manav man sada kathaon men ruchi rakhta hai tatha ham unke bar - bar kathan aur unke naye arth vistar se sada hi atmik santosh prapt karte hain. yahi karan hai ki ham jyotish men grahon ke janm aur prabhav ke vishay men vibhinn kathaen pate hain. yah kathaen apne vistar aur svarup men ek dusre se bhinn hote hue bhi unka antarnihit satya vastav men sada sthai aur atal rahta hai. yon bhi kathaen to do kinaron ko jorne vale pul ke saman hain jo n keval sanvad ko ek purnata pradan karti hai apitu unke arth pradan kar unmen nihit satya se bhi hamara sakshatkar karati hain. rahu se ketu ke janm ke vishay men ek prasiddh katha kuch is prakar hai. rahu ek shaktivan asur tha jo ki rup badlne ki kala men nipun tha.
samudra manthan men jab devtaon aur daityon ne sahyog kiya to usse prapt hone vale chaidah amulya ratnon ko unhonne apne bich barabr-barabar bant liya. kintu amrit ko koi bhi dusron ke sath bantne ko raji nahin hua aur vahan yuddh ki si sthiti ban gai. tab bhagvan vishnu ne ek ati sundar stri mohini ka rup liya aur donon devtaon aur asuron ko apni-apni pankti men baithne ko kaha jisse vah donon ko barabar - barabar amrit bant de. mohini ek hath men amrit se bhara patra tatha dusre men madira se bhara patra le nritya v gan karte hue donon ko pilane lagi. vah dhyan purvak devtaon ko amrit tatha daityon ko madira pila rahi thi. uske is karya par rahu ke atirikt kisi ka bhi dhyan nahin gaya, tab amrit ki ichcha se rahu devta ka rup bana surya aur chandra ke madhya ja baitha. tab mohini rup men bhagvan vishnu ne use devta man amrit diya to vah use turant hi pi gaya.
surya tatha chandrama dvara dhyan diye jane par vah kuch alag laga. unhonne vishnu ji ko bataya. vishnu ji ko pata lagte hi unhonne apne chakra se uske do tukde kar diye, kintu amritpan ke karan donon bhag jivit rahe aur is prakar gardan se sir ka bhag rahu aur kandhon se niche ka bhag ketu kahlaya. jabki rahu ke svabhav aur prabhav ko samjhne ke lie hamne ek anya katha ka sahara liya tha parantu ketu ka svabhav aur charitra uprokt ketu katha ke adhar par samjhne ka prayas karenge. jab rahu ko vishnu bhagvan ne gardan se do bhagon men kat diya to upar ka bhag rahu tatha niche ka ketu kahlane laga. netra, mukh, nak, jihva aur mastishk adi ke abhav men sharir ke nichle bhag ke svabhav ko samjhna bahut hi kathin hai.
samanyatah to is avastha men vah ek shav se adhik kuch bhi nahin rahta kintu ketu ke vishay men yah satya nahin hai. is satya ke viprit ketu to purnatah jivant, sanvedit, urjapurn, shaktishali tatha kriyashil hai. vastav men ketu men hi amrit ke prabhav ko jana ja sakta hai. yadi ham keval sharirik prakriti, svabhav aur charitra ko hi ketu ka asli svabhav manen to ham uske vishay men adhik nahin jan payenge. ketu ka sharirik rup to yah dikhata hai ki vyakti is sansar men fansa hua hai tatha anek yojnaon aur sanbhavnaon ke rahte bhi unko karya rup dene ka koi marg nahin khoj pata. mastishk, netra adi ke n rahte, vah apni buddhi, chetna tatha purnataon ka sahi rup men prayog nahin kar sakta.
atah ketu apni samasyaon ke uttar ke lie idhar - udhar ghumakkar ki tarah ghumta rahta hai. is prayas men vah apni purn shakti se apne lakshyon ko khojta hai tatha parinamon se n ghabrakar, shakti bhar prayas karta hai kintu purn prayas ke bad dishahinta ke chalte vah apne lakshya ko prapt nahin kar pata. aise men ek samay aisa ata hai jab vah is nirantar parajay se ek jakhmi yoddha ki tarah har manakar jivan samar men ek or baith jata hai, kuch samay bad apni samast bhagdaur ko tyagakar apne ap men hi prashnon ke uttar khojne lagta hai. ek hi pratyaksh sharirik dosh sahi rah pane ke raste ko saikron pareshaniyon se bhar deta hai. yah hamen ketu ke vishay men spasht dikhai deta hai.
ketu ek aisi jivant shakti ka dyotak hai jo jivan se bharpur hote hue bhi apni abhivyakti ke lie marg ko nahin janta. isi prayas men vah ek sire se shuru karta hai magar asafal hone par idhr-udhar kudta-fandta hai aur isi prayas men harakar apne ko ghayal, trast, vifal, kunthit, dukhi, ekaki tatha param hatash pata hai ki kya kare, kya n kare. inhin nirashajanak paristhitiyon men bhi apni jivtta ko vah punah chala, sahspurvak nae prayas men lag jata hai. kintu gyan, disha aur samajh ke abhav men parajay v hatasha ka khel chalta hi rahta hai. amaratva ka prabhav hi itna chamatkari hai ki n to ise shant baithne deta hai n hi apni paristhiti ke karan vah lakshya prapt hi kar pata hai aur svayan hi iska hal vah nahin janta. isi bhagdaur men ek samay aisa bhi ata hai ki jab sabhi prayason ko nirarthak jan, vah uttaron ko apne hi bhitar khojne lagta hai.
yahan se ketu ki asli prakriti hamare samne ati hai jo ki jivan ki sabhi samasyaon aur uljhnon se par pane men samarth hai. munh ke abhav men ketu ke pas antajrnyan aur sparsh donon ki anubhuti ke atirikt anya koi bhi gyan ka madhyam nahin hai. ek samay ata hai ki ketu apne hi bhitar samasyaon ke uttar khojne lagta hai. jis kshan yah khoj ki disha badalakar antarmukhi hoti hai, adhyatmikta ki or unmukh hoti hai tab ketu apna hi margadarshak ho jata hai. aisa nahin hai ki jivan ki samasyaon ke hal kisi sthan par rakhe hue hain jo jakar vahan se utha layen aur jivan anandamay ho gaya. vah uttar jo jivan men sahi maynon men arthavan hote hain, vah to antahgyan se hi prapt ho sakte hain. yah antahbodh achanak hi udghatit hota hai kintu iske lie ek nirantar prayas ki avashyakta hoti hai. ketu ki prakriti men yah akasmat aur chamatkrit bhav bar - bar dekhne men ata hai.
yadi koi param chetna ko janna chahta hai athva uska bhag hona chahta hai to uska antim nirnay to param chetna ke pas hi rahta hai. vyakti kuch bhi ichcha kar sakta hai, yadi vah vastav men uske yogya nahin hai to uska adhikar bhi parmshanti men hi nihit hai. shayad isi karan jigyasu to janmon - janmon tak satya ki khoj men laga rahta hai kintu ek din achanak hi akash se varsha hoti hai aur siddharth gautam purn pragya ko prapt kar tathagat buddh ho jata hai. param lakshya ko pane ke marg men bar-bar girakar uthna parta hai.
ketu hamen yahi sandesh deta hai ki apne adhyatmik paksh se parichit hone ke lie bar - bar asafal hona nitant avashyak hai. ketu yah abhas dilata hai ki svayan kathinaiyon se gujarakar suli par charhakar hi gyan ko prapt kiya ja sakta hai. chunautiyon se takrakar atm balidan ka gun use purn satya tak le jata hai. purn satya ko janne ka sabse sahaj aur uttam marg yahan - vahan khojte rahne men nahin, apne bhitar jhankakar antahgyan se use pane men hi hai.