hain. aghrya dene ke lie suryoday ke kuch bad, lote men jal le kar, hriday ke sath laga kar, dhire-dhire jal ko atut dhar se girana chahie. nav grah shanti evan kal sarp yog shanti, vish kanya dosh adi ki shanti bhi kunbh parva par uchit mani gayi hain. saubhagya evan sukh ki prapti ke lie kunbh parva par gangadi ke kinare ki mitti se shiv ling nirmit karke parthiv puja karne se sukh-saubhagya ki nishchay hi prapti hoti hai. anek prakar ke bure karmon ke prayashchittasvarup, hriday tak jal men khare ho kar, shuddh rudraksh ki mala par yathashakti 24 sankhyatmak jap karne se labh hota hai.

putra prapti evan putra sukh ke lie shrimdbhagavat kathamrit ka pan karna tatha vishnu evan krishn ko tulsi athva bel patra se sahasrarchan karna nishchay hi labh dete hain. bhagyoday evan dhan labh adi ke lie brahma evan ekadash rudra ki puja-upasna ki jati hai. kamal pushp se vishnu pujan karne par kunbh parva par upasthit sabhi devtaon ko santushti milti hai tatha ve ashish pradan karte hain. punya nadi ke kisi bhi tirth men snan karne se sabhi pap nasht ho jate hain evan punya ki prapti hoti hai. kaha gaya hai ki jo punya kartik mah men hajar bar ganga snan se prapt hota hai, magh mah ke sau snan evan vaishakh men ek lakh narmada snan karne par jo punya prapt hota hai, vah punya kunbh parva men ek snan se prapt hota hai.

to get your personalized solutions, talk to an astrologer now!